ടൊറന്റോ: ബഹിരാകാശ മേഖലയിൽ കേവലം പങ്കാളി എന്ന നിലയിൽ നിന്ന് സ്വന്തമായി ഉപഗ്രഹങ്ങൾ നിർമ്മിച്ച് വിക്ഷേപിക്കാനും അവ സംരക്ഷിക്കാനുമുള്ള പൂർണ്ണ പരമാധികാരത്തിലേക്ക് കാനഡ ചുവടുവെക്കുന്നു. ആർട്ടിക് മേഖലയിലെ സുരക്ഷയും രാജ്യത്തിന്റെ സാമ്പത്തിക ഭദ്രതയും മുൻനിർത്തി പ്രതിരോധ രംഗത്ത് വൻ മാറ്റങ്ങൾക്കാണ് രാജ്യം തയ്യാറെടുക്കുന്നതെന്ന് പ്രമുഖ ബഹിരാകാശ സാങ്കേതികവിദ്യാ കമ്പനിയായ ‘എംഡിഎ സ്പേസ്’ (MDA Space) ചീഫ് എക്സിക്യൂട്ടീവ് ഓഫീസർ (സിഇഒ) മൈക്ക് ഗ്രീൻലി വ്യക്തമാക്കി.
ടൊറന്റോയിൽ നടക്കുന്ന യുഎസ്-കാനഡ ഉച്ചകോടിക്ക് മുന്നോടിയായി നൽകിയ അഭിമുഖത്തിലാണ്, ബഹിരാകാശത്തെ വർദ്ധിച്ചുവരുന്ന വെല്ലുവിളികളെ രാജ്യം എങ്ങനെ നേരിടുന്നു എന്ന് അദ്ദേഹം വ്യക്തമാക്കിയത്. കാനഡാർം (Canadarm) എന്ന റോബോട്ടിക് കൈകളുടെ നിർമ്മാണത്തിലൂടെ പ്രശസ്തമായ എംഡിഎ സ്പേസ്, ഇപ്പോൾ ഉപഗ്രഹ സംവിധാനങ്ങളിലേക്കും പ്രതിരോധ പരിപാടികളിലേക്കും ശ്രദ്ധ കേന്ദ്രീകരിക്കുന്നതിന്റെ പശ്ചാത്തലത്തിലാണ് ഈ നീക്കം.
ഭൂമിയിൽ ടാങ്കുകളോ യുദ്ധക്കപ്പലുകളോ അതിക്രമിച്ചു കയറിയാൽ ജനങ്ങൾക്ക് അത് നേരിട്ട് കാണാനാകും, എന്നാൽ ബഹിരാകാശത്തെ ഭീഷണികൾ അദൃശ്യമാണെന്ന് മൈക്ക് ഗ്രീൻലി ഓർമ്മിപ്പിച്ചു. ബഹിരാകാശ സംവിധാനങ്ങൾക്ക് എന്തെങ്കിലും തകരാർ സംഭവിച്ചാൽ കനേഡിയൻ സമ്പദ്വ്യവസ്ഥയ്ക്ക് പ്രതിദിനം 100 കോടി ഡോളർ വരെ നഷ്ടം നേരിടേണ്ടി വരാം.
ഈ സാഹചര്യത്തിലാണ് സ്വന്തമായി ഉപഗ്രഹങ്ങൾ രൂപകൽപ്പന ചെയ്യാനും നിർമ്മിക്കാനും വിക്ഷേപിക്കാനുമുള്ള ശേഷി കാനഡ കൈവരിക്കുന്നത്. നോവ സ്കോഷ്യ ബഹിരാകാശ നിലയത്തിൽ (Spaceport Nova Scotia) നിന്ന് ഡച്ച് പങ്കാളികളുമായി ചേർന്ന് ഈ ആഴ്ച നടത്തിയ പരീക്ഷണ റോക്കറ്റ് വിക്ഷേപണം ഇതിന്റെ തെളിവാണ്. സ്വന്തമായി വിക്ഷേപണ തറയുള്ളത് അന്താരാഷ്ട്ര വിപണിയിൽ കാനഡയുടെ സ്വാധീനം വർദ്ധിപ്പിക്കുമെന്നും അദ്ദേഹം കൂട്ടിച്ചേർത്തു.
വിശാലമായ ആർട്ടിക് മേഖലയുടെ സുരക്ഷയ്ക്ക് ബഹിരാകാശ അധിഷ്ഠിത നിരീക്ഷണ സംവിധാനങ്ങൾ അത്യന്താപേക്ഷിതമാണ്. ഉപഗ്രഹങ്ങൾ വഴി ഭീഷണികൾ മുൻകൂട്ടി കണ്ടെത്തുകയും അതിലൂടെ കര, നാവിക, വ്യോമ സേനകളെ കൃത്യസമയത്ത് വിന്യസിക്കുകയുമാണ് രാജ്യം ലക്ഷ്യമിടുന്നത്. ഇതിനായി ഭൂനിരീക്ഷണ ഉപഗ്രഹങ്ങളും ആശയവിനിമയ ശൃംഖലകളും കമ്പനി ഒരുക്കുന്നുണ്ട്. ഈ ഉപഗ്രഹങ്ങളെ ബഹിരാകാശത്തെ ശത്രുപേടകങ്ങളിൽ നിന്ന് സംരക്ഷിക്കുന്നതിനായാണ് ‘എംഡിഎ മിഡ്നൈറ്റ്’ (MDA Midnight) എന്ന അത്യാധുനിക ബഹിരാകാശ പേടകം പ്രഖ്യാപിച്ചിരിക്കുന്നത്.
മറ്റ് പേടകങ്ങളുടെ സാന്നിധ്യം തിരിച്ചറിയാനും, ഇലക്ട്രോണിക് യുദ്ധമുറകളിലൂടെ (Electronic Warfare) അവയെ പ്രതിരോധിക്കാനും അകറ്റി നിർത്താനും ശേഷിയുള്ള സങ്കേതികവിദ്യയാണ് മിഡ്നൈറ്റിലുള്ളത്. വടക്കേ അമേരിക്കൻ ഭൂഖണ്ഡത്തിന്റെ കൂട്ടായ പ്രതിരോധത്തിനായി അമേരിക്കയുമായി ചേർന്നുള്ള സഖ്യത്തിൽ കാനഡയുടെ ഈ പരമാധികാര ബഹിരാകാശ സംവിധാനങ്ങൾ വലിയ പങ്കുവഹിക്കും. അമേരിക്കൻ പ്രതിരോധ വകുപ്പിന്റെയും നാസയുടെയും വാണിജ്യ കമ്പനികളുടെയും വിശ്വസ്ത പങ്കാളിയായി എംഡിഎ സ്പേസ് പതിറ്റാണ്ടുകളായി തുടരുന്നുണ്ട്.
പുതിയ പ്രതിരോധ വ്യാവസായിക നയം അനുസരിച്ച് കനേഡിയൻ കമ്പനികളിലൂടെ ബഹിരാകാശ പ്രതിരോധ രംഗത്ത് രാജ്യം നിക്ഷേപം വർദ്ധിപ്പിക്കുകയാണ്. ബഹിരാകാശത്തെ പുതിയ ഭൗമരാഷ്ട്രീയ സാഹചര്യങ്ങളിൽ, സ്വന്തം സുരക്ഷ ഉറപ്പാക്കുന്നതിനൊപ്പം ആഗോളതലത്തിൽ ശക്തമായ ഒരു പ്രതിരോധ പങ്കാളിയായി കാനഡ മാറുന്ന കാഴ്ചയ്ക്കാണ് വരും ദിവസങ്ങൾ സാക്ഷ്യം വഹിക്കുക.
Canada joins the United States in space defense
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
