ഓട്ടവ: കാനഡയിൽ നിന്നുള്ള ഉൽപ്പന്നങ്ങൾക്ക് അമേരിക്ക 50 ശതമാനം പുതിയ തീരുവ ഏർപ്പെടുത്തിയതിനെ തുടർന്ന്, അമേരിക്കയുമായുള്ള വ്യാപാര ചർച്ചകൾ കാനഡ താൽക്കാലികമായി നിർത്തിവെച്ചു. രാജ്യത്തിന്റെ സാമ്പത്തിക സുരക്ഷയെയും പരമാധികാരത്തെയും ബാധിക്കുന്ന മോശം കരാറുകളോട് യോജിക്കാൻ കഴിയില്ലെന്ന് പ്രഖ്യാപിച്ചാണ് പ്രധാനമന്ത്രി മാർക്ക് കാർണി ഈ തീരുമാനമെടുത്തത്. തിരിച്ചടിയായി അടുത്ത മാസം മുതൽ അമേരിക്കൻ ഉൽപ്പന്നങ്ങൾക്ക് മേൽ കാനഡയും ശക്തമായ പ്രതികാര തീരുവ ചുമത്തും.
വ്യാപാര തർക്കവും പ്രമുഖരുടെ പിന്തുണയും
അമേരിക്കയുടെ നീക്കത്തിനെതിരെ കാനഡയിലെ രാഷ്ടീയ, ബിസിനസ്, വ്യവസായ നേതാക്കൾ ഒന്നടങ്കം സർക്കാരിന് പിന്തുണയുമായി രംഗത്തെത്തിയിട്ടുണ്ട്. സ്റ്റീൽ, പാൽ ഉൽപ്പന്നങ്ങൾ, ഗൃഹോപകരണങ്ങൾ, കാർഷിക യന്ത്രങ്ങൾ തുടങ്ങി 28 ബില്യൺ ഡോളർ മൂല്യമുള്ള കനേഡിയൻ ഉൽപ്പന്നങ്ങളെയാണ് പുതിയ അമേരിക്കൻ തീരുവ ബാധിക്കുന്നത്. ഒന്റാറിയോ പ്രീമിയർ ഡഗ് ഫോർഡ് ഉൾപ്പെടെയുള്ള പ്രീമിയർമാർ സർക്കാരിന്റെ തീരുമാനത്തെ സ്വാഗതം ചെയ്തു. എന്നാൽ, കാനഡ ഒരു സ്വതന്ത്ര രാജ്യമായി തുടരുമ്പോഴും, അമേരിക്ക വഴി ലഭിക്കേണ്ട എല്ലാ ആനുകൂല്യങ്ങളും നേടിയെടുക്കാൻ ശ്രമിക്കുകയാണെന്ന് ട്രൂത്ത് സോഷ്യലിലൂടെ അമേരിക്കൻ പ്രസിഡന്റ് ഡൊണാൾഡ് ട്രംപ് ആരോപിച്ചു.
Also Read: കാനഡയിലെ ഈ അഞ്ച് പ്രവിശ്യകളിലുള്ളവർക്ക് ഇനി ഉയർന്ന മിനിമം വേതനം; ഒക്ടോബർ 1 മുതൽ പ്രാബല്യത്തിൽ
ജനകീയ പ്രതിഷേധവും ഭാവി ആശങ്കകളും
വ്യാപാര തർക്കം രൂക്ഷമായതോടെ ഇരു രാജ്യങ്ങളും തമ്മിലുള്ള ബന്ധത്തിൽ വലിയ വിള്ളലാണ് വീണിരിക്കുന്നത്. വൻകൂവറിലും മോൺട്രിയലിലും നടന്ന കായിക മത്സരങ്ങൾക്കിടെ അമേരിക്കൻ ദേശീയഗാനം ആലപിച്ചപ്പോൾ കനേഡിയൻ ആരാധകർ കൂവി വിളിച്ചാണ് പ്രതിഷേധം അറിയിച്ചത്. പ്രതികാര തീരുവ കർഷകർക്കും ബിസിനസുകൾക്കും അധിക സാമ്പത്തിക ഭാരമുണ്ടാക്കുമെന്ന് ആൽബർട്ട പ്രീമിയർ ഡാനിയേൽ സ്മിത്ത് ആശങ്ക പ്രകടിപ്പിച്ചു. അതേസമയം, ബാധിക്കപ്പെടുന്ന മേഖലകൾക്ക് ആവശ്യമായ സാമ്പത്തിക സഹായ പദ്ധതികൾ ഉടൻ പ്രഖ്യാപിക്കുമെന്ന് പ്രധാനമന്ത്രി മാർക്ക് കാർണി വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
Trade dispute with the US intensifies; Canadians back Carney's decision.
