കാലാവസ്ഥാ വ്യതിയാനം കാനഡയുടെ ആരോഗ്യമേഖലയിൽ പുതിയ വെല്ലുവിളികൾ ഉയർത്തുന്നതായി റിപ്പോർട്ട്. വർധിച്ചുവരുന്ന താപനില ടിക് കീടങ്ങളുടെ വ്യാപനത്തിനും അതുവഴി അവ പരത്തുന്ന രോഗങ്ങൾക്കും അനുകൂലമായ സാഹചര്യമൊരുക്കുന്നു. ഇത് രാജ്യത്തുടനീളം ടിക് രോഗങ്ങളുടെ എണ്ണത്തിൽ ഗണ്യമായ വർധനവിന് കാരണമാവുകയാണ്.
ഒന്റാറിയോ, ക്യുബെക്ക്, നോവ സ്കോഷ്യ തുടങ്ങിയ കിഴക്കൻ പ്രവിശ്യകളിൽ സാധാരണയായി കണ്ടുവന്നിരുന്ന കറുത്ത കാലുള്ള ടിക്കുകൾ (blacklegged ticks) ഇപ്പോൾ ഒട്ടാവ, മാനിറ്റോബ, ആൽബെർട്ട തുടങ്ങിയ പടിഞ്ഞാറൻ പ്രദേശങ്ങളിലേക്കും വ്യാപിക്കുന്നതായി പഠനങ്ങൾ സൂചിപ്പിക്കുന്നു. ഇത് ലൈം രോഗ കേസുകൾ കൂടാനും കാരണമാകുന്നുണ്ട്. 2009-ൽ കേവലം 144 ലൈം രോഗ കേസുകൾ റിപ്പോർട്ട് ചെയ്തിടത്ത്, 2024-ലെ പ്രാഥമിക കണക്കുകൾ പ്രകാരം ഇത് 5,239 കേസുകളാണ് റിപ്പോർട്ട് ചെയ്തത്. അടുത്ത 25 വർഷത്തിനുള്ളിൽ ഈ എണ്ണം അഞ്ച് ലക്ഷം വരെയാകുമെന്നാണ് ആരോഗ്യ വിദഗ്ധർ മുന്നറിയിപ്പ് നൽകുന്നത്. പനി, ക്ഷീണം, തലവേദന, കഠിനമായ പേശിവേദന എന്നിവയാണ് ലൈം രോഗത്തിന്റെ പ്രധാന ലക്ഷണങ്ങൾ. ചിലരിൽ “ബുൾസ് ഐ” എന്ന് വിശേഷിപ്പിക്കുന്ന പ്രത്യേകതരം ചുവന്ന പാടുകൾ കാണാമെങ്കിലും, ഏകദേശം 30% രോഗികളിൽ ഇത്തരം പാടുകൾ ഉണ്ടാകാറില്ല.
ലൈം രോഗം കൂടാതെ, അനാപ്ലാസ്മോസിസ് (Anaplasmosis), ബേബിസിയോസിസ് (Babesiosis), പൊവസാൻ വൈറസ് (Powassan virus) തുടങ്ങിയ മാരകമായ രോഗങ്ങളും ടിക്കുകൾ വഴി പകരുന്നുണ്ട്. പനി, വയറുവേദന, ഛർദ്ദി എന്നിവയാണ് അനാപ്ലാസ്മോസിസിന്റെ പ്രധാന ലക്ഷണങ്ങൾ. 2023-ൽ 700-ലധികം അനാപ്ലാസ്മോസിസ് കേസുകൾ കാനഡയിൽ റിപ്പോർട്ട് ചെയ്യപ്പെടുന്നുണ്ട്. ബേബിസിയോസിസ് ഗുരുതരമായ രക്തക്കുറവിന് (അനീമിയ) കാരണമാകുമ്പോൾ, പൊവസാൻ വൈറസ് തലച്ചോറിലെ വീക്കത്തിനും മെനിഞ്ചൈറ്റിസിനും സാധ്യത വർദ്ധിപ്പിക്കുന്നു. ഈ വൈറസ് കേവലം 15 മിനിറ്റിനുള്ളിൽ പോലും മനുഷ്യരിലേക്ക് പകരാൻ സാധ്യതയുണ്ടെന്നത് ഇതിനെ കൂടുതൽ അപകടകരമാക്കുന്നു. ലൈം രോഗത്തിനും അനാപ്ലാസ്മോസിസിനും ഡോക്സിസൈക്ലിൻ പോലുള്ള ആൻ്റിബയോട്ടിക്കുകൾ ഫലപ്രദമാണെങ്കിലും, പൊവസാൻ വൈറസ് അണുബാധയ്ക്ക് നിലവിൽ പ്രത്യേക ചികിത്സ ലഭ്യമല്ല. രോഗലക്ഷണങ്ങളെ കുറയ്ക്കുന്നതിനുള്ള സഹായ പരിചരണം മാത്രമാണ് നൽകുന്നത്.
ചെറുതും വലുതുമായ ടിക്കുകളെ വനങ്ങൾ, കുറ്റിക്കാടുകൾ, നഗരപ്രാന്തപ്രദേശങ്ങൾ എന്നിവിടങ്ങളിൽ ധാരാളമായി കാണാം. അണ്ണാൻ, ചെറിയ മൃഗങ്ങൾ, വെള്ളവാലൻ മാനുകൾ തുടങ്ങിയവയാണ് ഈ ടിക്കുകളുടെ പ്രധാന ആതിഥേയർ. പക്ഷികളുടെയും മൃഗങ്ങളുടെയും സഞ്ചാരമാണ് ടിക്കുകൾ പുതിയ പ്രദേശങ്ങളിലേക്ക് വ്യാപിക്കുന്നതിനുള്ള പ്രധാന കാരണം. ടിക്കുകൾ മൂലമുള്ള അണുബാധ ഒഴിവാക്കാൻ ചില മുൻകരുതലുകൾ സ്വീകരിക്കുന്നത് ഉചിതമാണ്.
പുറത്ത് പോകുമ്പോൾ ശരീരം പൂർണ്ണമായി മറയ്ക്കുന്ന നീണ്ട വസ്ത്രങ്ങൾ ധരിക്കുക, ഇളം നിറമുള്ള വസ്ത്രങ്ങൾ തിരഞ്ഞെടുക്കുക, DEET അടങ്ങിയ ഷവർമ ഉപയോഗിക്കുക, കാട്ടുപാതകളിലൂടെയും കുറ്റിക്കാടുകളിലൂടെയും നടക്കുന്നത് ഒഴിവാക്കുക. പുറത്തുനിന്ന് വന്ന ശേഷം കുളിക്കുകയും ശരീരം മുഴുവൻ ടിക്കുകളുണ്ടോയെന്ന് സൂക്ഷ്മമായി പരിശോധിക്കുകയും വേണം. വസ്ത്രങ്ങൾ ചൂടുവെള്ളത്തിൽ കഴുകി ഉണക്കുന്നത് ടിക്കുകളെ നശിപ്പിക്കാൻ സഹായിക്കും. ശരീരത്തിൽ ടിക്ക് കണ്ടെത്തിയാൽ, ട്വീസറുകൾ ഉപയോഗിച്ച് ശ്രദ്ധാപൂർവ്വം നീക്കം ചെയ്യുക.
ടിക്ക് നീക്കം ചെയ്ത ശേഷം etick.ca എന്ന വെബ്സൈറ്റിൽ അതിന്റെ ചിത്രം അപ്പ്ലോഡ് ചെയ്ത് വിവരങ്ങൾ നൽകാവുന്നതാണ്. ടിക് കടിയേറ്റതിന് ശേഷം പനി, ക്ഷീണം തുടങ്ങിയ ഏതെങ്കിലും ലക്ഷണങ്ങൾ ശ്രദ്ധയിൽപ്പെട്ടാൽ ഉടൻതന്നെ വൈദ്യസഹായം തേടേണ്ടതാണ്. പൊവസാൻ വൈറസ് അപകടകരമാണെങ്കിലും, ഈ വൈറസ് ബാധിച്ച ടിക്കുകളുടെ എണ്ണം വളരെ കുറവാണെന്നത് ആശ്വാസകരമാണ്.
