ടൊറന്റോ: വടക്കേ അമേരിക്കൻ രാജ്യങ്ങളിൽ പകർച്ചവ്യാധികൾ പരത്തുന്ന ചെള്ളുകളുടെ (Ticks) എണ്ണത്തിൽ വൻ വർദ്ധനവ May ഉള്ളതായി റിപ്പോർട്ടുകൾ. കാനഡയിലും അമേരിക്കയുടെ വിവിധ ഭാഗങ്ങളിലും ഇവയുടെ സാന്നിധ്യം അതിവേഗം ഉയരുന്നത് നിലവിൽ വലിയ പൊതുജനാരോഗ്യ ആശങ്കയായി മാറിയിരിക്കുകയാണ്. ന്യൂയോർക്കിലെ ബിംഗ്ഹാംടൺ സർവ്വകലാശാലയിലെ ഗവേഷകനായ മൈക്കൽ സ്റ്റാസ്റ്റ്നി, കേവലം ഒരു മണിക്കൂറിനുള്ളിൽ ഒരു പ്രദേശത്തുനിന്ന് മാത്രം പതിമൂന്നോളം ചെള്ളുകളെ കണ്ടെത്തിയ വിവരം സമൂഹമാധ്യമങ്ങളിലൂടെ പങ്കുവെച്ചതോടെയാണ് ഈ വിഷയം വീണ്ടും ചർച്ചയായത്. വടക്കുകിഴക്കൻ അമേരിക്കൻ സംസ്ഥാനങ്ങളിലും കാനഡയിലും ചെള്ളുകൾ വഴിയുണ്ടാകുന്ന ലൈം രോഗബാധിതരുടെ എണ്ണം മുൻവർഷങ്ങളെ അപേക്ഷിച്ച് കുത്തനെ ഉയർന്നതായാണ് ആരോഗ്യവകുപ്പിന്റെ കണക്കുകൾ വ്യക്തമാക്കുന്നത്.
പബ്ലിക് ഹെൽത്ത് ഏജൻസി ഓഫ് കാനഡ (PHAC) പുറത്തുവിട്ട ഏറ്റവും പുതിയ സ്ഥിതിവിവരക്കണക്കുകൾ പ്രകാരം 2025-ൽ മാത്രം കാനഡയിൽ 7,105 ലൈം രോഗബാധകളാണ് സ്ഥിരീകരിച്ചത്. 2024-ൽ ഇത് 5,809-ഉം, 2023-ൽ 4,785-ഉം ആയിരുന്നു. കാനഡയിൽ ദേശീയതലത്തിൽ ലൈം രോഗബാധയുടെ വിവരങ്ങൾ ശേഖരിക്കാൻ ആരംഭിച്ച 2009-ന് ശേഷമുള്ള ഏറ്റവും ഉയർന്ന നിരക്കാണിത്. ഒരു പതിറ്റാണ്ട് മുൻപ് രാജ്യത്ത് വിരലിലെണ്ണക്കാവുന്ന കേസുകൾ മാത്രമാണ് റിപ്പോർട്ട് ചെയ്തിരുന്നതെന്നും, എന്നാൽ നിലവിലെ വർദ്ധനവ് ആശങ്കാജനകമായ രീതിയിൽ കുതിച്ചുയരുകയാണെന്നും മക്ഗിൽ സർവ്വകലാശാലയിലെ ബയോളജിസ്റ്റ് വിർജീനി മില്ല്യൻ ചൂണ്ടിക്കാണിക്കുന്നു.
ആഗോളതാപനവും കാലാവസ്ഥാ വ്യതിയാനവുമാണ് ചെള്ളുകൾ വടക്കൻ മേഖലകളിലേക്ക് വ്യാപിക്കുന്നതിനുള്ള പ്രധാന കാരണമായി ശാസ്ത്രജ്ഞർ വിലയിരുത്തുന്നത്. കാനഡയിൽ അമേരിക്കൻ അതിർത്തിയോട് ചേർന്നുള്ള പ്രദേശങ്ങൾ, പ്രധാന ജനവാസ മേഖലകൾ, നഗരങ്ങളിലെ പാർക്കുകൾ എന്നിവിടങ്ങളിലാണ് നിലവിൽ രോഗസാധ്യത കൂടുതൽ. കാലാവസ്ഥയിലുണ്ടാകുന്ന മാറ്റങ്ങൾ കാരണം ഈ വർഷം കാനഡയിൽ സാധാരണയേക്കാൾ ഒരു മാസം മുൻപേ, അതായത് ഫെബ്രുവരി പകുതിയോടെ തന്നെ ചെള്ളുകളുടെ ശല്യം ആരംഭിച്ചതായി മൃഗഡോക്ടർമാർ സാക്ഷ്യപ്പെടുത്തുന്നു. ഒന്റാറിയോ, നോവ സ്കോഷ്യ, ക്യൂബെക്ക് എന്നീ പ്രവിശ്യകളിലാണ് ഏറ്റവും കൂടുതൽ കേസുകൾ റിപ്പോർട്ട് ചെയ്തിട്ടുള്ളത്.
കാനഡയിൽ മാത്രം നാൽപ്പതിലധികം വ്യത്യസ്ത തരം ചെള്ളുകളെ കണ്ടെത്തിയിട്ടുണ്ട്. ഇവ കേവലം ലൈം രോഗം മാത്രമല്ല, ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്ന ‘റോക്കി മൗണ്ടൻ സ്പോട്ടഡ് ഫിവർ’ പോലുള്ള മറ്റ് ബാക്ടീരിയൽ, വൈറസ് രോഗബാധകൾക്കും കാരണമാകുന്നുണ്ട്. ചെള്ളുകളുടെ സാന്നിധ്യമുള്ള വനപ്രദേശങ്ങളിലോ പുൽമേടുകളിലോ പോകുന്നവർ പൂർണ്ണമായും ശരീരം മറയ്ക്കുന്ന നീളമുള്ള വസ്ത്രങ്ങൾ ധരിക്കണമെന്നും, ബൂട്സുകൾക്കുള്ളിലേക്ക് പാൻ്റ്സ് തിരുകിവെക്കുന്നതും ഇളം നിറത്തിലുള്ള വസ്ത്രങ്ങൾ ധരിക്കുന്നതും ഇവയെ എളുപ്പം തിരിച്ചറിയാൻ സഹായിക്കുമെന്നും ആരോഗ്യ വിദഗ്ദ്ധർ നിർദ്ദേശിക്കുന്നു. കടിയേറ്റ ഭാഗത്ത് ചുവപ്പ് നിറമോ, പനിയോ തണുപ്പോ അനുഭവപ്പെടുകയാണെങ്കിൽ ഉടൻ തന്നെ ചികിൽസ തേടേണ്ടതാണെന്നും അധികൃതർ മുന്നറിയിപ്പ് നൽകുന്നു.
Climate change is the culprit; Lyme disease is spreading in Canada
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
