ഹാലിഫാക്സ്: നോവ സ്കോഷ്യ പ്രവിശ്യയിലേക്ക് കുടിയേറാൻ ആഗ്രഹിക്കുന്നവർക്ക് തിരിച്ചടിയായി സർക്കാരിന്റെ പുതിയ തീരുമാനം. നോവ സ്കോഷ്യ പ്രൊവിൻഷ്യൽ നോമിനി പ്രോഗ്രാമിന് (എൻ.എസ്.പി.എൻ.പി) കീഴിലുള്ള അപേക്ഷകൾക്ക് സെപ്റ്റംബർ 1 മുതൽ ഫീസ് ഏർപ്പെടുത്താൻ സർക്കാർ തീരുമാനിച്ചതായി റിപ്പോർട്ട്. സ്കിൽഡ് വർക്കർ, നോവ സ്കോഷ്യ ഗ്രാജുവേറ്റ്, നോവ സ്കോഷ്യ എക്സ്പ്രസ് എൻട്രി തുടങ്ങിയ വർക്കർ സ്ട്രീമുകളിൽ അസസ്മെന്റിനായി തെരഞ്ഞെടുക്കപ്പെടുന്നവർ 1,000 കനേഡിയൻ ഡോളർ അപേക്ഷാ ഫീസായി നൽകണം. അതേസമയം എന്റർപ്രണർ സ്ട്രീമിന് 2,000 കനേഡിയൻ ഡോളറാണ് ഫീസ്. എക്സ്പ്രഷൻ ഓഫ് ഇന്ററസ്റ്റ് സമർപ്പിക്കുന്നതിന് നിലവിൽ ഫീസില്ല.
പ്രോഗ്രാം നടത്തിപ്പും അസസ്മെന്റ് പ്രക്രിയകളും കൂടുതൽ കാര്യക്ഷമമാക്കുന്നതിനും അപേക്ഷകളുടെ ഗുണനിലവാരം ഉറപ്പുവരുത്തുന്നതിനുമാണ് ഫീസ് ഏർപ്പെടുത്തുന്നതെന്ന് തൊഴിൽ, നൈപുണ്യ, കുടിയേറ്റ വകുപ്പ് വ്യക്തമാക്കി. കാനഡയിലെ ഭൂരിഭാഗം പ്രവിശ്യകളും നിലവിൽ അപേക്ഷാ ഫീസ് ഈടാക്കുന്നുണ്ട്. സെപ്റ്റംബർ ഒന്നിന് മുൻപ് താൽപ്പര്യ പത്രം നൽകിയവരാണെങ്കിലും അതിനുശേഷമാണ് അസസ്മെന്റിനായി തിരഞ്ഞെടുക്കപ്പെടുന്നതെങ്കിൽ പുതിയ ഫീസ് നൽകേണ്ടിവരും. അതേസമയം സെപ്റ്റംബർ ഒന്നിന് മുൻപ് സെലക്ഷൻ ലെറ്റർ ലഭിച്ചവരെ ഇതിൽ നിന്ന് ഒഴിവാക്കിയിട്ടുണ്ട്.
പുതിയ ഫീസ് നിരക്കുകൾ നിലവിൽ വന്നാലും അപേക്ഷകർക്ക് പ്രത്യേക മുൻഗണനയോ നോമിനേഷൻ ലഭിക്കാനുള്ള സാധ്യത വർധിക്കുകയോ ഇല്ലെന്ന് സർക്കാർ വ്യക്തമാക്കുന്നു. ഓന്റാറിയോ, ആൽബർട്ട എന്നീ വലിയ പ്രവിശ്യകളുമായി താരതമ്യം ചെയ്യുമ്പോൾ നോവ സ്കോഷ്യയിലെ ഫീസ് നിരക്കുകൾ മിതമായ നിലവാരത്തിലാണ്. അതേസമയം അറ്റ്ലാന്റിക് ഇമിഗ്രേഷൻ പ്രോഗ്രാമിന് (എ.ഐ.പി) ഈ ഫീസ് ബാധകമല്ലെന്നും അത് സൗജന്യമായി തുടരുമെന്നും അധികൃതർ കൂട്ടിച്ചേർത്തു.
Nova Scotia Nominee Program Application Fee Starts September 1
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
