ഒട്ടാവ : സ്കൂളുകളിലെ തിരക്കും വായുമലിനീകരണവും ഒഴിവാക്കാൻ വാഹനങ്ങൾക്ക് നിയന്ത്രണമേർപ്പെടുത്തുന്ന ‘സ്കൂൾ സ്ട്രീറ്റ്’ പദ്ധതിയുമായി സർക്കാർ. സ്കൂൾ തുറക്കുന്ന സമയങ്ങളിൽ വിദ്യാർത്ഥികളുടെ സുരക്ഷ ഉറപ്പാക്കാനും കുട്ടികളിൽ നടത്തവും സൈക്ലിങ് ശീലവും പ്രോത്സാഹിപ്പിക്കാനുമാണ് കാനഡയിലുടനീളം ഇത്തരത്തിലുള്ള കാർ രഹിത മേഖലകൾ നടപ്പാക്കുന്നത്. പബ്ലിക് ഹെൽത്ത് ഏജൻസി ഓഫ് കാനഡയുടെ സാമ്പത്തിക സഹായത്തോടെ ‘ഗ്രീൻ കമ്മ്യൂണിറ്റീസ് കാനഡ’ എന്ന പരിസ്ഥിതി സംഘടനയുടെ നേതൃത്വത്തിലാണ് ഈ സുപ്രധാന പദ്ധതി രാജ്യത്ത് നടപ്പാക്കിവരുന്നത്.
സ്കൂളുകൾക്ക് മുന്നിലെ റോഡുകളിൽ താൽക്കാലികമായി ബാരിക്കേഡുകൾ സ്ഥാപിച്ച് ഡ്രോപ്-ഓഫ്, പിക്കപ്പ് സമയങ്ങളിൽ കാറുകളുടെ പ്രവേശനം തടയുന്നതാണ് ഈ പദ്ധതിയുടെ രീതി. ഇതിലൂടെ കുട്ടികൾക്ക് സുരക്ഷിതമായി കളിക്കാനും നടന്നുപോകാനും സാധിക്കുന്നു. ബ്രിട്ടീഷ് കൊളംബിയ, ആൽബർട്ട, മാനിറ്റോബ, ഒന്റാരിയോ, ക്യുബെക്ക്, നോവ സ്കോഷ്യ എന്നീ ആറ് പ്രവിശ്യകളിലായി ഇതിനോടകം നിരവധി സ്കൂളുകളിൽ പദ്ധതി പരീക്ഷിച്ചു കഴിഞ്ഞു. 2026-2027 അധ്യയന വർഷത്തിൽ കുറഞ്ഞത് 20 സ്കൂളുകളിൽ കൂടി ഇത്തരം സംവിധാനങ്ങൾ ഏർപ്പെടുത്താനാണ് ലക്ഷ്യമിടുന്നത്.
എന്നാൽ, പദ്ധതി ദീർഘകാലത്തേക്ക് വ്യാപിപ്പിക്കുന്നതിൽ നിരവധി വെല്ലുവിളികളുണ്ട്. യാത്രാസൗകര്യങ്ങളെ ബാധിക്കുന്നുവെന്നാരോപിച്ച് ചിലയിടങ്ങളിൽ പ്രതിഷേധങ്ങളും ഹർജികളും ഉയർന്നിട്ടുണ്ട്. കൂടാതെ, ദിവസേന റോഡുകളിൽ ബാരിക്കേഡുകൾ സ്ഥാപിക്കാനും നീക്കം ചെയ്യാനും ആവശ്യമായ വളണ്ടിയർമാരുടെ കുറവും പദ്ധതിക്ക് തടസ്സമാകുന്നുണ്ട്. എങ്കിലും, കുട്ടികളുടെ ആരോഗ്യത്തിനും റോഡ് സുരക്ഷയ്ക്കും വായുമലിനീകരണം കുറയ്ക്കുന്നതിനും പദ്ധതി വലിയ തോതിൽ ഗുണം ചെയ്യുമെന്നാണ് വിദഗ്ധരുടെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
