ഒന്റാരിയോ : ഗ്രേറ്റർ സഡ്ബറിയിലെ ഏകദേശം 90,000 താമസക്കാരെ ബാധിച്ച ‘ബോയിൽ വാട്ടർ അഡ്വൈസറി’ വെള്ളിയാഴ്ച വൈകുന്നേരത്തോടെ പിൻവലിച്ചതായി പബ്ലിക് ഹെൽത്ത് സഡ്ബറി ആൻഡ് ഡിസ്ട്രിക്റ്റ്സ് അറിയിച്ചു. കഴിഞ്ഞ ബുധനാഴ്ച ന്യൂ സഡ്ബറി, സഡ്ബറി, ഗാർസൺ, ഫാൽക്കൺബ്രിഡ്ജ് എന്നിവിടങ്ങളിലെ കുടിവെള്ള സാമ്പിളുകളിൽ കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്നാണ് അധികൃതർ ജാഗ്രതാനിർദ്ദേശം പുറപ്പെടുവിച്ചത്. ജാഗ്രതാനിർദ്ദേശം പിൻവലിച്ചെങ്കിലും സുരക്ഷാ മുൻകരുതലിന്റെ ഭാഗമായി ശേഖരിച്ച കൂടുതൽ സാമ്പിളുകളുടെ പരിശോധനാ ഫലം മെയ് 9-ന് ലഭ്യമാകുമെന്നും അധികൃതർ വ്യക്തമാക്കി.
പൊതുജനാരോഗ്യം സംരക്ഷിക്കുന്നതിനായി നിരീക്ഷണ സംവിധാനങ്ങൾ കൃത്യമായി പ്രവർത്തിച്ചതായും അപകടസാധ്യതകൾ മുൻകൂട്ടി കണ്ടെത്താൻ സാധിച്ചതായും അസോസിയേറ്റ് മെഡിക്കൽ ഓഫീസർ ഓഫ് ഹെൽത്ത് ഡോ. എമിലി ഗ്രൂട്ട് അറിയിച്ചു. നിലവിൽ ജലവിതരണ ശൃംഖല സുരക്ഷിതമാണെന്നും ശുദ്ധീകരണ സംവിധാനങ്ങൾ കൃത്യമായാണ് പ്രവർത്തിക്കുന്നതെന്നും രണ്ട് തുടർച്ചയായ പരിശോധനകളിലൂടെ ഉറപ്പാക്കിയിട്ടുണ്ട്. ബാക്ടീരിയയുടെ സാന്നിധ്യത്തിന് കാരണമായ സാഹചര്യം കണ്ടെത്താൻ അന്വേഷണം തുടരുകയാണെന്നും നിലവിൽ ആശങ്കപ്പെടേണ്ട സാഹചര്യമില്ലെന്നും ആരോഗ്യവിഭാഗം പ്രസ്താവനയിൽ വ്യക്തമാക്കി.
ജാഗ്രതാനിർദ്ദേശം പിൻവലിച്ച സാഹചര്യത്തിൽ ഉപഭോക്താക്കൾ അഞ്ച് മിനിറ്റെങ്കിലും ടാപ്പുകളിലൂടെ തണുത്ത വെള്ളം ഒഴുക്കിക്കളയണമെന്ന് അധികൃതർ നിർദ്ദേശിച്ചു. ജലത്തിലെ കലക്കൽ മാറുന്നത് വരെ ഇത് തുടരണം. വാട്ടർ ഫിൽട്ടറുകൾ, കാട്രിഡ്ജുകൾ, റിവേഴ്സ് ഓസ്മോസിസ് മെംബ്രേണുകൾ എന്നിവ മാറ്റി പുതിയവ സ്ഥാപിക്കണം. ഫ്രിഡ്ജുകളിലെ ഐസ് മേക്കറുകളിൽ നിർമ്മിച്ച ആദ്യ മൂന്ന് ബാച്ച് ഐസ് കട്ടകൾ ഒഴിവാക്കണമെന്നും ഹോട്ട് വാട്ടർ ഹീറ്ററുകളിലെ വെള്ളം മാറ്റി നിറയ്ക്കണമെന്നും ആരോഗ്യവിഭാഗം പുറപ്പെടുവിച്ച നിർദ്ദേശത്തിൽ പറയുന്നു.
Drinking water is now safe in Sudbury: Authorities say ‘boil water advisory’ has been lifted
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
