ടൊറന്റോ: കാനഡയിലെ കുടുംബങ്ങളുടെ സാമ്പത്തിക സ്ഥിതിയെ സംബന്ധിച്ച പുതിയ റിപ്പോർട്ടുകൾ പുറത്തുവിട്ട് കനേഡിയൻ പ്രസ്. രാജ്യത്തെ മൊത്തത്തിലുള്ള സാമ്പത്തിക കണക്കുകൾ ഭദ്രമാണെന്ന് തോന്നിപ്പിക്കുമെങ്കിലും സാധാരണക്കാരായ വലിയൊരു വിഭാഗം കടുത്ത കടക്കെണിയിലാണെന്ന് റിപ്പോർട്ട് വ്യക്തമാക്കുന്നു. ജീവിതച്ചെലവ് വർധിച്ചതും തൊഴിലില്ലായ്മയും കാരണം വായ്പാ തിരിച്ചടവ് മുടങ്ങുന്നവരുടെ എണ്ണം കഴിഞ്ഞ ഒരു ദശാബ്ദത്തിനിടയിലെ ഏറ്റവും ഉയർന്ന നിരക്കിലെത്തിയിരിക്കുകയാണ്.
വായ്പാ തിരിച്ചടവിൽ വീഴ്ച വരുത്തുന്നവരുടെ എണ്ണം വർധിക്കുന്നത് രാജ്യത്തെ സാമ്പത്തിക മേഖലയ്ക്ക് വലിയ വെല്ലുവിളിയാണ് ഉയർത്തുന്നത്. ക്രെഡിറ്റ് കാർഡ്, വാഹന വായ്പ, ഇൻസ്റ്റാൾമെന്റ് വായ്പകൾ എന്നിവയുടെ തിരിച്ചടവിലാണ് പ്രധാനമായും പ്രതിസന്ധി ദൃശ്യമാകുന്നത്. 2025-ലെ കണക്കുകൾ പ്രകാരം ഉപഭോക്തൃ പാപ്പരത്ത കേസുകൾ 1,40,457 ആയി ഉയർന്നു. 2009-ന് ശേഷമുള്ള ഏറ്റവും ഉയർന്ന നിരക്കാണിത്. പ്രതിദിനം ശരാശരി 385 പാപ്പരത്ത കേസുകളാണ് കാനഡയിൽ ഇപ്പോൾ റിപ്പോർട്ട് ചെയ്യുന്നത്.
സബ്പ്രൈം വായ്പകൾ നൽകുന്ന സ്ഥാപനങ്ങളുടെ തകർച്ചയും ഈ പ്രതിസന്ധിയുടെ ആഴം വ്യക്തമാക്കുന്നു. പ്രമുഖ വായ്പാ ദാതാക്കളായ ഗോ ഈസി ലിമിറ്റഡ് (Goeasy Ltd.) കഴിഞ്ഞ മാസം മാത്രം 178 മില്യൺ ഡോളറിന്റെ വായ്പകളാണ് എഴുതിത്തള്ളിയത്. ബാങ്ക് ഓഫ് കാനഡ പലിശ നിരക്കുകളിൽ കുറവ് വരുത്തുന്നുണ്ടെങ്കിലും, വീടില്ലാത്തവർക്കും ചെറുകിട വായ്പ എടുത്തവർക്കും ഇതിന്റെ ഗുണം ലഭിക്കുന്നില്ലെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. ഒന്റാരിയോ, ബ്രിട്ടീഷ് കൊളംബിയ തുടങ്ങിയ മേഖലകളിലാണ് സാമ്പത്തിക സമ്മർദ്ദം ഏറ്റവും കൂടുതൽ പ്രതിഫലിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Credit crisis intensifies in Canada; number of defaulters increases sharply
