ഷിയാൻ: ചൈനയിലെ ഷാൻഷി പ്രവിശ്യയിലെ ഷിയാൻ നഗരത്തിലുള്ള ലുമിയൈ സിനിമാ തിയേറ്റർ പ്രവൃത്തിദിവസങ്ങളിൽ ഉച്ചയ്ക്ക് വിശ്രമിക്കാനായി ‘ലൈയിങ് ഫ്ലാറ്റ് പ്ലാൻ’ എന്ന പേരിൽ പുതിയ നാപ് സർവീസ് ആരംഭിച്ചു. പകൽസമയത്തെ സിനിമാ ഷോകൾക്ക് ആളുകൾ കുറഞ്ഞ പശ്ചാത്തലത്തിലാണ് തിയേറ്റർ അധികൃതർ ഹാൾ ഉച്ചയുറക്കത്തിനായി തുറന്നുനൽകാൻ തീരുമാനിച്ചത്. പ്രവൃത്തിദിവസങ്ങളിൽ ഉച്ചയ്ക്ക് 12 മുതൽ 2.30 വരെ ലഭ്യമാകുന്ന ഈ സേവനം ഓഫീസുകളിൽ ജോലി ചെയ്യുന്നവർക്കും യാത്രക്കാർക്കും കുറഞ്ഞ ചെലവിൽ വിശ്രമിക്കാൻ സൗകര്യമൊരുക്കുന്നു.
കുറഞ്ഞ നിരക്കിൽ സൗകര്യങ്ങളും നിയന്ത്രണങ്ങളും
രണ്ട് ഹാളുകളിലായി പൂർണമായി ചരിക്കാവുന്ന 76 റിക്ലൈനർ സീറ്റുകളാണ് ഇതിനായി ഒരുക്കിയിട്ടുള്ളത്. പ്രതിമാസ പാസിന് ഒരാൾക്ക് 39.9 യുവാന് (ചൈനീസ് കറൻസി) പുറമെ രണ്ട് പേർക്ക് ഉപയോഗിക്കാവുന്ന പാസിന് 59.9 യുവാനുമാണ് ഈടാക്കുന്നത്. വിശ്രമിക്കുന്നവർക്ക് സൗജന്യമായി പുതപ്പും കാപ്പിയും നൽകുന്നുണ്ട്. ഇയർപ്ലഗ്, ഐ മാസ്ക് എന്നിവയ്ക്ക് അധിക നിരക്ക് ഈടാക്കും. തിയേറ്ററിനുള്ളിൽ മൊബൈൽ ഫോണുകൾ സൈലന്റ് മോഡിൽ വയ്ക്കണമെന്നും സംസാരിക്കണമെങ്കിൽ പുറത്തുപോകണമെന്നും ചെരിപ്പ് അഴിക്കാൻ പാടില്ലെന്നും കൃത്യമായ നിർദേശങ്ങളുണ്ട്.
Also Read: ഇന്ത്യൻ രുചിയിൽ വീണ് വിദേശി: ‘കഴിച്ചപ്പോൾ സ്വർഗവാതിൽ തുറന്നപോലെ’; വൈറലായി വീഡിയോ
നല്ല പ്രതികരണവും ഭാവി സാധ്യതകളും
ആഴ്ചയിലെ പകൽ സമയങ്ങളിൽ സീറ്റുകൾ ഒഴിഞ്ഞുകിടക്കുന്ന പ്രതിസന്ധി മറികടക്കാൻ ആരംഭിച്ച ഈ പദ്ധതിക്ക് നിലവിൽ നല്ല പ്രതികരണമാണ് ലഭിക്കുന്നത്. ലഭ്യമായ സീറ്റുകളിൽ പകുതിയിലേറെയും ദിവസവും ആളുകൾ ഉപയോഗിക്കുന്നുണ്ടെന്ന് തിയേറ്റർ മാനേജർ അറിയിച്ചു. ചൈനയിൽ ഉച്ചയുറക്കം ദൈനംദിന ജീവിതത്തിന്റെ ഭാഗമായതിനാൽ, ജോലിസ്ഥലത്തെ അസ്വസ്ഥതകൾ ഒഴിവാക്കി തിയേറ്ററിലെ ശാന്തമായ അന്തരീക്ഷത്തിൽ വിശ്രമിക്കാൻ സാധിക്കുന്നത് ഉപഭോക്താക്കൾക്ക് ഏറെ പ്രയോജനകരമാകുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
Now you can go to the cinema to sleep! A multiplex in China has introduced a new scheme for afternoon naps.
