ഒട്ടാവ: കാനഡയിലെ വിദേശ തൊഴിലാളി നിയമങ്ങളിൽ പ്രധാന മാറ്റങ്ങൾ വരുത്തിക്കൊണ്ട് ലേബർ മാർക്കറ്റ് ഇംപാക്ട് അസസ്മെന്റ് (LMIA) സംബന്ധിച്ച പുതിയ പരിഷ്കാരങ്ങൾ പ്രാബല്യത്തിൽ വന്നു. താൽക്കാലിക വിദേശ തൊഴിലാളി പ്രോഗ്രാമിന് (TFWP) കീഴിൽ കുറഞ്ഞ വേതനമുള്ള തസ്തികകളിലേക്ക് അപേക്ഷിക്കുന്നവരെയാണ് ഈ പുതിയ നിയമങ്ങൾ പ്രധാനമായും ബാധിക്കുന്നത്. 2026 ഏപ്രിൽ 1 മുതലാണ് പരിഷ്കാരങ്ങൾ പ്രാബല്യത്തിൽ വന്നത്.
പുതിയ നിയമപ്രകാരം, കുറഞ്ഞ വേതനമുള്ള (Low-wage) ജോലികൾക്ക് എൽ.എം.ഐ.എ അപേക്ഷ സമർപ്പിക്കുന്നതിന് മുൻപായി കുറഞ്ഞത് എട്ട് ആഴ്ച തുടർച്ചയായി ജോലി പരസ്യം നൽകണം. നേരത്തെ ഇത് നാല് ആഴ്ചയായിരുന്നു. പ്രാദേശിക ഉദ്യോഗാർത്ഥികൾക്ക് മുൻഗണന നൽകുന്നതിന്റെ ഭാഗമായാണ് നടപടി. ഒന്റാരിയോ, ആൽബർട്ട, ബ്രിട്ടീഷ് കൊളംബിയ തുടങ്ങിയ പ്രവിശ്യകളിൽ നിശ്ചയിച്ചിട്ടുള്ള നിശ്ചിത വേതന പരിധിക്ക് താഴെയുള്ള ജോലികളെയാണ് ഈ നിയമം ബാധിക്കുക. എന്നാൽ ഉയർന്ന വേതനമുള്ള തസ്തികകൾക്ക് പഴയതുപോലെ നാല് ആഴ്ചത്തെ പരസ്യം മതിയാകും.
കാനഡയിലെ യുവാക്കൾക്ക് തൊഴിലവസരങ്ങൾ ഉറപ്പാക്കാൻ പ്രത്യേക റിക്രൂട്ട്മെന്റ് പ്രവർത്തനങ്ങൾ നടത്തണമെന്നതാണ് മറ്റൊരു പ്രധാന നിർദ്ദേശം. സ്കൂളുകൾ, കോളേജുകൾ, ജോബ് ബാങ്ക് യൂത്ത് സെക്ഷൻ തുടങ്ങിയവ വഴി യുവാക്കളെ ലക്ഷ്യമിട്ട് തൊഴിൽ വാർത്തകൾ പ്രചരിപ്പിക്കണം. ഇതിന്റെ രേഖകൾ തൊഴിലുടമകൾ ആറ് വർഷം വരെ സൂക്ഷിക്കേണ്ടതുണ്ട്. നിയമലംഘനം നടത്തുന്ന തൊഴിലുടമകൾക്ക് ഒരു ലക്ഷം ഡോളർ വരെ പിഴയും രണ്ടു വർഷം വരെ വിലക്കും ഏർപ്പെടുത്താൻ പുതിയ ചട്ടത്തിൽ വ്യവസ്ഥയുണ്ട്.
അതേസമയം, ഗ്രാമപ്രദേശങ്ങളിലെ തൊഴിൽക്ഷാമം പരിഹരിക്കുന്നതിനായി 2027 മാർച്ച് 31 വരെ സർക്കാർ ചില ഇളവുകൾ പ്രഖ്യാപിച്ചിട്ടുണ്ട്. ഇത്തരം മേഖലകളിൽ കുറഞ്ഞ വേതനമുള്ള വിദേശ തൊഴിലാളികളുടെ പരിധി 10 ശതമാനത്തിൽ നിന്ന് 15 ശതമാനമായി ഉയർത്തി. സെൻസസ് മെട്രോപൊളിറ്റൻ ഏരിയകൾക്ക് പുറത്തുള്ള പ്രദേശങ്ങൾക്കാണ് ഈ ആനുകൂല്യം ലഭിക്കുക. ഓരോ ജോലി ഒഴിവിലേക്കുമുള്ള എൽ.എം.ഐ.എ അപേക്ഷയ്ക്ക് 1000 ഡോളറാണ് നിലവിലെ ഫീസ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada revises LMIA rules; new law takes effect, giving priority to indigenous youth
