ടൊറന്റോ: കാനഡയിൽ സാധാരണക്കാരുടെ കുടുംബ ബഡ്ജറ്റുകൾ തകിടംമറിച്ചുകൊണ്ട് ഭക്ഷ്യസാധനങ്ങളുടെ വില കുതിച്ചുയരുന്ന പശ്ചാത്തലത്തിൽ, ജനങ്ങൾക്ക് നേരിട്ട് സാമ്പത്തിക സഹായമെത്തിക്കുന്ന പദ്ധതിയുമായി കനേഡിയൻ സർക്കാർ. കനത്ത വിലക്കയറ്റത്തിന് താല്ക്കാലിക ആശ്വാസമേകാൻ ലക്ഷ്യമിട്ടുള്ള ‘കാനഡ ഗ്രോസറി ആൻഡ് എസൻഷ്യൽസ് ബെനഫിറ്റ്’ (Canada Groceries and Essentials Benefit) പദ്ധതി പ്രകാരമുള്ള പ്രത്യേക ധനസഹായ വിതരണം രാജ്യവ്യാപകമായി ആരംഭിച്ചു. ജിഎസ്ടി/എച്ച്എസ്ടി ക്രെഡിറ്റ് സംവിധാനത്തിൽ വരുത്തിയ പരിഷ്കാരങ്ങളിലൂടെയാണ് അർഹരായ കുടുംബങ്ങളിലേക്ക് തുക നേരിട്ടെത്തുന്നത്. പുതിയ സാമ്പത്തിക പാക്കേജ് പ്രകാരം നാലംഗങ്ങളുള്ള ഒരു സാധാരണ കുടുംബത്തിന് ഒറ്റത്തവണ സഹായമായി 534 ഡോളർ വരെ ലഭിക്കും.
ഒറ്റത്തവണയായി നൽകുന്ന ഈ പ്രത്യേക ടോപ്പ്-അപ്പിന് പുറമെ, വരും വർഷങ്ങളിലും ജനങ്ങൾക്ക് സുരക്ഷയൊരുക്കാനുള്ള ദീർഘകാല പദ്ധതികളും ഇതിനൊപ്പം വിഭാവനം ചെയ്തിട്ടുണ്ട്. അടുത്ത അഞ്ച് വർഷത്തിനുള്ളിൽ ത്രൈമാസ അടിസ്ഥാനത്തിൽ നൽകുന്ന ആനുകൂല്യങ്ങളിൽ 25 ശതമാനത്തിന്റെ വർധനവാണ് സർക്കാർ വാഗ്ദാനം ചെയ്യുന്നത്. വ്യക്തികളുടെയും കുടുംബങ്ങളുടെയും വാർഷിക വരുമാനവും ആശ്രിതരുടെ എണ്ണവും കണക്കാക്കിയാണ് ആനുകൂല്യ തുക നിശ്ചയിച്ചിരിക്കുന്നത്. ഇതനുസരിച്ച് അർഹനായ ഒരു വ്യക്തിക്ക് പരമാവധി 679 ഡോളർ വരെയും, വിവാഹിതരായ ദമ്പതികൾക്ക് 890 ഡോളർ വരെയും ലഭിക്കും. ഇതിനുപുറമെ ഓരോ കുട്ടിക്കും 234 ഡോളർ വീതം അധികമായും അനുവദിക്കും.
കുറഞ്ഞ വരുമാനമുള്ള കനേഡിയൻ പൗരന്മാരെ ലക്ഷ്യമിട്ടാണ് പദ്ധതി നടപ്പിലാക്കുന്നത് എന്നതിനാൽ കൃത്യമായ വരുമാന പരിധിയും അധികൃതർ നിശ്ചയിച്ചിട്ടുണ്ട്. 2024-ലെ വരുമാന കണക്കുകൾ അടിസ്ഥാനമാക്കിയാണ് അർഹത നിശ്ചയിക്കുക. കുട്ടികളില്ലാത്ത ഒരു വ്യക്തിയുടെ വാർഷിക വരുമാന പരിധി 56,181 ഡോളറായി നിജപ്പെടുത്തിയപ്പോൾ, നാല് കുട്ടികളുള്ള വ്യക്തിക്ക് ഇത് 74,201 ഡോളർ വരെയാകാം. അതുപോലെ കുട്ടികളില്ലാത്ത ദമ്പതികളുടെ സംയുക്ത വരുമാനം 59,481 ഡോളറിൽ കവിയരുത്. നാല് കുട്ടികളുള്ള കുടുംബങ്ങൾക്ക് സംയുക്ത വരുമാന പരിധി 74,201 ഡോളറായിരിക്കും. രാജ്യത്തെ ഏകദേശം ഒരു കോടി ഇരുപത് ലക്ഷത്തോളം പേർക്ക് ഈ സാമ്പത്തിക ആനുകൂല്യത്തിന്റെ പ്രയോജനം ലഭിക്കുമെന്നാണ് കണക്കാക്കുന്നത്.
പദ്ധതിയുടെ ഔദ്യോഗിക പ്രചാരണത്തിനായി കനേഡിയൻ പ്രധാനമന്ത്രി മാർക്ക് കാർണി ഒന്റാറിയോയിലെ ബ്രാംപ്ടണിലുള്ള ഒരു പ്രമുഖ ഗ്രോസറി സ്റ്റോർ നേരിട്ട് സന്ദർശിച്ചു. ജീവിതച്ചെലവ് ക്രമാതീതമായി ഉയർന്ന സാഹചര്യത്തിൽ ഈ സാമ്പത്തിക സഹായം സാധാരണക്കാരായ ജനങ്ങൾക്ക് വലിയൊരു ആശ്വാസമാകുമെന്ന് അദ്ദേഹം വ്യക്തമാക്കി. എന്നാൽ, 2019-ന് ശേഷം രാജ്യത്ത് ഭക്ഷ്യസാധനങ്ങളുടെ വിലയിൽ ഏകദേശം 30 ശതമാനത്തോളം വർധനവുണ്ടായതായി ടിഡി ബാങ്കിന്റെ റിപ്പോർട്ടുകൾ ചൂണ്ടിക്കാണിക്കുന്നു.
തുക ലഭിച്ചുതുടങ്ങിയെങ്കിലും, നിലവിലെ കടുത്ത വിപണിസാഹചര്യത്തിൽ ഈ ധനസഹായം കേവലം ഒരു മാസത്തെ പലചരക്ക് സാധനങ്ങൾ വാങ്ങാൻ മാത്രമേ തികയുകയുള്ളൂ എന്നാണ് സാധാരണക്കാരായ ഉപഭോക്താക്കളുടെ പ്രതികരണം.
സർക്കാരിന്റെ ഈ സാമ്പത്തിക പാക്കേജ് സ്വാഗതാർഹമാണെങ്കിലും, കാനഡയിലെ ഭക്ഷ്യപ്രതിസന്ധിക്ക് ശാശ്വത പരിഹാരം കാണാൻ വിപണിയിൽ ഘടനാപരമായ മാറ്റങ്ങൾ അനിവാര്യമാണെന്ന് വിദഗ്ദ്ധർ ചൂണ്ടിക്കാണിക്കുന്നു. രാജ്യത്തെ ഗ്രോസറി മേഖലയിലെ കുത്തകവൽക്കരണവും ആരോഗ്യകരമായ മത്സരത്തിന്റെ കുറവും വിലക്കയറ്റത്തിന് ആക്കം കൂട്ടുന്നുണ്ടെന്ന് ടൊറന്റോ സർവകലാശാലയിലെ പ്ലാനിംഗ് പ്രൊഫസറായ മൈക്കൽ വൈഡ്നർ നിരീക്ഷിക്കുന്നു.
കടുത്ത തണുപ്പുകാലമുള്ള രാജ്യമായതിനാൽ കാനഡ ഭൂരിഭാഗം ഭക്ഷ്യവസ്തുക്കൾക്കായും മറ്റ് രാജ്യങ്ങളെയാണ് ആശ്രയിക്കുന്നത്. പ്രത്യേകിച്ച് അമേരിക്കയിൽ നിന്നുള്ള ഇറക്കുമതിയെ ആശ്രയിക്കുന്നത് കുറയ്ക്കണമെന്നും, ആഗോള വ്യാപാര മേഖലയിലുണ്ടാകുന്ന തടസ്സങ്ങളെ പ്രതിരോധിക്കാൻ ആഭ്യന്തര ഉത്പാദനം വർധിപ്പിക്കുകയും ഇറക്കുമതി സ്രോതസ്സുകൾ വൈവിധ്യവത്കരിക്കുകയും വേണമെന്നും വിലയിരുത്തപ്പെടുന്നു. ഇതിനിടയിൽ വിലക്കയറ്റത്തിൽ നിന്ന് രക്ഷനേടാൻ സ്വന്തം വീട്ടുപറമ്പുകളിൽ പച്ചക്കറി കൃഷിയിലേക്ക് തിരിയുന്ന കനേഡിയൻമാരുടെ എണ്ണവും വർധിച്ചുവരികയാണ്.
Canada to provide emergency aid of up to $534 to families amid soaring food prices
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
