നോവ സ്കോഷ്യ (Nova Scotia): നോവ സ്കോഷ്യയിൽ പെട്രോൾ, ഡീസൽ വിലയിൽ തുടർച്ചയായി ഉണ്ടാകുന്ന വൻ വർധനവിൽ പ്രതിഷേധിച്ച് ഉപഭോക്തൃ സംഘടനകൾ രംഗത്ത്. പ്രവിശ്യയിലെ ഇന്ധനനികുതി (Gas Tax) താത്കാലികമായി നിർത്തലാക്കി ജനങ്ങൾക്ക് ആശ്വാസം നൽകണമെന്ന് കനേഡിയൻ ടാക്സ്പേയേഴ്സ് ഫെഡറേഷൻ അധികൃതരോട് ആവശ്യപ്പെട്ടു. കാനഡ ഡേയ്ക്ക് ശേഷം ഇവിടെ ഇന്ധനവിലയിൽ 12 തവണയോളമാണ് മാറ്റങ്ങൾ വരുത്തിയത്. ഇത് ജനങ്ങളുടെ നിത്യജീവിതത്തെയും പ്രതിമാസ ബജറ്റിനെയും ബാധിച്ചിട്ടുണ്ടെന്ന് സംഘടനകൾ ചൂണ്ടിക്കാണിക്കുന്നു.
ഹാലിഫാക്സിൽ നിലവിൽ പെട്രോൾ വില ലിറ്ററിന് 168.9 സെൻ്റ് മുതൽ 192.6 സെൻ്റ് വരെ ഉയർന്ന അവസ്ഥയിലാണ്. ഡീസൽ വിലയാകട്ടെ ലിറ്ററിന് 238.6 സെൻ്റിൽ നിന്ന് ഉയർന്ന നിരക്കായ 241.5 സെൻ്റിലേക്ക് വരെ എത്തിനിൽക്കുന്നു. ഡീസൽ വില വർധിക്കുന്നത് ചരക്കുനീക്കത്തെ പ്രതികൂലമായി ബാധിക്കുമെന്നും, സൂപ്പർമാർക്കറ്റുകളിലും കടകളിലും എത്തുന്ന അവശ്യസാധനങ്ങളുടെ വില കുത്തനെ കൂട്ടാൻ ഇത് കാരണമാകുമെന്നും ഫെഡറേഷൻ ഫെഡറൽ ഡയറക്ടർ ഫ്രാങ്കോ തെറാസാനോ വ്യക്തമാക്കി.
ഈ സാഹചര്യത്തിൽ നോവ സ്കോഷ്യ പ്രീമിയർ ടിം ഹൂസ്റ്റൺ ഉൾപ്പെടെയുള്ള പ്രവിശ്യാ നേതാക്കൾ ഉടനടി ഇടപെട്ട് പ്രവിശ്യാ ഇന്ധനനികുതിയിൽ ഇളവുകൾ പ്രഖ്യാപിക്കണമെന്ന് കനേഡിയൻ ടാക്സ്പേയേഴ്സ് ഫെഡറേഷൻ ആവശ്യപ്പെട്ടു. ഏപ്രിൽ മാസത്തിൽ ഫെഡറൽ സർക്കാർ പ്രഖ്യാപിച്ച താത്കാലിക ഇന്ധനനികുതി ഇളവ് സെപ്റ്റംബർ 8-ന് അവസാനിക്കാനിരിക്കെ, ആശ്വാസനടപടികൾ ഇനിയും ദീർഘിപ്പിക്കണമെന്ന ആവശ്യവും ശക്തമായിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
