‘വിമാനം റദ്ദാക്കിയാൽ എയർ കാനഡയുടെ റീഫണ്ട് സ്വീകരിക്കരുത്’; മുന്നറിയിപ്പുമായി വിദഗ്ദ്ധർ

വിമാനം റദ്ദാക്കിയാൽ യാത്രക്കാർക്ക് റീഫണ്ട് വാഗ്ദാനം ചെയ്ത് എയർ കാനഡ. എന്നാൽ, ഈ റീഫണ്ട് സ്വീകരിക്കരുതെന്ന് മുന്നറിയിപ്പുമായി വിദഗ്ദ്ധർ രംഗത്ത്. വിമാന ജീവനക്കാർ സമരം പ്രഖ്യാപിച്ചതിനെ തുടർന്ന് നിരവധി വിമാനങ്ങൾ എയർ കാനഡ റദ്ദാക്കിയിട്ടുണ്ട്. ഇത്തരം സാഹചര്യത്തിൽ, യാത്രക്കാർക്ക് മറ്റൊരു വിമാനത്തിൽ ടിക്കറ്റ് ബുക്ക് ചെയ്തുനൽകാൻ വിമാനക്കമ്പനിക്ക് നിയമപരമായ ബാധ്യതയുണ്ടെന്നാണ് എയർ പാസഞ്ചർ റൈറ്റ്‌സ് പ്രസിഡന്റ് ഗാബോർ ലുക്കാക്സ് പറയുന്നത്. റീഫണ്ട് വാങ്ങി യാത്രക്കാർ സ്വന്തമായി ടിക്കറ്റ് എടുക്കുമ്പോൾ, മറ്റൊരു വിമാനത്തിൽ ടിക്കറ്റ് നൽകാനുള്ള നിയമപരമായ ഉത്തരവാദിത്വത്തിൽ നിന്ന് എയർ കാനഡയ്ക്ക് ഒഴിഞ്ഞുമാറാൻ സാധിക്കുമെന്നും അദ്ദേഹം ചൂണ്ടിക്കാട്ടി.

കാനഡയിലെ എയർ പാസഞ്ചർ പ്രൊട്ടക്ഷൻ റെഗുലേഷൻസ് അനുസരിച്ച്, യാത്രക്കാരുടെ നിയന്ത്രണത്തിലല്ലാത്ത കാരണങ്ങളാൽ വിമാനം റദ്ദാക്കിയാൽ, യാത്രാ ലക്ഷ്യസ്ഥാനത്തേക്ക് അടുത്ത ലഭ്യമായ വിമാനത്തിൽ ടിക്കറ്റ് ബുക്ക് ചെയ്തുനൽകാൻ എയർ കാനഡ പോലുള്ള വലിയ വിമാനക്കമ്പനികൾക്ക് ബാധ്യതയുണ്ട്. ഈ ‘അടുത്ത ലഭ്യമായ വിമാനം’ എന്നത് മറ്റൊരു വിമാനക്കമ്പനിയുടെതായാലും ടിക്കറ്റ് എടുത്ത് നൽകേണ്ടത് എയർ കാനഡയുടെ ഉത്തരവാദിത്വമാണ്. അടുത്ത ലഭ്യമായ വിമാനത്തിൽ യാത്രക്കാരെ അവരുടെ ലക്ഷ്യസ്ഥാനത്തേക്ക് എത്തിക്കാൻ എയർ കാനഡയ്ക്ക് ബാധ്യതയുണ്ടെന്നും, ഇതിന്റെ ചെലവ് എത്രയായാലും വിമാനക്കമ്പനി വഹിക്കണമെന്നും ലുക്കാക്സ് പറയുന്നു. അതേസമയം, യാത്രക്കാർക്ക് ഫുൾ റീഫണ്ടിന് അർഹതയുണ്ടെന്ന് എയർ കാനഡ അവരുടെ വെബ്‌സൈറ്റിൽ അറിയിച്ചിരുന്നു.

റദ്ദാക്കിയ വിമാനങ്ങളുടെ യാത്രക്കാർക്ക് റീഫണ്ട് വാഗ്ദാനം ചെയ്യുന്നതിലൂടെ, ഉയർന്ന നിരക്കിൽ മറ്റ് വിമാനക്കമ്പനികളിൽ ടിക്കറ്റ് ബുക്ക് ചെയ്യേണ്ടിവരുന്ന സാമ്പത്തിക ബാധ്യത ഒഴിവാക്കാനാണ് എയർ കാനഡ ശ്രമിക്കുന്നതെന്ന് ലുക്കാക്സ് വിശ്വസിക്കുന്നു. അവസാന നിമിഷം ടിക്കറ്റ് ബുക്ക് ചെയ്യുമ്പോൾ ടിക്കറ്റ് നിരക്ക് കുത്തനെ ഉയരുന്നതും, സമരത്തെ തുടർന്ന് പെട്ടെന്ന് യാത്രക്കാരുടെ എണ്ണം വർദ്ധിച്ചതും ടിക്കറ്റ് നിരക്ക് ഉയരാൻ കാരണമായി. എയർ കാനഡ ഒരു യാത്രക്കാരന് അടുത്ത ആഴ്ചത്തേക്ക് എയർ കാനഡ ജാസ് വിമാനത്തിൽ ടിക്കറ്റ് വാഗ്ദാനം ചെയ്യുകയും, എന്നാൽ വിലയേറിയതാണെങ്കിലും വെസ്റ്റ്‌ജെറ്റ് വിമാനത്തിൽ രണ്ട് ദിവസം മുൻപ് ലക്ഷ്യസ്ഥാനത്ത് എത്താൻ സാധിക്കുമെങ്കിൽ, ആ യാത്രക്കാരനെ വെസ്റ്റ്‌ജെറ്റ് വിമാനത്തിൽ ബുക്ക് ചെയ്യേണ്ടത് എയർ കാനഡയുടെ നിയമപരമായ ഉത്തരവാദിത്വമാണെന്നും അദ്ദേഹം പറയുന്നു. യാത്രക്കാരൻ സ്വന്തമായി മറ്റൊരു വിമാനത്തിൽ ടിക്കറ്റ് എടുത്താൽ അതിന്റെ ബിൽ എയർ കാനഡയ്ക്ക് അയച്ച് പണം തിരികെ നേടാമെന്നും ലുക്കാക്സ് കൂട്ടിച്ചേർത്തു.

'Don't accept Air Canada refunds if your flight is canceled'; Experts warn