ദില്ലി: ദേശീയ പരീക്ഷാ ഏജൻസിയുടെ (NTA) പരീക്ഷാ നടത്തിപ്പ് കൂടുതൽ സുതാര്യവും കുറ്റമറ്റതുമാക്കുന്നതിനായി വിപുലമായ അഴിച്ചുപണിക്ക് കേന്ദ്ര സർക്കാർ തുടക്കമിട്ടു. പരീക്ഷാ സംഘത്തിലുണ്ടായിരുന്ന 600 വിദഗ്ധരെ ഒഴിവാക്കിയ കേന്ദ്രം, പകരം പുതിയ വിദഗ്ധരെ നിയമിച്ചു. ഇതിന് പുറമെ ചോദ്യപേപ്പർ പരിശോധനയ്ക്കായി നാലുഘട്ട (Four-Tier) സംവിധാനം ഏർപ്പെടുത്താനും അടുത്ത രണ്ടാഴ്ചയ്ക്കുള്ളിൽ 25-ഓളം പുതിയ ഉദ്യോഗസ്ഥരെ നിയമിക്കാനും തീരുമാനമായിട്ടുണ്ട്. എൻടിഎ ഓഫീസുകൾ അടിയന്തരമായി പുതിയ കെട്ടിടത്തിലേക്ക് മാറ്റുമെന്നും കെട്ടിടത്തിന് സിഐഎസ്എഫ് (CISF) സുരക്ഷ ഉറപ്പാക്കുമെന്നും അറിയിച്ചിട്ടുണ്ട്. പരീക്ഷകൾ സുഗമമായി നടത്തുന്നതിന് ആവശ്യമായ സുരക്ഷയും അടിസ്ഥാന സൗകര്യങ്ങളും ഒരുക്കാൻ കേന്ദ്ര വിദ്യാഭ്യാസ മന്ത്രി നിർദേശം നൽകി.
സുതാര്യത ഉറപ്പാക്കാൻ സമഗ്ര ഓഡിറ്റിംഗ്
പരീക്ഷാ നടത്തിപ്പിലെ വീഴ്ചകൾക്ക് ഉത്തരവാദികളായവർക്കെതിരെ കർശന നടപടിയുണ്ടാകുമെന്ന് എൻടിഎ വ്യക്തമാക്കി. വിദ്യാർത്ഥികളുടെ താല്പര്യം സംരക്ഷിക്കുന്നതിനായി എൻടിഎ അധികൃതരുമായി കേന്ദ്ര വിദ്യാഭ്യാസ മന്ത്രി പ്രത്യേക യോഗം ചേർന്നു. പരീക്ഷാ പ്രോട്ടോക്കോളുകൾ കർശനമായി പാലിക്കാനും പരീക്ഷാ നടപടികൾ മുഴുവൻ സമഗ്രമായ ഓഡിറ്റിംഗിന് വിധേയമാക്കി തിരുത്തൽ നടപടികളുടെ റിപ്പോർട്ട് സമർപ്പിക്കാനും മന്ത്രി ആവശ്യപ്പെട്ടിട്ടുണ്ട്. വരും ദിവസങ്ങളിൽ കൂടുതൽ കാര്യക്ഷമമായ രീതിയിലാകും ഏജൻസിയുടെ പ്രവർത്തനം.
യുജിസി നെറ്റ് പുനഃപരീക്ഷ സെപ്റ്റംബർ 9, 10 തീയതികളിൽ
യുജിസി നെറ്റ് പരീക്ഷയിലുണ്ടായ ഗുരുതര പിഴവുകളെയും ഉദ്യോഗാർത്ഥികളുടെ വ്യാപക പരാതികളെയും തുടർന്ന് മൂന്ന് വിഷയങ്ങളിൽ പുനഃപരീക്ഷ നടത്താൻ എൻടിഎ തീരുമാനിച്ചു. ഇംഗ്ലീഷ്, കൊമേഴ്സ്, സോഷ്യോളജി എന്നീ വിഷയങ്ങളിലാണ് വീണ്ടും പരീക്ഷ നടക്കുക. സെപ്റ്റംബർ 9, 10 തീയതികളിലായി ക്രമീകരിച്ചിരിക്കുന്ന പരീക്ഷയിൽ, സെപ്റ്റംബർ 9-ന് രാവിലെ ആദ്യ ഷിഫ്റ്റിൽ ഇംഗ്ലീഷും ഉച്ചയ്ക്ക് ശേഷമുള്ള ഷിഫ്റ്റിൽ കൊമേഴ്സും നടക്കും. സെപ്റ്റംബർ 10-ന് രാവിലെയാണ് സോഷ്യോളജി പരീക്ഷ നിശ്ചയിച്ചിരിക്കുന്നത്.
Extensive reshuffle in NTA: 600 experts removed, new appointments made
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
