വാഷിംഗ്ടൺ: വ്യാജ ഐഡന്റിറ്റി കാർഡ് ഉപയോഗിച്ച് പൈലറ്റാണെന്ന് നടിച്ച് സൗജന്യമായി നൂറുകണക്കിന് വിമാനയാത്രകൾ നടത്തിയ മുൻ ഫ്ലൈറ്റ് അറ്റൻഡന്റ് അമേരിക്കയിൽ പിടിയിലായി. ടൊറന്റോ സ്വദേശിയായ ഡാലസ് പോകോർണിക് (34) എന്നയാളാണ് സാമ്പത്തിക തട്ടിപ്പ് കേസുകളിൽ കുറ്റസമ്മതം നടത്തിയത്. പനാമയിൽ വച്ച് അറസ്റ്റിലായ ഇയാളെ പിന്നീട് കൂടുതൽ നിയമനടപടികൾക്കായി ഹവായ്യിലേക്ക് നാടുകടത്തുകയായിരുന്നു. യു.എസ് അറ്റോർണി ഓഫീസാണ് വാർത്താക്കുറിപ്പിലൂടെ വിവരങ്ങൾ പുറത്തുവിട്ടത്.
2020 ജനുവരി മുതൽ 2024 ഒക്ടോബർ വരെ നീണ്ട നാല് വർഷക്കാലയളവിലാണ് ഇയാൾ വൻ തട്ടിപ്പ് നടത്തിയത്. വ്യാജ ഐഡി കാർഡ് ഉപയോഗിച്ച് മൂന്ന് പ്രമുഖ അമേരിക്കൻ എയർലൈനുകളിലാണ് ഇയാൾ പൈലറ്റാണെന്ന വ്യാജേന സൗജന്യമായി യാത്ര ചെയ്തത്. കാനഡയിലെ ടൊറന്റോ ആസ്ഥാനമായുള്ള ഒരു എയർലൈനിൽ 2017 മുതൽ 2019 വരെ ഫ്ലൈറ്റ് അറ്റൻഡന്റായി ഡാലസ് ജോലി ചെയ്തിരുന്നു.
വ്യോമയാന മേഖലയിലെ സുരക്ഷാ മാനദണ്ഡങ്ങൾ ലംഘിക്കുന്നവർക്കെതിരെ കടുത്ത നടപടി ഉണ്ടാകുമെന്നും ഇയാളെ പിടികൂടാൻ സഹായിച്ച അന്വേഷണ സംഘത്തിന് നന്ദി അറിയിക്കുന്നതായും യു.എസ് അറ്റോർണി കെൻ സോറെൻസൺ പറഞ്ഞു. ശിക്ഷാനടപടികളുടെ ഭാഗമായി തട്ടിപ്പിനിരയായ മൂന്ന് എയർലൈൻ കമ്പനികൾക്കും നഷ്ടപരിഹാരം നൽകാൻ പ്രതി സമ്മതിച്ചിട്ടുണ്ട്. സംഭവത്തിൽ വിശദമായ അന്വേഷണം തുടരുകയാണ്.
Free flights by impersonating a pilot: Former Canadian flight attendant arrested in the US.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
