എബോള മൃതദേഹം വിട്ടുകൊടുത്തില്ല; കോംഗോയിൽ ചികിത്സാകേന്ദ്രം ജനക്കൂട്ടം തീയിട്ടു നശിപ്പിച്ചു, ആശങ്കയൊഴിയാതെ ആഫ്രിക്ക

ബുനിയ (കോംഗോ): ആഫ്രിക്കൻ രാജ്യമായ ഡെമോക്രാറ്റിക് റിപ്പബ്ലിക് ഓഫ് കോംഗോയിൽ എബോള വൈറസ് വ്യാപനം അതീവ ഗുരുതരമായി തുടരുന്നതിനിടയിൽ വൻ സംഘർഷം. കിഴക്കൻ കോംഗോയിലെ ഇട്ടൂരി പ്രവിശ്യയിലുള്ള റംപാരയിലെ എബോള ചികിത്സാകേന്ദ്രത്തിന് ഒരുസംഘം യുവാക്കൾ തീയിട്ടു. എബോള ബാധിച്ച് മരിച്ച പ്രാദേശിക നിവാസിയുടെ മൃതദേഹം പരമ്പരാഗത ചടങ്ങുകൾക്കായി വിട്ടുകൊടുക്കാൻ അധികൃതർ വിസമ്മതിച്ചതാണ് ജനക്കൂട്ടത്തെ പ്രകോപിപ്പിച്ചത്. സംഘർഷത്തെത്തുടർന്ന് ചികിത്സാകേന്ദ്രത്തിലുണ്ടായിരുന്ന ആരോഗ്യപ്രവർത്തകരും സന്നദ്ധപ്രവർത്തകരും വാഹനങ്ങളിൽ രക്ഷപ്പെടുകയായിരുന്നു. പ്രദേശത്ത് സ്ഥിതിഗതികൾ നിയന്ത്രണവിധേയമാക്കാൻ പോലീസ് ഇടപെട്ടെങ്കിലും ജനക്കൂട്ടത്തെ ശാന്തരാക്കാൻ സാധിച്ചില്ലെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്തു.

എബോള ബാധിച്ച് മരിക്കുന്നവരുടെ മൃതദേഹങ്ങളിൽ നിന്ന് രോഗം അതിവേഗം പകരാൻ സാധ്യതയുള്ളതിനാൽ, കർശനമായ ആരോഗ്യ പ്രോട്ടോക്കോൾ പാലിച്ചാണ് നിലവിൽ സംസ്കാര ചടങ്ങുകൾ നടത്തുന്നത്. എന്നാൽ, മൃതദേഹം വീട്ടിലേക്ക് കൊണ്ടുപോകണമെന്ന ആവശ്യവുമായി എത്തിയ ബന്ധുക്കളും സുഹൃത്തുക്കളും നിയന്ത്രണങ്ങൾ ലംഘിക്കുകയായിരുന്നു. തുടർന്ന് ആരോഗ്യകേന്ദ്രത്തിലേക്ക് ഇരച്ചുകയറിയ പ്രതിഷേധക്കാർ അവിടെയുണ്ടായിരുന്ന ഉപകരണങ്ങളും എബോള ബാധിതന്റേതെന്ന് സംശയിക്കുന്ന ഒരു മൃതദേഹവും തീയിട്ടു നശിപ്പിച്ചു. നിലവിൽ ഇവിടെ സ്ഥിതിഗതികൾ ശാന്തമാണെന്നും സന്നദ്ധ സംഘടനയായ ‘അലീമ’ (ALIMA) യുടെ നേതൃത്വത്തിൽ പ്രവർത്തനങ്ങൾ പുനരാരംഭിച്ചതായും ഫീൽഡ് കോർഡിനേറ്റർ ഹാമാ അമാദൗ വ്യക്തമാക്കി.

കോംഗോയിൽ നിലവിൽ 671 എബോള കേസുകളും 160 മരണങ്ങളുമാണ് ഔദ്യോഗികമായി സ്ഥിരീകരിച്ചിട്ടുള്ളത്. അയൽരാജ്യമായ ഉഗാണ്ടയിലും ഒരു മരണമടക്കം രണ്ട് കേസുകൾ റിപ്പോർട്ട് ചെയ്തിട്ടുണ്ട്. എന്നാൽ, യഥാർത്ഥ രോഗബാധിതരുടെ എണ്ണം ഇതിലും എത്രയോ മുകളിലാണെന്ന് ലോകാരോഗ്യ സംഘടന (WHO) മുന്നറിയിപ്പ് നൽകുന്നു. നിരീക്ഷണം ശക്തമാക്കുന്നതോടെ കൂടുതൽ കേസുകൾ പുറത്തുവരുമെന്ന് ആഫ്രിക്കൻ സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ ഡയറക്ടർ ജനറൽ ജീൻ കസേയ വ്യക്തമാക്കി. നിലവിലെ വ്യാപനത്തിന് കാരണമായ ‘ബുന്ദിബുഗ്യോ’ (Bundibugyo) വകഭേദത്തിനെതിരെ ഫലപ്രദമായ വാക്സിനുകളോ മരുന്നുകളോ ലഭ്യമല്ലെന്നത് പ്രതിസന്ധിയുടെ ആഴം കൂട്ടുന്നു. പുതിയ വാക്സിൻ ലഭ്യമാകാൻ കുറഞ്ഞത് ആറ് മുതൽ ഒൻപത് മാസം വരെ സമയമെടുക്കുമെന്നാണ് വിദഗ്ദ്ധരുടെ വിലയിരുത്തൽ.

രോഗവ്യാപനത്തിന്റെ കേന്ദ്രമായ ഇട്ടൂരി പ്രവിശ്യയിൽ നിലനിൽക്കുന്ന ആഭ്യന്തര സംഘർഷങ്ങളും തീവ്രവാദ ആക്രമണങ്ങളും ആരോഗ്യപ്രവർത്തകരുടെ ദൗത്യത്തിന് വലിയ തടസ്സമാകുന്നുണ്ട്. കഴിഞ്ഞ ചൊവ്വാഴ്ചയും ഇവിടെയുണ്ടായ ഇസ്ലാമിക് സ്റ്റേറ്റ് (IS) അനുകൂല ഭീകരരുടെ ആക്രമണത്തിൽ 17 പേർ കൊല്ലപ്പെട്ടിരുന്നു. പ്രവിശ്യയിൽ ഒൻപത് ലക്ഷത്തിലധികം അഭയാർത്ഥികളാണ് താത്കാലിക ക്യാമ്പുകളിൽ കഴിയുന്നത്. അന്താരാഷ്ട്ര തലത്തിൽ നിന്നുള്ള സാമ്പത്തിക സഹായം വെട്ടിക്കുറച്ചതും പ്രദേശത്തെ തകർന്ന ആരോഗ്യസംവിധാനങ്ങളും പ്രതിരോധ പ്രവർത്തനങ്ങളെ ദോഷകരമായി ബാധിച്ചിട്ടുണ്ട്. വരും ദിവസങ്ങൾ അതീവ നിർണായകമാണെന്നും പ്രാദേശിക സമൂഹങ്ങളുമായി ചേർന്ന് അടിയന്തിര പ്രതിരോധ നടപടികൾ സ്വീകരിക്കുമെന്നും ഇന്റർനാഷണൽ ഫെഡറേഷൻ ഓഫ് റെഡ് ക്രോസ് അധികൃതർ അറിയിച്ചു.

കോംഗോയ്ക്ക് പുറമെ ദക്ഷിണ കിവു പ്രവിശ്യയിലേക്കും രോഗം പടർന്നതായി സ്ഥിരീകരിച്ചിട്ടുണ്ട്. രോഗവ്യാപനത്തിന്റെ പശ്ചാത്തലത്തിൽ അന്താരാഷ്ട്ര തലത്തിൽ വലിയ നിയന്ത്രണങ്ങളാണ് ഏർപ്പെടുത്തി വരുന്നത്. അടുത്ത ആഴ്ച ന്യൂഡൽഹിയിൽ നടക്കേണ്ടിയിരുന്ന ‘ഇന്ത്യ-ആഫ്രിക്ക ഫോറം ഉച്ചകോടി’ മാറ്റിവെച്ചതായി ഇന്ത്യയും ആഫ്രിക്കൻ യൂണിയനും അറിയിച്ചു. എബോള ഭീതിയെത്തുടർന്ന് കോംഗോയുടെ ദേശീയ ഫുട്ബോൾ ടീം ലോകകപ്പ് യോഗ്യതാ മത്സരങ്ങൾക്കായുള്ള പരിശീലനക്യാമ്പും റദ്ദാക്കി. കൂടാതെ, കോംഗോ, ഉഗാണ്ട, ദക്ഷിണ സുഡാൻ എന്നീ രാജ്യങ്ങൾ സന്ദർശിച്ച വിദേശികൾക്ക് യു.എസ് ഗവൺമെന്റ് താൽക്കാലിക യാത്രാവിലക്ക് ഏർപ്പെടുത്തുകയും സ്വന്തം പൗരന്മാർക്കായി വിമാനത്താവളങ്ങളിൽ കർശന പരിശോധന ആരംഭിക്കുകയും ചെയ്തിട്ടുണ്ട്.

Ebola did not release the body; a mob set fire to a treatment center in Congo, Africa remains concerned

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt