അന്താരാഷ്ട്ര മയക്കുമരുന്ന് കടത്ത് ശൃംഖലയെക്കുറിച്ചുള്ള എഫ്.ബി.ഐ. അന്വേഷണത്തിന് പിന്നാലെ അറസ്റ്റിലായ പത്ത് കനേഡിയൻ പൗരന്മാരിൽ രണ്ട് ട്രക്ക് ഡ്രൈവർമാർ കുറ്റം സമ്മതിച്ചു. അമേരിക്കൻ കോടതിയിൽ സമർപ്പിച്ച രേഖകൾ പ്രകാരം, രഞ്ജിത് സിംഗ് റോവാൾ, ഇഖ്ബാൽ സിംഗ് വിർക്ക് എന്നിവരാണ് “ഓപ്പറേഷൻ ജയന്റ് സ്ലാലോം” എന്ന എഫ്.ബി.ഐ. ഓപ്പറേഷനുമായി ബന്ധപ്പെട്ട കേസുകളിൽ കുറ്റസമ്മത കരാറിൽ ഒപ്പിടാൻ സമ്മതിച്ചത്. കൊക്കെയ്ൻ വിതരണം ചെയ്യാനുള്ള ഗൂഢാലോചന കുറ്റമാണ് ഇരുവർക്കുമെതിരെ ചുമത്തിയിരിക്കുന്നത്. ജീവപര്യന്തം തടവ് വരെ ശിക്ഷ ലഭിച്ചേക്കാവുന്ന കുറ്റമാണിത്. കാനഡയിലെ മുൻ ഒളിമ്പിക് സ്നോബോർഡർ റയാൻ വെഡ്ഡിംഗ് നയിക്കുന്ന മയക്കുമരുന്ന് സംഘത്തിലെ കണ്ണികളാണിവർ.
കഴിഞ്ഞ വർഷം പുറത്തുവിട്ട യു.എസ്. കുറ്റപത്രം അനുസരിച്ച്, കൊളംബിയയിൽ നിന്ന് മെക്സിക്കോ, തെക്കൻ കാലിഫോർണിയ എന്നിവിടങ്ങളിലൂടെ കാനഡയിലേക്കും യു.എസ്സിലെ മറ്റ് ഭാഗങ്ങളിലേക്കും 1,800 കിലോഗ്രാം കൊക്കെയ്ൻ ഉൾപ്പെടെയുള്ള മയക്കുമരുന്നുകൾ ഒരു ശൃംഖല വഴി കടത്തിയെന്നാണ് എഫ്.ബി.ഐ. ആരോപിക്കുന്നത്. വിതരണക്കാർ, ഡ്രൈവർമാർ, സംഭരണ കേന്ദ്രങ്ങൾ എന്നിവ ഉൾപ്പെടുന്ന ഒരു വലിയ ശൃംഖലയാണ് ഇതിനു പിന്നിൽ പ്രവർത്തിച്ചിരുന്നത്.
ഈ കുറ്റകൃത്യത്തിൽ പങ്കാളികളായ റോവാളും വിർക്കും 2024 ഓഗസ്റ്റിൽ മിഷിഗണിലെ പോർട്ട് ഹൂറോണിൽ നിന്ന് കാനഡയിലേക്ക് കടക്കാൻ ശ്രമിക്കുന്നതിനിടെയാണ് അറസ്റ്റിലായത്. ട്രക്കിൽ സ്റ്റീൽ ബാറുകളാണ് കൊണ്ടുപോകുന്നതെന്നാണ് ഇവർ അതിർത്തി ഉദ്യോഗസ്ഥരോട് പറഞ്ഞിരുന്നത്. എന്നാൽ എക്സ്-റേ പരിശോധനയിൽ ട്രെയിലറിനുള്ളിൽ അസ്വാഭാവികതകൾ കണ്ടെത്തുകയും, കൂടുതൽ പരിശോധനയിൽ രഹസ്യ അറയിൽ കൊക്കെയ്നും ഹെറോയിനും കണ്ടെത്തുകയും ചെയ്തു.
ഇതിനുമുമ്പും ഇവർ മയക്കുമരുന്ന് കടത്താൻ ശ്രമിച്ചതിന്റെ വിവരങ്ങൾ കുറ്റസമ്മത കരാറിൽ വിശദീകരിക്കുന്നുണ്ട്. 2024 ഏപ്രിലിൽ കാലിഫോർണിയയിൽ നിന്ന് കാനഡയിലേക്ക് മയക്കുമരുന്ന് കൊണ്ടുപോകാൻ ഇവർക്ക് കരാർ ലഭിച്ചിരുന്നു. എന്നാൽ 347 കിലോഗ്രാം കൊക്കെയ്ൻ കൊണ്ടുപോകാൻ ട്രക്കിൽ സ്ഥലമില്ലെന്ന് കണ്ടെത്തിയതിനെ തുടർന്ന് ആ ഇടപാട് റദ്ദാക്കുകയായിരുന്നു.
അതേസമയം, “ഓപ്പറേഷൻ ജയന്റ് സ്ലാലോമിൽ” ഉൾപ്പെട്ട ഭൂരിഭാഗം പേരും പിടിയിലായെങ്കിലും, മയക്കുമരുന്ന് സാമ്രാജ്യത്തിന്റെ തലവനെന്ന് ആരോപിക്കപ്പെടുന്ന വെഡ്ഡിംഗ് ഇപ്പോഴും ഒളിവിലാണ്. വെഡ്ഡിംഗ് മെക്സിക്കോയിലുണ്ടെന്നാണ് എഫ്.ബി.ഐ. കരുതുന്നതെന്ന് വക്താവ് ലോറ എയ്മിലർ പറഞ്ഞു.
Plea agreement sheds new light on how 2 Canadian truckers smuggled drugs across border for Ryan Wedding
