ടൊറന്റോ: ക്യാപിറ്റൽ വൺ ക്രെഡിറ്റ് കാർഡ് കമ്പനിയിലുണ്ടായ വൻ ഡാറ്റ ചോർച്ചയുമായി ബന്ധപ്പെട്ട് കാനഡയിൽ 35 മില്യൺ ഡോളറിന്റെ ധാരണാപത്രം സമർപ്പിച്ചു. ബ്രിട്ടീഷ് കൊളംബിയ സുപ്രീം കോടതിയുടെ പരിഗണനയിലുള്ള ഈ ഒത്തുതീർപ്പ് വ്യവസ്ഥ പ്രകാരം, വിവരങ്ങൾ നഷ്ടപ്പെട്ട അർഹരായ കാനഡക്കാർക്ക് പരമാവധി 25,000 ഡോളർ വരെ നഷ്ടപരിഹാരം ലഭിച്ചേക്കും. ക്യുബെക് പ്രവിശ്യക്ക് പുറത്ത് താമസിക്കുന്ന, കമ്പനിയുടെ സുരക്ഷാ വീഴ്ചയെക്കുറിച്ച് ഔദ്യോഗിക അറിയിപ്പ് കത്ത് ലഭിച്ച ക്യാപിറ്റൽ വൺ ഉപഭോക്താക്കൾക്കാണ് ഈ തുകയ്ക്ക് അർഹതയുള്ളത്.
ഒരു പ്രമുഖ അന്താരാഷ്ട്ര ക്ലൗഡ് സേവന കമ്പനിയിലെ മുൻ സോഫ്റ്റ്വെയർ എഞ്ചിനീയർ നടത്തിയ അനധികൃത ഇടപെടലിനെത്തുടർന്ന് 2019-ലാണ് ഈ ഡാറ്റ ചോർച്ച ഉണ്ടായത്. സംഭവത്തിൽ ഏകദേശം 60 ലക്ഷം കാനഡക്കാരുടെയും 100 മില്യണിലധികം അമേരിക്കക്കാരുടെയും പേര്, വിലാസം, ഫോൺ നമ്പർ എന്നിവയ്ക്ക് പുറമെ ക്രെഡിറ്റ് സ്കോർ, അക്കൗണ്ട് വിവരങ്ങൾ, സോഷ്യൽ ഇൻഷുറൻസ് നമ്പർ (SIN) തുടങ്ങിയ രേഖകളും ചോർന്നിരുന്നു. ഡാറ്റ ചോർച്ച മൂലം സാമ്പത്തിക നഷ്ടം നേരിട്ടവർ, ഐഡന്റിറ്റി മോഷണം തടയാൻ പണം ചിലവഴിച്ചവർ, ഇതിനായി സമയം നഷ്ടപ്പെടുത്തിയവർ എന്നിവർക്കാണ് മൂന്ന് വിഭാഗങ്ങളിലായി തുക അനുവദിക്കുക.
ജൂലൈ 13-ന് ഔദ്യോഗികമായി പ്രസിദ്ധീകരിച്ച ഈ ഒത്തുതീർപ്പ് വ്യവസ്ഥയിൽ എതിർപ്പറിയിക്കാനോ പിന്മാറാനോ താൽപ്പര്യമുള്ളവർക്ക് സെപ്റ്റംബർ 11 വരെ സമയമുണ്ട്. തുടർന്ന് സെപ്റ്റംബർ 22-ന് നടക്കുന്ന സുപ്രീം കോടതി ഹിയറിംഗിൽ അന്തിമ അംഗീകാരം ലഭിച്ച ശേഷമായിരിക്കും ഉപഭോക്താക്കൾക്ക് ക്ലെയിം സമർപ്പിക്കാനുള്ള നടപടികൾ ആരംഭിക്കുക. ഇതുമായി ബന്ധപ്പെട്ട സംശയങ്ങൾക്ക് 1-888-808-9672 എന്ന ടോൾ-ഫ്രീ നമ്പറിലോ capitalone2019classaction.ca എന്ന ഔദ്യോഗിക വെബ്സൈറ്റ് വഴിയോ ബന്ധപ്പെടാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Capital One Data Breach: Eligible Canadians to Receive Compensation of Up to $25,000
