കാനഡയിലെ പൗരന്മാർക്ക് ദേശീയോദ്യാനങ്ങളിലേക്ക് സൗജന്യ പ്രവേശനം അനുവദിക്കുന്ന ‘കാനഡ സ്ട്രോങ് പാസ്’ പദ്ധതി കേന്ദ്ര സർക്കാർ പുതുക്കി പ്രഖ്യാപിച്ച വാർത്തയെ ബാൻഫ്, വാട്ടർടൺ ദേശീയോദ്യാന അധികൃതർ സ്വാഗതം ചെയ്തു. ജൂൺ 20 മുതൽ സെപ്റ്റംബർ 2 വരെയായിരുന്ന ഈ ജനപ്രിയ പദ്ധതി, ഡിസംബർ 12 മുതൽ ജനുവരി 15 വരെയും അടുത്ത വേനൽക്കാലത്തേക്കും കൂടി നീട്ടിക്കൊണ്ടുള്ള പ്രധാനമന്ത്രി മാർക്ക് കാർണിയുടെ പ്രഖ്യാപനം വെള്ളിയാഴ്ചയാണ് പുറത്തുവന്നത്. ശീതകാല ടൂറിസം വർദ്ധിപ്പിക്കാൻ ശ്രമിക്കുന്ന ബാൻഫ് നഗരത്തിലെ ഉദ്യോഗസ്ഥർക്ക്, അവധിക്കാലത്തേക്കുള്ള ഈ പദ്ധതിയുടെ പുനരാരംഭം വലിയ ആവേശമുണ്ടാക്കിയിട്ടുണ്ട്. “സ്കീയിങ്, ഐസ് സ്കേറ്റിങ് എന്നിവ ആസ്വദിക്കാനും ഞങ്ങളുടെ മനോഹരമായ ‘വിന്റർ വണ്ടർലാൻഡ്’ കാണാനും ആഗ്രഹിക്കുന്ന ആളുകളെ സ്വാഗതം ചെയ്യാൻ ഇതൊരു മികച്ച അവസരമാണ്,” ബാൻഫ് മേയർ കോറി ഡിമാനോ വെള്ളിയാഴ്ച വ്യക്തമാക്കി.
എങ്കിലും, സൗജന്യ പ്രവേശനം കാരണം ദേശീയോദ്യാനത്തിൽ ഉണ്ടാകാൻ സാധ്യതയുള്ള ഗതാഗതക്കുരുക്ക് ലഘൂകരിക്കുന്നതിനുള്ള നടപടികൾ വേണമെന്ന് ബാൻഫ് അധികൃതർ ആവശ്യപ്പെടുന്നുണ്ട്. പ്രത്യേക സമയക്രമത്തിൽ മാത്രം പാസ് നടപ്പിലാക്കുക പോലുള്ള കാര്യങ്ങൾക്കായി കേന്ദ്ര സർക്കാരിനെ സമീപിക്കാൻ ആവശ്യത്തിന് സമയം ലഭിക്കുമെന്നാണ് ബാൻഫ് പ്രതീക്ഷിക്കുന്നത്. “കാൽഗറി മേഖലയിൽ നിന്നുള്ളവരും ദിവസേന യാത്ര ചെയ്യുന്നവരും രാവിലെ 10 മണിക്ക് ശേഷം ടൗൺസൈറ്റിൽ പാർക്ക് ചെയ്യാൻ ഇടമില്ലാതെ ബുദ്ധിമുട്ടുകയാണ്. ഇത് റോഡുകളിൽ ഗതാഗതക്കുരുക്കിന് കാരണമാകും,” മേയർ ഡിമാനോ വ്യക്തമാക്കി.
കഴിഞ്ഞ വർഷം ബാൻഫ് നഗരത്തിൽ 6.7 ദശലക്ഷം വാഹനങ്ങളാണ് എത്തിയത്. ഈ വേനൽക്കാലത്ത് വാഹനങ്ങളുടെ എണ്ണത്തിൽ ആറ് ശതമാനത്തിന്റെ വർദ്ധനവുണ്ടായതായും മേയർ വെളിപ്പെടുത്തി. “കാനഡ സ്ട്രോങ് പാസിന് ഇതിൽ ഒരു പങ്കുണ്ടെന്ന് നമുക്ക് അനുമാനിക്കാം. അതോടൊപ്പം, കനേഡിയൻ പൗരന്മാർ ഈ വേനലിൽ വീടിനടുത്ത് തന്നെ ചെലവഴിക്കാൻ ആഗ്രഹിച്ചതും, യുഎസ് ഡോളറിന്റെ മൂല്യം ഉയർന്നതും വാഹന തിരക്ക് വർദ്ധിക്കാൻ കാരണമായി,” ഡിമാനോ കൂട്ടിച്ചേർത്തു.
വാട്ടർടൺ പാർക്ക് ചേംബർ ഓഫ് കൊമേഴ്സ് പ്രസിഡന്റ് ഷമീർ സുലൈമാനും പദ്ധതിയെ സ്വാഗതം ചെയ്തു. എന്നാൽ സന്ദർശകരുടെ വലിയ പ്രവാഹമുണ്ടായാൽ പാർക്കുകൾക്ക് ജനക്കൂട്ടത്തെ നിയന്ത്രിക്കാൻ നടപടികൾ ആവശ്യമാണെന്നും അദ്ദേഹം പറഞ്ഞു. “പാർക്ക്സ് കാനഡയുടെ ബജറ്റിനെ ഇത് ബാധിക്കില്ലെന്ന് ഞാൻ പ്രതീക്ഷിക്കുന്നു, കാരണം അവർക്ക് ധാരാളം അടിസ്ഥാന സൗകര്യ വികസന പദ്ധതികൾ പൂർത്തിയാക്കാനുണ്ട്.” സൗജന്യ പ്രവേശന കാലയളവിൽ വാട്ടർടണിലും സാധാരണയേക്കാൾ കൂടുതൽ സന്ദർശകരും പ്രതിദിന യാത്രികരും എത്തിയിരുന്നു. മുൻകൂട്ടി അറിയാൻ കഴിഞ്ഞാൽ ആവശ്യമായ ജീവനക്കാരെ ക്രമീകരിക്കാൻ സാധിക്കുമെന്നും അദ്ദേഹം വ്യക്തമാക്കി.
പ്രാദേശിക ബിസിനസുകൾ കൂടുതൽ ആളുകളെ സ്വാഗതം ചെയ്യുന്നുണ്ടെങ്കിലും, തങ്ങളുടെ സേവനങ്ങളുടെ ഗുണനിലവാരം നിലനിർത്താൻ ബിസിനസുകാർ ആഗ്രഹിക്കുന്നുണ്ട്. “നമുക്ക് ശരിയായ ആളുകളെയും, ആവശ്യത്തിന് ആളുകളെയും ലഭിക്കുന്നുണ്ടെന്ന് ഉറപ്പാക്കണം. അനാവശ്യമായ തിരക്കിൽ ആളുകൾക്ക് മോശം അനുഭവങ്ങൾ ഉണ്ടാകരുതെന്ന് ഞങ്ങൾക്ക് നിർബന്ധമുണ്ട്,” സുലൈമാൻ കൂട്ടിച്ചേർത്തു.
യുഎസിലെ രാഷ്ട്രീയ പ്രശ്നങ്ങൾ കാരണം നിലവിൽ യൂറോപ്പ്, ഏഷ്യ, ഓസ്ട്രേലിയ, മെക്സിക്കോ എന്നിവിടങ്ങളിൽ നിന്നുള്ള അന്താരാഷ്ട്ര വിനോദസഞ്ചാരികളും വാട്ടർടണിലേക്ക് കൂടുതലായി എത്തുന്നുണ്ടെന്നും അദ്ദേഹം നിരീക്ഷിച്ചു. 2026 നികുതി വർഷത്തേക്കുള്ള ഫെഡറൽ ആനുകൂല്യങ്ങൾ ഓട്ടോമാറ്റിക് ആക്കുന്നതും, ദേശീയ സ്കൂൾ ഭക്ഷണ പരിപാടി സ്ഥിരപ്പെടുത്തുന്നതും ഉൾപ്പെടെ കാർണി സർക്കാർ പ്രഖ്യാപിച്ച മറ്റ് ചെലവ് കുറയ്ക്കൽ നടപടികളുടെ ഭാഗമായാണ് കാനഡ സ്ട്രോങ് പാസ് നവീകരിച്ചിട്ടുള്ളത്. നവംബർ 4-ന് കോമൺസ് സഭയിൽ അവതരിപ്പിക്കാനിരിക്കുന്ന ഫെഡറൽ ബഡ്ജറ്റിൽ ഈ നടപടികൾ ഉൾപ്പെടുത്തും.
