ഒട്ടാവ: കനേഡിയൻ ഫെഡറൽ സർക്കാരിന്റെ പുതിയ ത്രൈമാസ ‘കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ്’ (Canada Groceries and Essentials Benefit) തുക അർഹരായ ഗുണഭോക്താക്കളുടെ ബാങ്ക് അക്കൗണ്ടുകളിൽ വെള്ളിയാഴ്ച മുതൽ എത്തിത്തുടങ്ങി. ഏകദേശം 12 മില്യൺ ജനങ്ങൾക്ക് ഈ സാമ്പത്തിക ആനുകൂല്യം ലഭിക്കുമെന്നാണ് കണക്കാക്കുന്നത്. രാജ്യത്തെ നിലവിലെ ജി.എസ്.ടി/എച്ച്.എസ്.ടി ക്രെഡിറ്റിന് പകരമായി ജനുവരിയിൽ പ്രഖ്യാപിച്ച ഈ പദ്ധതി വഴി കുറഞ്ഞ വരുമാനക്കാർക്കും ഇടത്തരം വരുമാനക്കാർക്കും 2031 വരെ 25 ശതമാനം തുക അധികമായി ലഭിക്കും. ഇതിന് മുന്നോടിയായി ജൂൺ മാസത്തിൽ, വാർഷിക ആനുകൂല്യത്തിന്റെ 50 ശതമാനം തുക ഒറ്റത്തവണ പേയ്മെന്റായി അർഹരായ കുടുംബങ്ങൾക്ക് കൈമാറിയിരുന്നു.
ഗുണഭോക്താക്കളുടെ വൈവാഹിക നിലയും കുട്ടികളുടെ എണ്ണവും അനുസരിച്ച് പ്രതിവർഷം ഏതാനും നൂറ് ഡോളർ മുതൽ ആയിരത്തിലധികം ഡോളർ വരെയാണ് ധനസഹായമായി ലഭിക്കുക. നിലവിലെ കടുത്ത ജീവിതച്ചെലവ് പ്രതിസന്ധിയിൽ ബുദ്ധിമുട്ടുന്ന വ്യക്തികൾക്കും കുടുംബങ്ങൾക്കും ഈ രണ്ട് പദ്ധതികളും വലിയ ആശ്വാസമാകുമെന്ന് ഫെഡറൽ സർക്കാർ അറിയിച്ചു. ടി.ഡി ബാങ്ക് കഴിഞ്ഞ ശൈത്യകാലത്ത് പുറത്തുവിട്ട റിപ്പോർട്ട് പ്രകാരം 2019-ന് ശേഷം കാനഡയിൽ പലചരക്ക് സാധനങ്ങളുടെ വിലയിൽ ഏകദേശം 30 ശതമാനത്തിന്റെ വർദ്ധനവാണ് രേഖപ്പെടുത്തിയിട്ടുള്ളത്.
പുതിയ സാമ്പത്തിക സഹായം സമൂഹത്തിലെ ഏറ്റവും ദുർബലരായ ജനവിഭാഗങ്ങൾക്ക് ഗുണം ചെയ്യുമെന്ന് ഗ്രീനർ വില്ലേജ് ഫ്രെഡറിക്ടൺ ഫുഡ് ബാങ്ക് സി.ഇ.ഒ അലക്സ് ബോയ്ഡ് വിലയിരുത്തി. കുടുംബങ്ങൾക്ക് ഭക്ഷണം വാങ്ങാൻ ആവശ്യമായ സാമ്പത്തിക സ്രോതസ്സുകൾ ലഭ്യമാകുമ്പോൾ ജനങ്ങൾ ഫുഡ് ബാങ്കുകളെ ആശ്രയിക്കുന്നത് കുറയുമെന്നും അദ്ദേഹം വ്യക്തമാക്കി. എല്ലാ മാസവും ചൈൽഡ് ടാക്സ് ബെനിഫിറ്റും ഓരോ ക്വാർട്ടറിലും ജി.എസ്.ടി ബെനിഫിറ്റും വിതരണം ചെയ്യുമ്പോൾ ഫുഡ് ബാങ്കുകളിൽ എത്തുന്നവരുടെ എണ്ണത്തിൽ കുറവ് രേഖപ്പെടുത്താറുണ്ടെന്നും സഹായം നേരിട്ട് ജനങ്ങളിലേക്ക് എത്തുന്നത് ഗുണകരമാകുമെന്നും അദ്ദേഹം കൂട്ടിച്ചേർത്തു.
Canada’s new grocery benefit begins arriving in bank accounts
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
