കോർണർ ബ്രൂക്ക്: നഗരമധ്യത്തിലെ ജലവിതരണ പൈപ്പുകളുടെ അറ്റകുറ്റപ്പണിക്ക് പിന്നാലെ ഉപഭോക്താക്കൾക്കും ജീവനക്കാർക്കും അസുഖം ബാധിച്ചതായി പരാതി. തുടർന്ന് പ്രമുഖ റെസ്റ്റോറന്റായ ‘പാർക്ക് വെസ്റ്റ്’ പ്രവർത്തനം താത്കാലികമായി നിർത്തിവെച്ചു. ഡിസംബർ 27-ന് നടന്ന അറ്റകുറ്റപ്പണിക്കു ശേഷം വെള്ളം തിളപ്പിച്ചുപയോഗിക്കാനുള്ള (ബോയിൽ വാട്ടർ അഡ്വൈസറി) നിർദേശം നൽകാൻ നഗരസഭ വൈകിയതാണ് പ്രതിഷേധത്തിന് കാരണമായത്.
കൊമേഴ്ഷ്യൽ സ്ട്രീറ്റ് പരിസരത്തെ ജലവിതരണ പൈപ്പിലെ തകരാർ ഡിസംബർ 27-നാണ് നഗരസഭ പരിഹരിച്ചത്. എന്നാൽ, സാധാരണയായി അറ്റകുറ്റപ്പണികൾക്ക് പിന്നാലെ നൽകാറുള്ള ജാഗ്രതാ നിർദേശം ഒരാഴ്ച വൈകി ജനുവരി 3-നാണ് പുറപ്പെടുവിച്ചത്. 13, 20 കൊമേഴ്ഷ്യൽ സ്ട്രീറ്റ്, 18 പാർക്ക് സ്ട്രീറ്റ് എന്നീ വിലാസങ്ങളിലുള്ള കെട്ടിടങ്ങൾക്കാണ് ഈ നിർദേശം ബാധകമായിരുന്നത്. ഇതിനു പിന്നാലെയാണ് 18 പാർക്ക് സ്ട്രീറ്റിൽ പ്രവർത്തിക്കുന്ന പാർക്ക് വെസ്റ്റ് റെസ്റ്റോറന്റ് സ്വമേധയാ അടച്ചിടാൻ തീരുമാനിച്ചത്.
അറ്റകുറ്റപ്പണി നടന്ന കാലയളവിൽ റെസ്റ്റോറന്റിലെത്തിയ ആളുകൾക്കും ജീവനക്കാർക്കും ശാരീരിക അസ്വസ്ഥതകൾ ഉണ്ടായതായി റെസ്റ്റോറന്റ് അധികൃതർ ഫേസ്ബുക്കിലൂടെ അറിയിച്ചു. പൊതുജനാരോഗ്യത്തിനാണ് തങ്ങൾ മുൻഗണന നൽകുന്നതെന്നും, ജലപരിശോധനാ ഫലങ്ങൾ അനുകൂലമാകുന്നത് വരെ റെസ്റ്റോറന്റ് തുറക്കില്ലെന്നും ഉടമ ആദം ബിഷപ്പ് വ്യക്തമാക്കി. നഗരസഭയുടെ അറിയിപ്പ് ലഭിക്കുന്നതിന് മുൻപുതന്നെ അസുഖങ്ങൾ റിപ്പോർട്ട് ചെയ്യപ്പെട്ടത് പ്രദേശവാസികൾക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്.
വിഷയത്തിൽ തിങ്കളാഴ്ച നഗരസഭ ഔദ്യോഗിക വിശദീകരണം നൽകിയിരുന്നു. ഡിസംബർ 27-ന് നടത്തിയത് ചെറിയ അറ്റകുറ്റപ്പണിയായതിനാൽ പ്രവിശ്യാ മാർഗനിർദേശങ്ങൾ പ്രകാരം ജാഗ്രതാ നിർദേശം നൽകേണ്ട സാഹചര്യം അന്നുണ്ടായിരുന്നില്ലെന്ന് നഗരസഭ അറിയിച്ചു. എന്നാൽ, അസുഖങ്ങൾ റിപ്പോർട്ട് ചെയ്തതായുള്ള ഒരു പരാതി ലഭിച്ചതിനെത്തുടർന്ന് ജനുവരി 3-ന് മുൻകരുതൽ എന്ന നിലയിലാണ് ബോയിൽ വാട്ടർ അഡ്വൈസറി പുറപ്പെടുവിച്ചതെന്നും അധികൃതർ വ്യക്തമാക്കി.
ജനുവരി 5-ന് ശേഖരിച്ച വെള്ളത്തിന്റെ സാമ്പിളുകളുടെ പരിശോധനാ ഫലം ചൊവ്വാഴ്ച പുറത്തുവന്നു. കുടിവെള്ളത്തിൽ അപകടകരമായ ബാക്ടീരിയകളോ മറ്റ് മാലിന്യങ്ങളോ ഇല്ലെന്നും വെള്ളം പൂർണ്ണമായും സുരക്ഷിതമാണെന്നുമാണ് ലാബ് റിപ്പോർട്ടുകൾ സൂചിപ്പിക്കുന്നത്. ഇതിന്റെ അടിസ്ഥാനത്തിൽ നിലവിലുണ്ടായിരുന്ന ജാഗ്രതാ നിർദേശം നഗരസഭ പിൻവലിച്ചു. ജലശുദ്ധീകരണ പ്ലാന്റിലും വിതരണ ശൃംഖലയിലും കൃത്യമായ ഇടവേളകളിൽ പരിശോധനകൾ നടക്കുന്നുണ്ടെന്നും ജലസുരക്ഷ ഉറപ്പാണെന്നും നഗരസഭ കൂട്ടിച്ചേർത്തു.
പരിശോധനാ ഫലങ്ങൾ തൃപ്തികരമാണെങ്കിലും, റെസ്റ്റോറന്റ് തുറക്കുന്ന കാര്യത്തിൽ ഉടമകൾ ഇതുവരെ അന്തിമ തീരുമാനമെടുത്തിട്ടില്ല. അതേസമയം, റിപ്പോർട്ട് ചെയ്യപ്പെട്ട അസുഖങ്ങളുടെ യഥാർത്ഥ കാരണം കണ്ടെത്താൻ ആരോഗ്യവകുപ്പ് അന്വേഷണം നടത്തുന്നുണ്ടോ എന്ന കാര്യത്തിൽ വ്യക്തത വന്നിട്ടില്ല. നിലവിൽ ജലവിതരണം സാധാരണ നിലയിലായെങ്കിലും, നഗരസഭയുടെ നടപടികളിലെ കാലതാമസം സംബന്ധിച്ച വിമർശനം നിലനിൽക്കുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Health problem after renovation: Corner Brook continues to raise concerns about drinking water safety
