ഒട്ടാവ: കാനഡയിൽ സ്ഥിരതാമസം (Permanent Residency) ആഗ്രഹിക്കുന്ന പ്രവാസികൾക്ക് വലിയ തിരിച്ചടിയായി അപേക്ഷാ ഫീസുകൾ വർദ്ധിപ്പിച്ചു. 2026 ഏപ്രിൽ 30 മുതൽ പ്രാബല്യത്തിൽ വന്ന പുതിയ പരിഷ്കാരം അനുസരിച്ച് എക്സ്പ്രസ് എൻട്രി, പ്രൊവിൻഷ്യൽ നോമിനി പ്രോഗ്രാം (PNP), ഫാമിലി സ്പോൺസർഷിപ്പ് തുടങ്ങി എല്ലാ പ്രധാന കുടിയേറ്റ വിഭാഗങ്ങളിലും ഫീസ് വർദ്ധനവ് ഉണ്ടായിട്ടുണ്ട്. മൊത്തത്തിലുള്ള അപേക്ഷാ നിരക്കുകളിൽ ഏകദേശം 4 മുതൽ 6 ശതമാനം വരെ വർദ്ധനവാണ് ഇമിഗ്രേഷൻ വിഭാഗം വരുത്തിയിരിക്കുന്നത്. ഇതിൽ ഫാമിലി സ്പോൺസർഷിപ്പ് വിഭാഗത്തിലാണ് ഏറ്റവും വലിയ വർദ്ധനവ് രേഖപ്പെടുത്തിയിരിക്കുന്നത്.
പുതുക്കിയ നിരക്കുകൾ പ്രകാരം പ്രധാന അപേക്ഷകന്റെ പ്രോസസിംഗ് ഫീസ് 950 ഡോളറിൽ നിന്നും 990 ഡോളറായി ഉയർന്നു. റൈറ്റ് ഓഫ് പെർമനന്റ് റെസിഡൻസ് ഫീ (RPRF) 575 ഡോളറിൽ നിന്നും 600 ഡോളറായി വർദ്ധിപ്പിച്ചിട്ടുണ്ട്. ബിസിനസ് ക്ലാസ് അപേക്ഷകർക്ക് ഇനി മുതൽ 1,895 ഡോളർ നൽകേണ്ടി വരും. കുടുംബങ്ങൾ ഒന്നിക്കുന്ന സ്പോൺസർഷിപ്പ് പദ്ധതിയിൽ സ്പോൺസർഷിപ്പ് ഫീസ് 90 ഡോളറായും സ്പോൺസർ ചെയ്യപ്പെടുന്ന വ്യക്തിയുടെ ഫീസ് 570 ഡോളറായും പരിഷ്കരിച്ചു. കുട്ടികളുടെ അപേക്ഷാ ഫീസിലും ചെറിയ വർദ്ധനവ് പ്രഖ്യാപിച്ചിട്ടുണ്ട്.
ഏപ്രിൽ 30-ന് മുൻപ് അപേക്ഷ സമർപ്പിച്ചവർ പഴയ നിരക്ക് തുടരുമെങ്കിലും, റൈറ്റ് ഓഫ് പെർമനന്റ് റെസിഡൻസ് ഫീ (RPRF) മാറ്റിവെച്ചവർക്ക് ഇനി പുതിയ നിരക്കായ 600 ഡോളർ തന്നെ നൽകേണ്ടി വരുമെന്നത് ശ്രദ്ധേയമാണ്. അപേക്ഷ സമർപ്പിച്ച തീയതിയല്ല, മറിച്ച് ഫീസ് അടയ്ക്കുന്ന സമയത്തെ നിരക്കാണ് ഈ വിഭാഗത്തിന് ബാധകമാകുക. ഓൺലൈൻ വഴി അപേക്ഷ സമർപ്പിച്ചവർക്ക് നിലവിൽ ആശങ്കപ്പെടേണ്ട സാഹചര്യമില്ല. എന്നാൽ തപാൽ വഴി അപേക്ഷ അയച്ചവർക്ക് ഫീസിൽ കുറവുണ്ടെങ്കിൽ ഐ.ആർ.സി.സി (IRCC) നേരിട്ട് നിർദ്ദേശങ്ങൾ നൽകുന്നതാണ്. കാനഡയിലേക്കുള്ള കുടിയേറ്റ ചിലവ് ഓരോ വർഷം കൂടുമ്പോഴും വർദ്ധിക്കുന്നത് കുടിയേറ്റക്കാരെ കാര്യമായി ബാധിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada hikes permanent resident fees
