തമിഴ്നാട് രാഷ്ട്രീയത്തിലെ അപ്രതീക്ഷിത മാറ്റങ്ങൾക്ക് പിന്നാലെ കോൺഗ്രസിനെതിരെ കടുത്ത വിമർശനവുമായി പ്രധാനമന്ത്രി നരേന്ദ്ര മോദി രംഗത്തെത്തി. മൂന്ന് പതിറ്റാണ്ടോളം പ്രതിസന്ധി ഘട്ടങ്ങളിൽ ഒപ്പം നിന്ന ഡി.എം.കെയെ രാഷ്ട്രീയ കാറ്റ് മാറിയപ്പോൾ കോൺഗ്രസ് ഒറ്റിക്കൊടുത്തുവെന്ന് മോദി ആരോപിച്ചു. തമിഴ്നാട്ടിൽ ഡി.എം.കെ സഖ്യം ഉപേക്ഷിച്ച് വിജയ്യുടെ ടി.വി.കെ സർക്കാരിന്റെ ഭാഗമാകാനുള്ള കോൺഗ്രസ് തീരുമാനത്തെയാണ് പ്രധാനമന്ത്രി കടന്നാക്രമിച്ചത്. അധികാരത്തോടുള്ള അടങ്ങാത്ത ആർത്തിയാണ് കോൺഗ്രസിന്റെ ഈ നീക്കത്തിന് പിന്നിലെന്നും അദ്ദേഹം പരിഹസിച്ചു.
അധികാരക്കൊതിയന്മാരായ കോൺഗ്രസ് കിട്ടിയ ആദ്യ അവസരത്തിൽ തന്നെ ഡി.എം.കെയെ പിന്നിൽ നിന്ന് കുത്തിയെന്ന് പ്രധാനമന്ത്രി തന്റെ എക്സ് (ട്വിറ്റർ) ഹാൻഡിലിലൂടെ കുറിച്ചു. രാഷ്ട്രീയമായി നിലനിൽക്കാൻ കോൺഗ്രസിന് എപ്പോഴും മറ്റൊരു പാർട്ടിയുടെ സഹായം ആവശ്യമാണെന്നും അദ്ദേഹം പറഞ്ഞു. പലപ്പോഴും വലിയ പ്രതിസന്ധികളിൽ കോൺഗ്രസിനെ രക്ഷിച്ചത് ഡി.എം.കെയുമായുള്ള സഖ്യമായിരുന്നു. 2014-ന് മുമ്പുള്ള പത്ത് വർഷത്തെ യു.പി.എ സർക്കാർ നിലനിന്നത് തന്നെ പ്രധാനമായും ഡി.എം.കെയുടെ പിന്തുണയിലായിരുന്നുവെന്ന കാര്യവും മോദി ഓർമ്മിപ്പിച്ചു.
വിജയ്യുടെ നേതൃത്വത്തിലുള്ള പുതിയ തമിഴ്നാട് സർക്കാരിൽ പങ്കാളികളാകാനുള്ള കോൺഗ്രസ് നീക്കം തമിഴ് രാഷ്ട്രീയത്തിൽ വലിയ ചർച്ചകൾക്കാണ് വഴിതുറന്നിരിക്കുന്നത്. ഡി.എം.കെയുമായുള്ള ദീർഘകാല ബന്ധം അവസാനിപ്പിച്ചു കൊണ്ടുള്ള ഈ മാറ്റത്തെ ‘രാഷ്ട്രീയ വഞ്ചന’ എന്നാണ് പ്രധാനമന്ത്രി വിശേഷിപ്പിച്ചത്. കോൺഗ്രസ് ഭരണത്തിൽ പങ്കുചേരുന്നത് വിശ്വാസവോട്ടിന് ശേഷം പ്രഖ്യാപിക്കാനിരിക്കെ, മോദിയുടെ ഈ വിമർശനം ദേശീയ തലത്തിലും വലിയ രാഷ്ട്രീയ പ്രത്യാഘാതങ്ങൾ ഉണ്ടാക്കുമെന്നാണ് വിലയിരുത്തപ്പെടുന്നത്.
‘DMK stabbed in the back’; PM slams Congress
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
