സെന്റ് ജോൺസ്: കലണ്ടറിൽ വസന്തകാലം പിറന്ന് ആഴ്ചകൾ പിന്നിട്ടിട്ടും മഞ്ഞിൽ പുതഞ്ഞുതന്നെ കിടക്കുകയാണ് ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യ. ഏപ്രിൽ അവസാന വാരത്തിലും തുടരുന്ന കനത്ത മഞ്ഞുവീഴ്ച ജനജീവിതത്തെ സാരമായി ബാധിച്ചു. ശനിയാഴ്ച പുലർച്ചെയോടെ പെയ്ത കനത്ത മഞ്ഞിൽ സെന്റ് ജോൺസ് നഗരവും പരിസരപ്രദേശങ്ങളും വെള്ള പുതച്ച നിലയിലാണ്. സാധാരണയായി ഇക്കാലയളവിൽ അനുഭവപ്പെടാത്ത അസാധാരണമായ കാലാവസ്ഥാ മാറ്റത്തിനാണ് പ്രദേശം സാക്ഷ്യം വഹിക്കുന്നത്.
കഴിഞ്ഞ ഡിസംബർ മുതൽ കിഴക്കൻ ന്യൂഫൗണ്ട്ലാൻഡിൽ ആരംഭിച്ച ശൈത്യകാലം റെക്കോർഡുകൾ ഭേദിച്ചാണ് മുന്നേറുന്നത്. കഴിഞ്ഞ ഫെബ്രുവരി മാസത്തിൽ മാത്രം 170 സെന്റിമീറ്ററിലധികം മഞ്ഞുവീഴ്ചയാണ് സെന്റ് ജോൺസ് വിമാനത്താവള പരിസരത്ത് രേഖപ്പെടുത്തിയത്. ഇത് ഒരു മാസത്തെ ഏറ്റവും ഉയർന്ന നിരക്കാണ്. മാർച്ച് 20-ന് വസന്തകാലം ഔദ്യോഗികമായി ആരംഭിച്ചെങ്കിലും, ശൈത്യത്തിന്റെ കാഠിന്യത്തിന് കുറവുണ്ടായിട്ടില്ല. ശനിയാഴ്ച മാത്രം ടോർബേ, പാരഡൈസ് തുടങ്ങിയ മേഖലകളിൽ 15 മുതൽ 20 സെന്റിമീറ്റർ വരെ മഞ്ഞുവീഴ്ച രേഖപ്പെടുത്തിയതായി എൻവയോൺമെന്റ് കാനഡ അറിയിച്ചു.
തുടർച്ചയായ മഞ്ഞുവീഴ്ചയും വിമാന സർവീസുകൾ റദ്ദാക്കുന്നതും പ്രാദേശിക ബിസിനസ് മേഖലയെ കടുത്ത പ്രതിസന്ധിയിലാക്കിയിട്ടുണ്ട്. മൗണ്ട് പേൾ കേന്ദ്രീകരിച്ച് പ്രവർത്തിക്കുന്ന ‘മാമസിറ്റാസ് മെക്സിക്കൻ കിച്ചൻ’ ഉടമ ക്ലോഡിയ ഫിംബ്രസ് തന്റെ ദുരനുഭവം പങ്കുവെച്ചു. മഞ്ഞുവീഴ്ചയെത്തുടർന്ന് ഡിസംബർ മുതൽ ഇതുവരെ നാല്പതോളം തവണയാണ് വിമാനത്താവളത്തിലെ കട പൂട്ടേണ്ടി വന്നത്. പുറത്തടിയുന്ന മഞ്ഞ് നീക്കം ചെയ്യുന്നതിനായി വലിയ തുക ചെലവാക്കേണ്ടി വരുന്നത് ലാഭവിഹിതത്തെ സാരമായി ബാധിക്കുന്നുണ്ടെന്നും അവർ വ്യക്തമാക്കി. ഒരു മെട്രിക് ടൺ മഞ്ഞ് നീക്കം ചെയ്യാൻ ഏകദേശം 400 ഡോളറോളം (33,000 രൂപയിലധികം) ചിലവുണ്ട്.
കടുത്ത വെല്ലുവിളികൾക്കിടയിലും ഐക്യദാർഢ്യത്തിന്റെ കാഴ്ചകളും സെന്റ് ജോൺസിൽ കാണാം. തന്റെ പ്രദേശത്തെ പ്രായമായവർക്കും ഒറ്റയ്ക്ക് താമസിക്കുന്ന സ്ത്രീകൾക്കുമായി മഞ്ഞ് നീക്കം ചെയ്യുന്ന തിരക്കിലായിരുന്നു ഡെസ് മോർഗൻ എന്ന വയോധികൻ. സ്വന്തം വീടിന് പുറമെ ഏഴോളം അയൽക്കാരുടെ ഡ്രൈവ് വേകളിലെ മഞ്ഞ് അദ്ദേഹം തന്റെ സ്നോ ബ്ലോവർ ഉപയോഗിച്ച് നീക്കം ചെയ്തു. “കഴിഞ്ഞ കുറച്ചു വർഷങ്ങളേക്കാൾ കാഠിന്യമേറിയ ശൈത്യമാണിത്. എനിക്ക് സഹായിക്കാൻ കഴിയുന്നതുകൊണ്ട് ഞാനിത് ചെയ്യുന്നു,” മോർഗൻ പറയുന്നു. മഞ്ഞുനീക്കം ചെയ്യുന്ന മെഷീനുകളുടെ ശബ്ദമാണ് പക്ഷികളുടെ കളകൂജനത്തേക്കാൾ ഇപ്പോൾ നഗരത്തിൽ മുഴങ്ങുന്നതെന്ന് കാലാവസ്ഥാ നിരീക്ഷകനായ എഡി ഷീർ തമാശരൂപേണ കുറിച്ചു.
ശനിയാഴ്ച രാത്രിയും ഞായറാഴ്ചയും മഴയ്ക്കും മഞ്ഞുവീഴ്ചയ്ക്കും സാധ്യതയുണ്ടെങ്കിലും തിങ്കളാഴ്ചയോടെ താപനില ഉയരുമെന്നാണ് എൻവയോൺമെന്റ് കാനഡയുടെ പ്രവചനം. മഞ്ഞിൽ മുങ്ങിയ ഈ ഏപ്രിൽ അവസാനിക്കുന്നതോടെ പ്രദേശം പൂർണ്ണമായും വസന്തകാലത്തിലേക്ക് കടക്കുമെന്ന പ്രതീക്ഷയിലാണ് ജനങ്ങൾ.
Despite the arrival of spring, Canada continues to 'snow'; Winter breaks record in St. John's
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
