ഒട്ടാവ: കാനഡയിൽ വർദ്ധിച്ചുവരുന്ന ഭക്ഷ്യവില നിയന്ത്രിക്കുന്നതിനും ഉപഭോക്താക്കൾക്ക് കുറഞ്ഞ നിരക്കിൽ കാർഷിക ഉൽപ്പന്നങ്ങൾ ലഭ്യമാക്കുന്നതിനുമായി കനേഡിയൻ സർക്കാർ പുതിയ ദേശീയ ഭക്ഷ്യസുരക്ഷാ നയം പ്രഖ്യാപിച്ചു. രാജ്യത്തെ ഭക്ഷ്യ ഉൽപ്പാദനവും വിതരണവും മെച്ചപ്പെടുത്താൻ ലക്ഷ്യമിട്ട് പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറൽ സർക്കാരാണ് മൂന്ന് ബില്യൺ ഡോളറിന്റെ ഈ പദ്ധതി അവതരിപ്പിച്ചത്. പത്ത് വർഷം കൊണ്ട് നടപ്പാക്കുന്ന പദ്ധതിയിലൂടെ പ്രാദേശികമായി ഉൽപ്പാദിപ്പിക്കുന്ന പഴങ്ങൾ, പച്ചക്കറികൾ എന്നിവയുടെ വിതരണം ശക്തമാക്കാനും ഇടനിലക്കാരുടെ ചൂഷണം ഒഴിവാക്കാനും സാധിക്കുമെന്ന് സർക്കാർ അറിയിച്ചു.
രാജ്യത്തെ ഭക്ഷ്യ വിതരണ കേന്ദ്രങ്ങളുടെയും ഫുഡ് ഹബ്ബുകളുടെയും വികസനത്തിനായി പദ്ധതിയിൽ നിന്ന് ഒരു ബില്യൺ ഡോളർ മാറ്റിവെക്കും. ഇത് വഴി ചെറുകിട വ്യാപാരികൾക്ക് കർഷകരിൽ നിന്ന് നേരിട്ട് ഉൽപ്പന്നങ്ങൾ വാങ്ങാൻ സാധിക്കുകയും വിപണിയിലെ വൻകിട കമ്പനികളുടെ കുത്തക നിയന്ത്രിക്കാൻ കഴിയുകയും ചെയ്യും. കൂടാതെ, പ്രതികൂല കാലാവസ്ഥയിലും വർഷം മുഴുവൻ കൃഷി സാധ്യമാക്കുന്ന ഗ്രീൻഹൗസ്, ഹൈഡ്രോപോണിക്സ് സാങ്കേതികവിദ്യകൾക്കായി 750 മില്യൺ ഡോളർ അനുവദിച്ചിട്ടുണ്ട്. വിത്തുകൾ, വളങ്ങൾ, മൃഗാഹാരം എന്നിവയുടെ വിതരണത്തിനുള്ള സർക്കാർ അനുമതികൾ വേഗത്തിലാക്കാനും പുതിയ തന്ത്രത്തിൽ വ്യവസ്ഥയുണ്ട്.
നിലവിൽ കാനഡയിലെ ഗ്രോസറി വിപണിയുടെ 75 ശതമാനവും അഞ്ച് വൻകിട കമ്പനികളുടെ നിയന്ത്രണത്തിലാണ്. 2019-ന് ശേഷം രാജ്യത്ത് ഭക്ഷണസാധനങ്ങളുടെ വിലയിൽ 35 ശതമാനത്തോളം വർദ്ധനവുണ്ടായതായാണ് കണക്കുകൾ. കൂടാതെ പച്ചക്കറികളുടെയും പഴവർഗ്ഗങ്ങളുടെയും വലിയൊരു പങ്ക് കാനഡ നിലവിൽ വിദേശത്ത് നിന്ന് ഇറക്കുമതി ചെയ്യുകയാണ്. പുതിയ ഭക്ഷ്യസുരക്ഷാ പദ്ധതി യാഥാർത്ഥ്യമാകുന്നതോടെ വിദേശ രാജ്യങ്ങളെ ആശ്രയിക്കുന്നത് കുറയ്ക്കാനും, കാനഡയിലെ കർഷകർക്കും സാധാരണക്കാരായ ഉപഭോക്താക്കൾക്കും ഒരുപോലെ സാമ്പത്തിക ആശ്വാസം നൽകാനും സാധിക്കുമെന്നാണ് വിലയിരുത്തപ്പെടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada's $3 billion plan to curb food price inflation: Carney government announces new food security policy
