ഒട്ടാവ: കാനഡയിലെ തപാൽ സേവന രംഗത്ത് വലിയ മാറ്റങ്ങളുമായി കാനഡ പോസ്റ്റ് രംഗത്തെത്തിയിരിക്കുകയാണ്. സാമ്പത്തിക ഭദ്രത ഉറപ്പാക്കുന്നതിനും തപാൽ സേവനം കൂടുതൽ ആധുനികവൽക്കരിക്കുന്നതിനുമായി വീട്ടുപടിക്കൽ നേരിട്ട് തപാൽ എത്തിക്കുന്ന ‘ഡോർ-ടു-ഡോർ’ ഡെലിവറി സേവനം ഘട്ടംഘട്ടമായി നിർത്തലാക്കാൻ തീരുമാനിച്ചു. ഇതിനു പകരമായി കമ്മ്യൂണിറ്റി മെയിൽബോക്സുകൾ ഏർപ്പെടുത്താനാണ് കാനഡ പോസ്റ്റിന്റെ തീരുമാനം.
2027-ഓടെ രാജ്യത്തുടനീളമുള്ള അധികം വരുന്ന 4,85,000 വിലാസങ്ങളിലേക്ക് കൂടി ഈ പുതിയ സംവിധാനം വ്യാപിപ്പിക്കുമെന്ന് കാനഡ പോസ്റ്റ് ഔദ്യോഗികമായി അറിയിച്ചു. 2026-ന്റെ അവസാനത്തിലോ 2027-ന്റെ തുടക്കത്തിലോ ആയി 1,36,000 വിലാസങ്ങളിൽ കൂടി കമ്മ്യൂണിറ്റി മെയിൽബോക്സുകൾ സ്ഥാപിക്കാൻ നേരത്തെ തന്നെ തീരുമാനിച്ചിരുന്നു.
തപാൽ സാധനങ്ങൾ വീടുകളിൽ നേരിട്ട് എത്തിക്കുന്നതിന് പകരം നിശ്ചിത കേന്ദ്രങ്ങളിൽ സ്ഥാപിച്ചിട്ടുള്ള സുരക്ഷിതമായ കമ്മ്യൂണിറ്റി മെയിൽബോക്സുകളിൽ എത്തിക്കുന്നതാണ് പുതിയ രീതി. കാനഡ പോസ്റ്റിന്റെ പ്രവർത്തനച്ചെലവ് കുറയ്ക്കുകയും സാമ്പത്തികമായി സ്വയംപര്യാപ്തമാവുകയും ചെയ്യുക എന്നതാണ് ഈ പരിഷ്കാരത്തിലൂടെ ലക്ഷ്യമിടുന്നത്. ഈ മാറ്റത്തിലൂടെ തപാൽ സാധനങ്ങൾ കൂടുതൽ സുരക്ഷിതമായി സൂക്ഷിക്കാൻ കഴിയുമെന്ന് അധികൃതർ അവകാശപ്പെടുന്നു. വരും ദിവസങ്ങളിൽ ബന്ധപ്പെട്ട കമ്മ്യൂണിറ്റികളിലെ അധികൃതരുമായി കാനഡ പോസ്റ്റ് ചർച്ചകൾ ആരംഭിക്കും. നിലവിൽ കാനഡയിലെ നാലിൽ മൂന്ന് ഭാഗം വിലാസങ്ങളിലും കമ്മ്യൂണിറ്റി മെയിൽബോക്സുകൾ വഴിയാണ് തപാൽ സേവനം ലഭ്യമാക്കുന്നത്. വരും വർഷങ്ങളിൽ ഘട്ടംഘട്ടമായി ഡോർ-ടു-ഡോർ സേവനം പൂർണ്ണമായും ഒഴിവാക്കാനാണ് കാനഡ പോസ്റ്റിന്റെ പദ്ധതി.
Canada Post announces nearly 500K addresses to lose home delivery
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
