ഒന്റാരിയോ; കാനഡയിൽ 2027ലെ സ്ഥിരതാമസ (PR) നടപടികളിൽ ഏത് വിഭാഗത്തിലുള്ള വിദഗ്ധ തൊഴിലാളികൾക്ക് മുൻഗണന നൽകണമെന്നതിൽ മാറ്റം വരുത്താനുള്ള നടപടികൾക്ക് ഫെഡറൽ സർക്കാർ തുടക്കമിട്ടു. ഇതിന്റെ ഭാഗമായി ഓഗസ്റ്റ് 4 മുതൽ സെപ്റ്റംബർ 1 വരെ പൊതുജനാഭിപ്രായം തേടുന്ന സർവേയാണ് ഇമിഗ്രേഷൻ, റഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) നടത്തുന്നത്. യുഎസിലെ H-1B വിസ ഉടമകൾ, ഗവേഷകർ, സർക്കാരിന്റെ International Talent Attraction Strategy (ITAS)യുമായി ബന്ധപ്പെട്ട വിദേശ പ്രതിഭകൾ, Temporary Foreign Worker Program (TFWP)യിലെ Global Talent Stream (GTS) വഴി എത്തുന്ന വിദഗ്ധർ എന്നിവയാണ് പ്രധാന പരിഗണനാ വിഭാഗങ്ങൾ.
നിലവിലെ Category-Based Selection (CBS) സംവിധാനത്തിൽ മാറ്റം വരുത്തുന്നതിനുള്ള ചർച്ചകളുടെ ഭാഗമാണിത്. ഈ വിഭാഗങ്ങളിൽപ്പെടുന്നവർക്ക് Express Entry വഴി സ്ഥിരതാമസത്തിന് അപേക്ഷിക്കാനുള്ള ക്ഷണം ലഭിക്കാനുള്ള സാധ്യത കൂടുതലായിരിക്കും. 2027ൽ Express Entry വഴി 1,22,000 സ്ഥിരതാമസക്കാരെ സ്വീകരിക്കാനാണ് കാനഡ ലക്ഷ്യമിടുന്നത്. അമേരിക്കയിലെ H-1B വിസ ഉടമകളെ, പ്രത്യേകിച്ച് STEM മേഖലയിലെ ഉയർന്ന വൈദഗ്ധ്യമുള്ള തൊഴിലാളികളെ, കാനഡയിലേക്ക് ആകർഷിക്കുന്നതിനാണ് ഒരു പ്രധാന ശ്രദ്ധ. 2025ൽ യുഎസ് H-1B വിസ ഫീസ് വർധിപ്പിച്ചതിന് പിന്നാലെ അമേരിക്കയിലെ ടെക് പ്രതിഭകളെ കാനഡയിലേക്ക് എത്തിക്കാനുള്ള പദ്ധതികൾ പ്രധാനമന്ത്രി മാർക്ക് കാർണി സൂചിപ്പിച്ചിരുന്നു.
വേഗത്തിലുള്ള കുടിയേറ്റ പാത
2025ലെ ബജറ്റിലും H-1B വിസ ഉടമകൾക്കായി വേഗത്തിലുള്ള കുടിയേറ്റ പാത ഒരുക്കാനുള്ള പദ്ധതി സർക്കാർ പ്രഖ്യാപിച്ചിരുന്നു. ഗവേഷകരുടെ കാര്യത്തിൽ AI, ക്വാണ്ടം സാങ്കേതികവിദ്യ, സൈബർ സുരക്ഷ, ആരോഗ്യം, ബയോടെക്നോളജി, ശുദ്ധസാങ്കേതികവിദ്യ, കാലാവസ്ഥാ പ്രതിരോധം, ഭക്ഷ്യ-ജല സുരക്ഷ, നിർമാണം, പ്രതിരോധ സാങ്കേതികവിദ്യ തുടങ്ങിയ മേഖലകളിലെ പ്രതിഭകൾക്ക് മുൻഗണന നൽകുന്നതാണ് പരിഗണന. ഗവേഷകർക്ക് കാനഡയിലെ പ്രവൃത്തിപരിചയം നിർബന്ധമാക്കണമോ എന്നതും സർവേയിൽ അഭിപ്രായത്തിനായി ഉന്നയിച്ചിട്ടുണ്ട്.
READ MORE ; കാനഡ ഇമിഗ്രേഷൻ; എക്സ്പ്രസ് എൻട്രി പൂളിൽ 5 പുതിയ ട്രെൻഡുകൾ ഇതാ, CRS സ്കോറിലും മാറ്റങ്ങൾക്ക് സാധ്യത
നിലവിൽ കാനഡയിലെ പ്രവൃത്തിപരിചയമുള്ള സർവകലാശാല അധ്യാപകരും ഗവേഷണ സഹായികളും ഉൾപ്പെടുന്ന പ്രത്യേക വിഭാഗം Express Entryയിലുണ്ട്. മൂന്നാമത്തെ ശ്രദ്ധാകേന്ദ്രമായ ITAS, ലോകത്തിന്റെ വിവിധ ഭാഗങ്ങളിൽ നിന്നുള്ള ഉയർന്ന യോഗ്യതയുള്ള ഗവേഷകരെ കാനഡയിലെത്തിക്കാനുള്ള പദ്ധതിയുമായി ബന്ധപ്പെട്ടതാണ്. ഗവേഷണ ചെയറുകൾ, ഡോക്ടറൽ വിദ്യാർഥികൾ, പോസ്റ്റ്-ഡോക്ടറൽ ഫെല്ലോകൾ, ഇന്റർനാഷണൽ അസിസ്റ്റന്റ് പ്രൊഫസർമാർ എന്നിവരെ ഇതിൽ പരിഗണിക്കുന്നുണ്ട്. ഉയർന്നുവരുന്ന സാങ്കേതികവിദ്യകൾ, ആരോഗ്യമേഖല, നൈപുണ്യ തൊഴിലുകൾ എന്നിവയിൽ നിന്നുള്ള വിദഗ്ധർക്ക് ഇതുവഴി മുൻഗണന ലഭിക്കാം.
അതിവേഗ വർക്ക് പെർമിറ്റ്
അതേസമയം Global Talent Stream വഴി എത്തുന്ന വിദഗ്ധരും പുതിയ മുൻഗണനാ സംവിധാനത്തിന്റെ ഭാഗമാകാനാണ് സാധ്യത. അതിവേഗ വർക്ക് പെർമിറ്റ് നടപടികൾക്ക് പേരുകേട്ട GTS-ൽ AI വിദഗ്ധർക്കായി പ്രത്യേക പാത ഒരുക്കാനുള്ള പദ്ധതിയും സർക്കാർ മുന്നോട്ടുവച്ചിട്ടുണ്ട്. GTS വിഭാഗം Bയിലെ 22 യോഗ്യതയുള്ള തൊഴിലുകളിൽ ഭൂരിഭാഗവും STEM, പ്രത്യേകിച്ച് കമ്പ്യൂട്ടർ സയൻസ്, ഐ.ടി. മേഖലകളിലാണ്. നിലവിലുള്ള 10 Category-Based Selection വിഭാഗങ്ങളിൽ 2026ൽ രണ്ടെണ്ണം—STEM, കാനഡയിലെ പ്രവൃത്തിപരിചയമുള്ള ഗവേഷകർ—വലിയ രീതിയിൽ ഉപയോഗിക്കപ്പെട്ടിട്ടില്ല. ട്രേഡ്സ്, ട്രാൻസ്പോർട്ട്, സ്കിൽഡ് മിലിട്ടറി റിക്രൂട്ട്സ് വിഭാഗങ്ങളിൽ ഓരോ തവണ മാത്രമാണ് ക്ഷണം നൽകിയത്.
2027ൽ നിലവിലെ വിഭാഗങ്ങൾ തുടരണോ, ഏതൊക്കെ വിഭാഗങ്ങൾക്ക് കൂടുതൽ പ്രാധാന്യം നൽകണമോ, വിഭാഗങ്ങളുടെ എണ്ണം കുറച്ച് കൂടുതൽ ലക്ഷ്യബദ്ധമായ തിരഞ്ഞെടുപ്പ് നടത്തണമോ തുടങ്ങിയ കാര്യങ്ങളിലും സർക്കാർ അഭിപ്രായം തേടുന്നുണ്ട്. അതേസമയം Express Entry സംവിധാനത്തിൽ കൂടുതൽ വ്യാപകമായ പരിഷ്കാരങ്ങളും IRCC പരിഗണിക്കുന്നുണ്ട്. നിലവിലെ മൂന്ന് പ്രോഗ്രാമുകൾ ഒഴിവാക്കി ഒറ്റ streamlined പ്രോഗ്രാമിലേക്ക് മാറാനും ഉയർന്ന ശമ്പളമുള്ള തൊഴിലുകൾക്ക് CRS പോയിന്റുകളിൽ കൂടുതൽ മുൻഗണന നൽകാനുമുള്ള നിർദേശങ്ങൾ ഇതിനകം മുന്നിലുണ്ട്. ഈ മാറ്റങ്ങൾ ഘട്ടംഘട്ടമായി നടപ്പാക്കാനാണ് നീക്കം. 2027ലെ PR മുൻഗണനകൾ സംബന്ധിച്ച പൊതുജനാഭിപ്രായ സർവേയുടെ ഫലം എപ്പോൾ പുറത്തുവിടുമെന്ന് സർക്കാർ ഇതുവരെ വ്യക്തമാക്കിയിട്ടില്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
