കടുത്ത ചൂടിൽ ഉരുകി കാനഡ; നഗരങ്ങൾക്ക് കാലാവസ്ഥാ വ്യതിയാനം വരുത്തുന്നത് വൻ സാമ്പത്തിക ബാധ്യതയെന്ന് റിപ്പോർട്ട്

ഒട്ടാവ: ആഗോളതാപനത്തെ തുടർന്നുണ്ടാകുന്ന കഠിനമായ ചൂട് കാനഡയിലെ നഗരങ്ങൾക്ക് വലിയ സാമ്പത്തിക ബാധ്യത വരുത്തിവെക്കുന്നതായി റിപ്പോർട്ട്. കടുത്ത ചൂടിൽ ഒന്റാറിയോയിലെ ഹൈവേ 402 തുടർച്ചയായ രണ്ടാം വർഷവും തകരുകയും ട്രെയിൻ സർവീസുകൾ വേഗത കുറയ്‌ക്കേണ്ടി വരികയും ചെയ്ത സാഹചര്യത്തിലാണ് അടിസ്ഥാന സൗകര്യങ്ങൾ കാലാവസ്ഥാ സൗഹൃദമാക്കണമെന്ന നിർദ്ദേശം വിദഗ്ദ്ധർ മുന്നോട്ടുവെക്കുന്നത്. നിലവിലെ അടിസ്ഥാന സൗകര്യങ്ങൾ താങ്ങാൻ കഴിയുന്നതിലും ഉയർന്ന താപനിലയാണ് ഇപ്പോൾ അനുഭവപ്പെടുന്നതെന്ന് കനേഡിയൻ ക്ലൈമറ്റ് ഇൻസ്റ്റിറ്റ്യൂട്ടിലെ അഡാപ്റ്റേഷൻ ഡയറക്ടർ റയാൻ നെസ്സ് വ്യക്തമാക്കി.

കനേഡിയൻ ക്ലൈമറ്റ് ഇൻസ്റ്റിറ്റ്യൂട്ട് പുറത്തുവിട്ട ‘പ്രിപ്പയർ ഓർ റിപ്പയർ’ എന്ന റിപ്പോർട്ട് പ്രകാരം, അടിസ്ഥാന സൗകര്യങ്ങൾ കാലാവസ്ഥാ വ്യതിയാനത്തെ പ്രതിരോധിക്കുന്ന രീതിയിൽ മാറ്റിയെടുത്താൽ നഗരങ്ങൾക്ക് പ്രതിവർഷം കോടിക്കണക്കിന് ഡോളർ ലാഭിക്കാൻ സാധിക്കും. കാനഡ അടുത്ത 75 വർഷത്തേക്ക് അടിസ്ഥാന സൗകര്യങ്ങളുടെ അറ്റകുറ്റപ്പണികൾക്കായി പ്രതിവർഷം ശരാശരി 1,510 കോടി ഡോളർ ചെലവഴിക്കേണ്ടി വരുമെന്നാണ് കണക്കാക്കുന്നത്. എന്നാൽ, മുൻകൂട്ടി പ്രതിരോധ നടപടികൾക്കായി 410 കോടി ഡോളർ നിക്ഷേപിച്ചാൽ, കാലാവസ്ഥാ വ്യതിയാനം മൂലമുള്ള നാശനഷ്ടങ്ങൾ പ്രതിവർഷം 250 കോടി ഡോളറായി കുറയ്ക്കാൻ സാധിക്കും. ഇതിലൂടെ രാജ്യത്തിന് പ്രതിവർഷം 860 കോടി ഡോളർ ലാഭിക്കാമെന്നും റിപ്പോർട്ടിൽ പറയുന്നു.

റോഡുകളുടെ നിർമ്മാണത്തിലാണ് സർക്കാരുകൾ ആദ്യം ശ്രദ്ധ കേന്ദ്രീകരിക്കേണ്ടതെന്ന് റയാൻ നെസ്സ് ചൂണ്ടിക്കാട്ടി. അറ്റകുറ്റപ്പണികൾ നടത്തുമ്പോൾ ചൂടിനെ പ്രതിരോധിക്കുന്ന അസ്ഫാൽറ്റ് ഉപയോഗിക്കുന്നത് റോഡുകളുടെ തകർച്ചയും സാമ്പത്തിക നഷ്ടവും കുറയ്ക്കും. റോഡുകൾ, ഓടകൾ, പാലങ്ങൾ എന്നിവയുടെ ഉടമസ്ഥാവകാശം നികുതി വരുമാനവും ഫണ്ടും കുറവുള്ള മുൻസിപ്പൽ സർക്കാരുകൾക്കാണെന്നത് പ്രതിരോധ നിക്ഷേപങ്ങൾക്ക് വലിയ തടസ്സമാകുന്നുണ്ടെന്നും അദ്ദേഹം വിലയിരുത്തി. തദ്ദേശ സ്ഥാപനങ്ങൾക്ക് കൂടുതൽ ഫണ്ടും അധികാരങ്ങളും നൽകേണ്ടത് ഈ സാഹചര്യത്തിൽ അനിവാര്യമാണ്.

കാലാവസ്ഥാ വ്യതിയാനത്തെ പ്രതിരോധിക്കാൻ നിർമ്മാണ മേഖലയിലെ മാറ്റങ്ങൾക്കൊപ്പം നയങ്ങളിലും നിയമങ്ങളിലും മാറ്റം വരുത്തണമെന്ന് യൂണിവേഴ്സിറ്റി ഓഫ് വാട്ടർലൂവിലെ സെന്റർ ഫോർ ക്ലൈമറ്റ് അഡാപ്റ്റേഷനിലെ അനബെല ബൊനാഡ വ്യക്തമാക്കി. വീടുകൾക്കുള്ളിലെ പരമാവധി താപനില 26 ഡിഗ്രി സെൽഷ്യസായി നിജപ്പെടുത്താൻ ഭൂവുടമകൾക്ക് നിർദ്ദേശം നൽകുന്ന നിയമങ്ങൾ മുൻസിപ്പാലിറ്റികൾ നടപ്പിലാക്കണം. നഗരങ്ങളിൽ പാർക്കിങ് ഏരിയകൾ ഉൾപ്പെടെയുള്ള സ്ഥലങ്ങൾ ഒഴിവാക്കി കൂടുതൽ ഹരിതഗൃഹങ്ങളും മരങ്ങളും വച്ചുപിടിപ്പിക്കുന്നത് ചുറ്റുമുള്ള താപനില 2 മുതൽ 15 ഡിഗ്രി സെൽഷ്യസ് വരെ കുറയ്ക്കാൻ സഹായിക്കുമെന്നും വിദഗ്ദ്ധർ ചൂണ്ടിക്കാണിക്കുന്നു.

Canada melts in extreme heat; Report says climate change is causing huge economic burden on cities

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla