ഒന്റാരിയോ; അമേരിക്കൻ ഉൽപ്പന്നങ്ങൾക്കെതിരായ ബഹിഷ്കരണ നടപടികൾ പിൻവലിക്കണമെന്ന് ആവശ്യപ്പെട്ട് കാലിഫോർണിയയിൽ നിന്നുള്ള ഡെമോക്രാറ്റിക് സെനറ്റർ ആഡം ഷിഫ് കാനഡയോട് വീണ്ടും അഭ്യർഥിച്ചു. പ്രത്യേകിച്ച് കാലിഫോർണിയൻ വൈനുകൾക്ക് കാനഡൻ വിപണിയിൽ വീണ്ടും പ്രവേശനം നൽകണമെന്നാണ് അദ്ദേഹത്തിന്റെ ആവശ്യം. അമേരിക്കൻ വൈനുകളുടെ അഭാവം ഉപഭോക്താക്കളുടെ തിരഞ്ഞെടുപ്പ് പരിമിതപ്പെടുത്തുന്നതോടൊപ്പം നൂറുകണക്കിന് മില്യൺ ഡോളർ മൂല്യമുള്ള വ്യാപാരത്തെയും ബാധിക്കുന്നുവെന്ന് അദ്ദേഹം ചൂണ്ടിക്കാട്ടി. എന്നാൽ, അമേരിക്ക ചുമത്തിയിരിക്കുന്ന തീരുവകൾ പിൻവലിക്കുന്നതുവരെ ബഹിഷ്കരണ നടപടികൾ തുടരുമെന്നും പിന്നീട് മാത്രമേ നിലപാട് പുനഃപരിശോധിക്കൂവെന്നും ക്യൂബെക് സർക്കാർ വ്യക്തമാക്കി. അതേസമയം, ഒന്റാറിയോ പ്രീമിയർ ഡഗ് ഫോർഡും നിലവിലെ നടപടികളിൽ നിന്ന് പിന്നോട്ടില്ലെന്ന നിലപാടാണ് ആവർത്തിച്ചത്.
ബഹിഷ്കരണത്തിന് പിന്നാലെ കാനഡയിലെ പ്രാദേശിക വൈൻ, മദ്യ നിർമാതാക്കൾക്ക് വൻ നേട്ടമാണ് ലഭിച്ചതെന്നാണ് കണക്കുകൾ സൂചിപ്പിക്കുന്നത്. ഒന്റാറിയോയിലെ വെസ്റ്റ്കോട്ട് വൈൻയാർഡിന്റെ എൽസിബിഒ (LCBO) വിൽപ്പന 600 ശതമാനം വരെ ഉയർന്നതായും, നേരിട്ടുള്ള വിൽപ്പനയിൽ 20 ശതമാനം വർധന ഉണ്ടായതായും സ്ഥാപന ഉടമ അറിയിച്ചു. വർധിച്ച ആവശ്യകതയെ തുടർന്ന് മുന്തിരിത്തോട്ടം വികസിപ്പിക്കാനും പുതിയ സൗകര്യങ്ങൾ ഒരുക്കാനുമുള്ള നടപടികളും ആരംഭിച്ചിട്ടുണ്ട്. ഉപഭോക്താക്കൾ പ്രാദേശിക ഉൽപ്പന്നങ്ങളിലേക്ക് കൂടുതൽ തിരിഞ്ഞതോടെ ഒന്റാറിയോയിലെ വിക്യുഎ (VQA) വൈൻ വിൽപ്പന കഴിഞ്ഞ ഒരു വർഷത്തിനിടെ 44 ശതമാനവും, കാനേഡിയൻ മദ്യങ്ങളുടെ മൊത്തം വിൽപ്പന 18 ശതമാനവും ഉയർന്നതായി എൽസിബിഒ അറിയിച്ചു.
മറുവശത്ത്, കാനഡയിലേക്കുള്ള അമേരിക്കൻ വൈൻ കയറ്റുമതി വലിയ തിരിച്ചടിയാണ് നേരിട്ടത്. 2024-നോട് താരതമ്യം ചെയ്യുമ്പോൾ 2025-ൽ കയറ്റുമതി 78 ശതമാനം കുറഞ്ഞതായി വ്യവസായ കണക്കുകൾ വ്യക്തമാക്കുന്നു. ഒരുകാലത്ത് അമേരിക്കൻ വൈനുകളുടെ ഏറ്റവും വലിയ കയറ്റുമതി വിപണിയായിരുന്ന കാനഡയുടെ പങ്ക് ഗണ്യമായി ഇടിഞ്ഞതോടെ നൂറുകണക്കിന് മില്യൺ ഡോളറിന്റെ കയറ്റുമതി നഷ്ടവും രേഖപ്പെടുത്തി. ഇതിനിടെ, കാനഡൻ പ്രവിശ്യകൾ ഇത്തരത്തിലുള്ള വ്യാപാര നിയന്ത്രണങ്ങൾ ഏർപ്പെടുത്തുന്നത് അവരുടെ അധികാരപരിധി ലംഘിക്കുന്നതാണെന്ന് ചില വ്യാപാര വിദഗ്ധർ അഭിപ്രായപ്പെട്ടു. അന്താരാഷ്ട്ര വ്യാപാര ചർച്ചകൾ ഫെഡറൽ സർക്കാരിന്റെ ഉത്തരവാദിത്തമായതിനാൽ, പ്രവിശ്യകൾ ഒട്ടാവയുമായി ചേർന്ന് ഏകോപിതമായ സമീപനം സ്വീകരിക്കണമെന്നാണ് അവരുടെ നിർദേശം.
Canada will not lift the boycott of American wines; provinces harden their stance amidst the trade dispute.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
