ന്യൂഡൽഹി: രാജ്യത്തെ ഇലക്ട്രിക് വാഹന (ഇവി) ആവാസവ്യവസ്ഥ ശക്തിപ്പെടുത്തുന്നതിന്റെ ഭാഗമായി വിവിധ പെട്രോൾ പമ്പുകളിലായി 27,000-ത്തിലധികം ചാർജിംഗ് സ്റ്റേഷനുകൾ സ്ഥാപിച്ചു. കേന്ദ്ര സർക്കാരും പൊതുമേഖലാ എണ്ണക്കമ്പനികളും സംയുക്തമായാണ് ഒരു വർഷത്തിനുള്ളിൽ ഈ നേട്ടം കൈവരിച്ചത്. ഇതോടെ ഇലക്ട്രിക് വാഹന ഉപഭോക്താക്കൾ നേരിട്ടിരുന്ന ചാർജിംഗ് സൗകര്യങ്ങളുടെ കുറവിന് വലിയ പരിഹാരമായി.
പെട്രോളിയം, പ്രകൃതി വാതക മന്ത്രാലയത്തിന്റെ വാർഷിക റിപ്പോർട്ട് പ്രകാരം ആകെ 27,432 ചാർജിംഗ് പോയിന്റുകളാണ് നിലവിൽ പ്രവർത്തനസജ്ജമായിരിക്കുന്നത്. കേന്ദ്ര സർക്കാരിന്റെ ഫെയിം-2 (FAME-II) പദ്ധതിയുടെ ഭാഗമായി 8,932 സ്റ്റേഷനുകൾ സ്ഥാപിച്ചു. ഇതിനു പുറമെ, പൊതുമേഖലാ എണ്ണക്കമ്പനികൾ സ്വന്തം നിലയിലുള്ള നിക്ഷേപത്തിലൂടെ 18,500-ലധികം ചാർജിംഗ് പോയിന്റുകളും സജ്ജമാക്കിയിട്ടുണ്ട്.
നിലവിലുള്ള പെട്രോൾ പമ്പുകൾ കേന്ദ്രീകരിച്ച് ചാർജിംഗ് സ്റ്റേഷനുകൾ വന്നതോടെ നഗര-ഗ്രാമ വ്യത്യാസമില്ലാതെ ഇവ ലഭ്യമായി തുടങ്ങിയിട്ടുണ്ട്. ദീർഘദൂര യാത്ര നടത്തുന്ന ഇവി ഡ്രൈവർമാർക്ക് ചാർജിംഗ് പോയിന്റുകൾ കണ്ടെത്താനുള്ള ബുദ്ധിമുട്ട് പുതിയ നീക്കത്തിലൂടെ ഒഴിവാക്കാൻ സാധിക്കും. ഇത് രാജ്യത്ത് ഇലക്ട്രിക് വാഹനങ്ങളുടെ വിൽപന വർദ്ധിക്കുന്നതിനും ജനങ്ങൾക്കിടയിൽ കൂടുതൽ ആത്മവിശ്വാസം നൽകുന്നതിനും കാരണമാകുമെന്നാണ് വിലയിരുത്തൽ.
ഭാവി വികസനം ലക്ഷ്യമിട്ട് 2028-29 വരെയുള്ള കാലയളവിൽ 4,000 പുതിയ ഊർജ്ജ സ്റ്റേഷനുകൾ (Energy Stations) സ്ഥാപിക്കാനും സർക്കാർ ലക്ഷ്യമിടുന്നുണ്ട്. പെട്രോൾ, ഡീസൽ എന്നിവയ്ക്ക് പുറമെ സിഎൻജി, എൽഎൻജി, ഇവി ചാർജിംഗ്, ജൈവ ഇന്ധനങ്ങൾ എന്നിവ ഒരേ കേന്ദ്രത്തിൽ ലഭ്യമാക്കുന്ന രീതിയിലാണ് ഇവ വിഭാവനം ചെയ്തിരിക്കുന്നത്. 2025 നവംബർ വരെ ഇത്തരത്തിലുള്ള 1,064 സ്റ്റേഷനുകൾ പ്രവർത്തനം ആരംഭിച്ചു കഴിഞ്ഞു.
ഭാരവാഹനങ്ങളായ ട്രക്കുകൾക്കായി പ്രത്യേകമായി ‘അപ്നാ ഘർ’ (APNA GHAR) എന്ന പദ്ധതിയും മന്ത്രാലയം നടപ്പിലാക്കുന്നുണ്ട്. ഇതിന്റെ ഭാഗമായി ദേശീയപാതകളിൽ 500-ലധികം ട്രക്ക് വിശ്രമ കേന്ദ്രങ്ങൾ നിർമ്മിച്ചു. റോഡ് സുരക്ഷ ഉറപ്പാക്കുന്നതിനൊപ്പം ഗ്രാമീണ മേഖലകളിൽ പുതിയ തൊഴിലവസരങ്ങൾ സൃഷ്ടിക്കാനും ഈ പദ്ധതി ലക്ഷ്യമിടുന്നു. കാറുകൾക്കും ബൈക്കുകൾക്കും പുറമെ ചരക്ക് ഗതാഗത മേഖലയെയും ഹരിത ഇന്ധനത്തിലേക്ക് മാറ്റാനാണ് സർക്കാർ നീക്കം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Huge boost to EV market: Central government to set up 27,000 charging stations in India within a year
