ഒന്റാരിയോ: ഒന്റാരിയോയിലെ അധ്യാപക പരിശീലന പ്രോഗ്രാമുകളുടെ കാലാവധി പകുതിയോളം കുറയ്ക്കാൻ പ്രൊവിൻഷ്യൽ സർക്കാർ തീരുമാനിച്ചു. വെള്ളിയാഴ്ച ഉച്ചയ്ക്ക് നടത്തിയ വാർത്താ സമ്മേളനത്തിൽ വിദ്യാഭ്യാസ മന്ത്രി പോൾ കലന്ദ്ര, കോളേജ്-യൂണിവേഴ്സിറ്റി മന്ത്രി നോളൻ ക്വിൻ എന്നിവരാണ് ഇക്കാര്യം അറിയിച്ചത്. പ്രവിശ്യയിൽ വർദ്ധിച്ചുവരുന്ന അധ്യാപക ക്ഷാമം പരിഹരിക്കാനാണ് ഈ നീക്കമെന്ന് മന്ത്രിമാർ വ്യക്തമാക്കി. അടുത്ത ആഴ്ച അവതരിപ്പിക്കുന്ന പുതിയ നിയമനിർമ്മാണ പ്രകാരം, നിലവിലെ രണ്ട് വർഷത്തെ കോഴ്സ് ഒരു വർഷമായി മാറും.
2027 മെയ് മുതൽ ഒന്റാരിയോയിലെ എല്ലാ സർവ്വകലാശാലകളും മൂന്ന് സെമസ്റ്ററുകൾ ഉൾപ്പെടുന്ന ഒരു വർഷത്തെ മാതൃക സ്വീകരിക്കേണ്ടി വരും. നിലവിൽ നാല് സെമസ്റ്ററുകളിലായി രണ്ട് വർഷമാണ് അധ്യാപക പരിശീലനത്തിനുള്ള കാലാവധി. കോഴ്സ് കാലാവധി കുറയ്ക്കുന്നതിലൂടെ വിദ്യാർത്ഥികൾക്ക് ട്യൂഷൻ ഫീസിൽ 3,000 ഡോളർ വരെ ലാഭിക്കാനാകുമെന്ന് സർക്കാർ വൃത്തങ്ങൾ അറിയിച്ചു. ക്ലാസ് റൂം പഠനത്തേക്കാൾ പ്രായോഗിക പരിശീലനത്തിന് പുതിയ നിയമത്തിൽ മുൻഗണന നൽകുമെന്നും ഇതിനായി പുതിയ മാനദണ്ഡങ്ങൾ ഏർപ്പെടുത്തുമെന്നും മന്ത്രി നോളൻ ക്വിൻ വ്യക്തമാക്കി.
നിലവിൽ അധ്യാപക ലൈസൻസ് ലഭിക്കുന്നതിന് കുറഞ്ഞത് 80 ദിവസത്തെ പ്രായോഗിക പരിശീലനം ആവശ്യമാണ്. എന്നാൽ ഈ കാലാവധി പര്യാപ്തമല്ലെന്നും ഇത് രാജ്യത്തെ തന്നെ ഏറ്റവും ഉയർന്ന നിലവാരത്തിലേക്ക് ഉയർത്താനാണ് ലക്ഷ്യമിടുന്നതെന്നും മന്ത്രി പോൾ കലന്ദ്ര പറഞ്ഞു. പ്രവിശ്യയിലെ 14 പബ്ലിക് സർവ്വകലാശാലകൾക്കും മൂന്ന് സ്വകാര്യ സർവ്വകലാശാലകൾക്കും പുതിയ മാറ്റങ്ങൾ ബാധകമായിരിക്കും. കൂടാതെ, ചൈൽഡ്ഹുഡ് എഡ്യൂക്കേറ്റർ ഡിപ്ലോമയോ യൂത്ത് വർക്ക് പരിചയമോ ഉള്ളവർക്ക് അധ്യാപക ജോലിയിൽ മുൻഗണന നൽകുന്നതിനെക്കുറിച്ചും സർക്കാർ ആലോചിക്കുന്നുണ്ട്.
സർക്കാർ നീക്കത്തെ അധ്യാപക സംഘടനകൾ ഭാഗികമായി സ്വാഗതം ചെയ്തെങ്കിലും ചില ആശങ്കകളും പങ്കുവെച്ചു. അധ്യാപകരെ നിയമിക്കുന്നതിനേക്കാൾ പ്രധാനമാണ് നിലവിലുള്ളവരെ ജോലിയിൽ നിലനിർത്തുന്നതെന്ന് എലിമെന്ററി ടീച്ചേഴ്സ് ഫെഡറേഷൻ ഓഫ് ഒന്റാരിയോ വൈസ് പ്രസിഡന്റ് ഷേർലി ബെൽ പ്രതികരിച്ചു. ക്ലാസുകളിലെ കുട്ടികളുടെ എണ്ണം കുറയ്ക്കാനും അധിക ജീവനക്കാരെ നിയമിക്കാനും സർക്കാർ തയ്യാറാകണമെന്ന് അവർ ആവശ്യപ്പെട്ടു. പരിഷ്കാരം നടപ്പിലാക്കാൻ നിശ്ചയിച്ചിട്ടുള്ള സമയപരിധി പ്രായോഗികമാണോ എന്ന് പരിശോധിക്കണമെന്ന് ഒന്റാരിയോ ടീച്ചേഴ്സ് ഫെഡറേഷൻ പ്രസിഡന്റ് ക്രിസ് കൗലി അറിയിച്ചു.
Changes to teacher education programs in Ontario; New law from 2027
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
