ടൊറന്റോ: നഗരത്തിൽ വർദ്ധിച്ചുവരുന്ന വാടക നിരക്കുകൾക്കും ഭവന പ്രതിസന്ധിക്കും പരിഹാരമായി 2.7 ബില്യൺ കനേഡിയൻ ഡോളറിന്റെ വൻകിട ഭവന പദ്ധതി പ്രഖ്യാപിച്ച് കനേഡിയൻ പ്രധാനമന്ത്രി മാർക്ക് കാർണി. അടുത്ത മൂന്ന് വർഷത്തിനുള്ളിൽ നടപ്പിലാക്കുന്ന ഈ പങ്കാളിത്ത പദ്ധതിയിലൂടെ 18-ലധികം പ്രൊജക്റ്റുകളിലായി 5,600 പുതിയ വാടക വീടുകളാണ് ടൊറന്റോയിൽ നിർമ്മിക്കുന്നത്. ഇതിൽ 1,800 വീടുകൾ സാധാരണക്കാർക്ക് താങ്ങാനാവുന്ന നിരക്കിലും വാടക നിയന്ത്രണങ്ങളോടെയുമാണ് ലഭ്യമാക്കുന്നത്. മൊത്തം വീടുകളുടെ 80 ശതമാനത്തോളം വരുന്ന 4,500 വീടുകളുടെ നിർമ്മാണം ഈ വർഷാവസാനത്തോടെ തന്നെ ആരംഭിക്കും.
പാർക്ക്ഡേൽ, സ്കാർബറോയിലെ 158 ബോറോ ഡ്രൈവ് തുടങ്ങിയ വാടക വർദ്ധനവും ഒഴിപ്പിക്കലും രൂക്ഷമായ പ്രദേശങ്ങളിലാണ് ഈ പദ്ധതികൾ പ്രധാനമായും കേന്ദ്രീകരിക്കുന്നത്. ടൊറന്റോയിൽ ജോലി ചെയ്യുന്ന ഏതൊരാൾക്കും ഇവിടെ ജീവിക്കാനുള്ള സാഹചര്യം ഉണ്ടാകണമെന്ന് പ്രഖ്യാപന വേളയിൽ മേയർ ഒലീവിയ ചൗ വ്യക്തമാക്കി.
ഈ ഭവന പദ്ധതി പ്രധാനമായും രണ്ടു വിഭാഗങ്ങളിലായാണ് നടപ്പിലാക്കുന്നത്. ഒന്നാമതായി, ‘ബിൽഡ് കാനഡ ഹോംസ്’ വഴി നഗരസഭയുടെ ഭൂമിയിൽ ലാഭച്ഛേച്ഛയില്ലാതെ നടപ്പിലാക്കുന്ന വിഭാഗത്തിൽ 310 മില്യൺ ഡോളറിലധികം ചെലവഴിച്ച് 9 പ്രൊജക്റ്റുകളിലായി 1,900 വീടുകൾ നിർമ്മിക്കും. ഇതിനായി ടൊറന്റോ നഗരസഭ 530 മില്യൺ ഡോളറിന്റെ പങ്കാളിത്തവും 99 വർഷത്തെ സ്വത്ത് നികുതി ഇളവും പ്രഖ്യാപിച്ചിട്ടുണ്ട്. രണ്ടാമതായി, സ്വകാര്യ മേഖല നിർമ്മിച്ച് സർക്കാർ ആകർഷകമായ സാമ്പത്തിക സഹായം നൽകുന്ന വിഭാഗത്തിലൂടെ 1.8 ബില്യൺ ഡോളർ ഫണ്ടിംഗിൽ 3,700 പുതിയ വീടുകൾ നിർമ്മിക്കും. ഇതോടൊപ്പം 15 ഡെനിസൺ അവന്യൂവിലെ തദ്ദേശീയ സമുദായങ്ങളുടെ നേതൃത്വത്തിലുള്ള 100 വീടുകളുടെ നിർമ്മാണവും പരിസ്ഥിതി സൗഹൃദപരമായ തടി, ജിയോതെർമൽ ഊർജ്ജം എന്നിവ ഉപയോഗിച്ചുള്ള പദ്ധതികളും ഇതിൽ ഉൾപ്പെടുന്നു.
അതേസമയം, പ്രഖ്യാപനത്തെ വിമർശിച്ച് പ്രതിപക്ഷ കൺസർവേറ്റീവ് എം.പി സ്കോട്ട് എച്ചിസൺ രംഗത്തെത്തി. മുൻപ് പ്രഖ്യാപിച്ചതോ നിലവിൽ നിർമ്മാണം നടക്കുന്നതോ ആയ പദ്ധതികൾ പുതിയ പാക്കേജിലാക്കി വീണ്ടും അവതരിപ്പിക്കുക മാത്രമാണ് സർക്കാർ ചെയ്തതെന്നും, ഇത് നിലവിലെ ഭവനക്ഷാമത്തിന് ശാശ്വത പരിഹാരമാകില്ലെന്നും അദ്ദേഹം ആരോപിച്ചു.
Housing revolution in Toronto! Mark Carney unveils $2.7 billion plan.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
