ഒട്ടാവ : വ്യാജ പരസ്യങ്ങളിലൂടെ ഉപഭോക്താക്കളെ തെറ്റിദ്ധരിപ്പിച്ചതിന് പ്രമുഖ റീട്ടെയിൽ സ്ഥാപനമായ കനേഡിയൻ ടയർ 1.3 മില്യൺ ഡോളർ പിഴയടക്കാൻ കോടതി ഉത്തരവിട്ടു. ക്യുബെക്കിലെ ഉപഭോക്തൃ സംരക്ഷണ നിയമത്തിലെ 74 വകുപ്പുകൾ ലംഘിച്ചതായി കമ്പനി കോടതിയിൽ സമ്മതിച്ചു. ആദ്യം കുറ്റം നിഷേധിച്ചെങ്കിലും പിന്നീട് ഒത്തുതീർപ്പിന് കമ്പനി തയ്യാറായതായി ക്രൗൺ പ്രോസിക്യൂട്ടർ ജെറോം ദുസാൾട്ട് അറിയിച്ചു. മോൺട്രിയൽ കോടതിയിലെ ജഡ്ജി സൈമൺ ലാവോയ് ഒത്തുതീർപ്പ് കരാറിന് അംഗീകാരം നൽകി.
ഉൽപ്പന്നങ്ങൾക്ക് വൻതോതിൽ വിലക്കിഴിവ് ഉണ്ടെന്ന് കാണിക്കാൻ യഥാർത്ഥ വിലയേക്കാൾ ഉയർന്ന തുക പരസ്യങ്ങളിൽ പ്രദർശിപ്പിച്ചുവെന്ന് 2021-ൽ പ്രവിശ്യാ ഉപഭോക്തൃ സംരക്ഷണ ഓഫീസ് നടത്തിയ അന്വേഷണത്തിൽ കണ്ടെത്തിയിരുന്നു. ‘റെഗുലർ പ്രൈസ്’ എന്ന് രേഖപ്പെടുത്തിയ തുകയ്ക്ക് ഈ ഉൽപ്പന്നങ്ങൾ അപൂർവ്വമായി മാത്രമേ വിറ്റഴിച്ചിട്ടുള്ളൂ എന്ന് വിൽപന കണക്കുകൾ വിശകലനം ചെയ്ത ഉദ്യോഗസ്ഥർ വ്യക്തമാക്കി. 2021 ഏപ്രിൽ മുതൽ ഒക്ടോബർ വരെയുള്ള കാലയളവിൽ കനേഡിയൻ ടയറിന്റെ ഫ്ലൈയറുകൾ, വെബ്സൈറ്റ്, മോൺട്രിയലിലെ മൂന്ന് സ്റ്റോറുകൾ എന്നിവ കേന്ദ്രീകരിച്ചായിരുന്നു പരിശോധന നടന്നത്.
അന്വേഷണ പരിധിയിലുണ്ടായിരുന്ന ഹെൻകെൽസ് (Henckels), കുസിനാർട്ട് (Cuisinart) നൈഫ് സെറ്റുകൾ, ലാഗോസ്റ്റിന (Lagostina), ഹെറിറ്റേജ് (Heritage) കുക്ക് വെയറുകൾ, ഡിവാൾട്ട് (Dewalt) കോർഡ്ലെസ് ഡ്രിൽ എന്നിങ്ങനെ അഞ്ച് ഉൽപ്പന്നങ്ങളുടെ കാര്യത്തിൽ കമ്പനി നിയമലംഘനം സമ്മതിച്ചു. ഓരോ നിയമലംഘനത്തിനും 15,625 ഡോളർ മുതൽ 18,150 ഡോളർ വരെയാണ് പിഴയും കോടതി ചെലവുമായി നിശ്ചയിച്ചിരിക്കുന്നത്. ഉത്തരവ് പ്രകാരം അടുത്ത 12 മാസത്തിനുള്ളിൽ കനേഡിയൻ ടയർ തുക അടച്ചുതീർക്കണം.
അഞ്ച് വർഷം മുമ്പ് നടന്ന അഞ്ച് ഉൽപ്പന്നങ്ങളെ സംബന്ധിച്ച വിഷയമാണിതെന്ന് കനേഡിയൻ ടയർ വക്താവ് പ്രതികരിച്ചു. ഉപഭോക്താക്കളിൽ നിന്ന് അമിതവില ഈടാക്കിയിട്ടില്ലെന്നും നിയമനടപടികൾ അവസാനിച്ചതായും കമ്പനി പ്രസ്താവനയിലൂടെ അറിയിച്ചു. ക്യുബെക്കിലെ ഉപഭോക്തൃ സംരക്ഷണ നിയമങ്ങൾ കർശനമായി പാലിക്കുന്നുണ്ടെന്ന് ഉറപ്പാക്കാൻ അന്വേഷണ ഏജൻസികൾ നടപടികൾ തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Canadian Tire fined $1.3 million for price gouging
