ഓട്ടവ: കാനഡയിൽ ലേബർ ഡേ ആഘോഷങ്ങൾ പുരോഗമിക്കവേ, രാജ്യത്തെ വ്യവസായ മേഖലയിൽ വൻ വിവാദത്തിന് തിരികൊളുത്തിക്കൊണ്ട് ‘കാനഡ ലേബർ കോഡിൽ’ അടിയന്തര ഭേദഗതി വരുത്തണമെന്ന ആവശ്യവുമായി തൊഴിലുടമകൾ രംഗത്തെത്തി. വ്യോമയാനം, റെയിൽവേ, ടെലികമ്മ്യൂണിക്കേഷൻ തുടങ്ങിയ നിർണായക മേഖലകളിൽ തൊഴിലാളികൾ നടത്തുന്ന പണിമുടക്കുകൾക്ക് തടയിടണമെന്നാണ് പ്രമുഖ തൊഴിലുടമ സംഘടനയായ FETCO (ഫെഡറലി റെഗുലേറ്റഡ് എംപ്ലോയേഴ്സ് – ട്രാൻസ്പോർട്ടേഷൻ ആൻഡ് കമ്മ്യൂണിക്കേഷൻ) ഫെഡറൽ സർക്കാരിനോട് ആവശ്യപ്പെട്ടിരിക്കുന്നത്. രാജ്യത്തിന്റെ പൊതുതാൽപ്പര്യവും സാമ്പത്തിക ഭദ്രതയും മുൻനിർത്തി ഇത്തരം മേഖലകളിൽ സമരം ചെയ്യാനുള്ള അവകാശത്തിന് പരിധികൾ നിശ്ചയിക്കണമെന്നാണ് ഇവരുടെ വാദം.
തൊഴിൽ തർക്കങ്ങൾ ഉണ്ടാകുമ്പോൾ പണിമുടക്കുകളിലേക്ക് കടക്കുന്നതിന് പകരം, വിഷയം ഒരു പ്രത്യേക മീഡിയേഷൻ ഓഫീസിന് (Special Mediation Office) കൈമാറണമെന്നും നിയമപരമായി ബാധകമാകുന്ന നിർബന്ധിത മധ്യസ്ഥതയിലൂടെ (Binding Arbitration) പരിഹരിക്കണമെന്നുമാണ് FETCO മുന്നോട്ടുവെക്കുന്ന നിർദേശം. കഴിഞ്ഞ മൂന്ന് വർഷത്തിനിടെ കാനഡയിൽ പണിമുടക്കുകൾ മൂലം നഷ്ടപ്പെട്ട തൊഴിൽ ദിനങ്ങൾ തൊട്ടുമുമ്പത്തെ പത്ത് വർഷത്തെ മൊത്തം നഷ്ടത്തേക്കാൾ കൂടുതലാണെന്ന് FETCO പ്രസിഡന്റ് ഡെറക് ഹൈൻസ് വ്യക്തമാക്കി. 2023-ലും 2024-ലുമായി ബ്രിട്ടീഷ് കൊളംബിയയിലെ വെസ്റ്റ് കോസ്റ്റ് പോർട്ടുകളിൽ നടന്ന 13 ദിവസത്തെ പണിമുടക്ക് മൂലം 1,920 കോടി ഡോളറിന്റെ ചരക്ക് നീക്കം തടസ്സപ്പെടുകയോ വഴിതിരിച്ചുവിടപ്പെടുകയോ ചെയ്തിരുന്നു. ഇത് രാജ്യത്തിന്റെ അന്താരാഷ്ട്ര വ്യാപാര പ്രതിച്ഛായയെ സാരമായി ബാധിച്ചുവെന്നും ഇത്തരം ബിസിനസ് നഷ്ടങ്ങൾ തിരിച്ചുപിടിക്കാൻ കഴിയില്ലെന്നും അദ്ദേഹം ചൂണ്ടിക്കാട്ടുന്നു.
പണിമുടക്കുകൾ മൂലം സപ്ലൈ ചെയിൻ തടസ്സപ്പെടുന്നത് രാജ്യത്തെ ചെറുകിട-ഇടത്തരം വ്യവസായ സ്ഥാപനങ്ങളെ തളർത്തുകയാണെന്ന് കനേഡിയൻ ഫെഡറേഷൻ ഓഫ് ഇൻഡിപെൻഡന്റ് ബിസിനസ് (CFIB) പ്രസിഡന്റ് ഡാൻ കെല്ലിയും വ്യക്തമാക്കി. പല സ്ഥാപനങ്ങൾക്കും പ്രവർത്തനം നിർത്തിവെക്കേണ്ടി വരികയോ ജീവനക്കാരെ പിരിച്ചുവിടേണ്ടി വരികയോ ചെയ്യുന്നുണ്ട്. അന്താരാഷ്ട്ര തലത്തിൽ കാനഡയുടെ വിശ്വസനീയമായ വ്യാപാര അന്തരീക്ഷത്തിന് ഇത്തരം തുടർച്ചയായ പണിമുടക്കുകൾ കനത്ത തിരിച്ചടിയാണെന്ന് വ്യവസായ ലോകം ആശങ്കപ്പെടുന്നു.
എന്നാൽ തൊഴിലുടമകളുടെ ഈ നീക്കത്തിനെതിരെ കനേഡിയൻ ലേബർ കോൺഗ്രസ് (CLC) ശക്തമായ എതിർപ്പുമായി രംഗത്തെത്തിയിട്ടുണ്ട്. സമരം ചെയ്യാനുള്ള അവകാശത്തിന്മേലുള്ള ഏത് കടന്നുകയറ്റവും തൊഴിലാളികളുടെ ആത്മാഭിമാനത്തെയും ന്യായമായ വേതന അവകാശങ്ങളെയും പൂർണ്ണമായും തകർക്കുമെന്ന് CLC പ്രസിഡന്റ് ബീ ബ്രൂസ്കെ പറഞ്ഞു. സമരം ഒഴിവാക്കാൻ ആഗ്രഹിക്കുന്ന തൊഴിലുടമകൾ ന്യായമായ ചർച്ചകൾക്ക് തയ്യാറാകുകയാണ് വേണ്ടത്. വേതന വർധനവിന് പുറമെ ജോലി സമയം, തൊഴിൽ-ജീവിത സന്തുലിതാവസ്ഥ, ജോലിസ്ഥലത്തെ സുരക്ഷ എന്നിവയിൽ മാനേജ്മെന്റുകൾ കാണിക്കുന്ന വീഴ്ചയാണ് തൊഴിലാളികളെ പിക്കറ്റിംഗിലേക്ക് നയിക്കുന്നതെന്നും അവർ ഓർമ്മിപ്പിച്ചു.
ALSO READ: ഒന്റാരിയോ നിവാസികളെ അറിഞ്ഞോ? ഈ മാസം രണ്ട് CRA ആനുകൂല്യങ്ങൾ അക്കൗണ്ടിലെത്തും, തീയതികൾ അറിയാം
രാജ്യത്തെ മാറുന്ന സാമ്പത്തിക വെല്ലുവിളികൾക്ക് അനുസൃതമായി കാനഡ ലേബർ കോഡ് പരിഷ്കരിക്കാൻ കനേഡിയൻ സർക്കാർ അടിയന്തര നടപടികൾ ആരംഭിച്ച പശ്ചാത്തലത്തിലാണ് തൊഴിലുടമകളും തൊഴിലാളി യൂണിയനുകളും തമ്മിലുള്ള തർക്കം കൂടുതൽ രൂക്ഷമായിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
