ഒട്ടാവ: കാനഡയിൽ ഉപരിപഠനം നടത്തി അവിടെ സ്ഥിരതാമസമാക്കാൻ ആഗ്രഹിക്കുന്ന ഫ്രഞ്ച് സംസാരിക്കുന്ന വിദ്യാർത്ഥികൾക്ക് സന്തോഷവാർത്ത. ക്യുബക്കിന് പുറത്തുള്ള പ്രദേശങ്ങളിൽ പഠിക്കാനും പിന്നീട് നേരിട്ട് സ്ഥിരതാമസത്തിന് (Permanent Residence – PR) അപേക്ഷിക്കാനും സൗകര്യമൊരുക്കുന്ന ‘ഫ്രാങ്കോഫോൺ മൈനോറിറ്റി കമ്മ്യൂണിറ്റീസ് സ്റ്റുഡന്റ് പൈലറ്റ്’ (FMCSP) പദ്ധതിയുടെ കാലാവധി 2027 ഓഗസ്റ്റ് വരെ നീട്ടിയിരിക്കുകയാണ്.
ഈ പദ്ധതിയുടെ ഏറ്റവും വലിയ പ്രത്യേകത എന്തെന്നാൽ, പഠനം പൂർത്തിയാക്കിയ ശേഷം പിആർ ലഭിക്കുന്നതിനായി ജോബ് ഓഫർ നിർബന്ധമില്ല എന്നതാണ്. സാധാരണഗതിയിൽ സ്റ്റുഡന്റ് പെർമിറ്റിൽ നിന്നും പോസ്റ്റ്-ഗ്രാജുവേഷൻ വർക്ക് പെർമിറ്റിലേക്കും പിന്നീട് എക്സ്പ്രസ് എൻട്രിയിലേക്കും മാറുന്ന സങ്കീർണ്ണമായ രീതിക്ക് പകരമായി, വിദ്യാർത്ഥികൾക്ക് വളരെ എളുപ്പത്തിൽ പിആറിലേക്ക് എത്താനുള്ള വഴിയാണ് ഇതിലൂടെ സർക്കാർ ഒരുക്കുന്നത്. കൂടാതെ, എക്സ്പ്രസ് എൻട്രി ഫ്രഞ്ച് കാറ്റഗറി ഡ്രോകളെ അപേക്ഷിച്ച് വളരെ കുറഞ്ഞ ഫ്രഞ്ച് ഭാഷാ പ്രാവീണ്യം (NCLC ലെവൽ 5) മതിയാകും എന്നതും ഇതിനെ കൂടുതൽ ആകർഷകമാക്കുന്നു.
ഈ പദ്ധതി പ്രയോജനപ്പെടുത്തുന്നതിനായി, കാനഡ സർക്കാർ അംഗീകരിച്ച 17 വിദ്യാഭ്യാസ സ്ഥാപനങ്ങളിൽ (DLI) ഒന്നിൽ അഡ്മിഷൻ നേടുകയും, ചുരുങ്ങിയത് രണ്ട് വർഷത്തെ ഫുൾ-ടൈം പോസ്റ്റ്-സെക്കൻഡറി കോഴ്സിന് ചേരുകയും വേണം. കോഴ്സിന്റെ 50 ശതമാനത്തിലധികം പഠനം ഫ്രഞ്ച് ഭാഷയിലായിരിക്കണം. കൂടാതെ, പഠനത്തിനുള്ള ട്യൂഷൻ ഫീസും ജീവിതച്ചെലവും വഹിക്കാൻ ആവശ്യമായ സാമ്പത്തിക ശേഷി അപേക്ഷകർ തെളിയിക്കേണ്ടതുണ്ട്. അപേക്ഷിക്കുമ്പോൾ വിദ്യാർത്ഥി കാനഡയ്ക്ക് പുറത്തായിരിക്കണം എന്നതും നിർബന്ധമാണ്.
പഠനം പൂർത്തിയാക്കി പിആർ അപേക്ഷ നൽകുന്ന വിദ്യാർത്ഥികൾക്ക്, അപേക്ഷയുടെ തീർപ്പ് കൽപ്പിക്കുന്നത് വരെ കാനഡയിൽ ജോലി ചെയ്യാനായി പ്രത്യേക വർക്ക് പെർമിറ്റിനും അപേക്ഷിക്കാവുന്നതാണ്. കാനഡയിലെ ഫ്രഞ്ച് സംസാരിക്കുന്നവരുടെ ജനസംഖ്യ 2029-ഓടെ 12 ശതമാനമായി ഉയർത്തുകയെന്ന സർക്കാരിന്റെ ലക്ഷ്യത്തിന്റെ ഭാഗമായാണ് ഈ പദ്ധതി കൂടുതൽ കാലത്തേക്ക് നീട്ടിയത്. ഈ അവസരം പ്രയോജനപ്പെടുത്താൻ ആഗ്രഹിക്കുന്നവർ ഔദ്യോഗിക ഇമിഗ്രേഷൻ വെബ്സൈറ്റ് വഴി കൂടുതൽ വിവരങ്ങൾ പരിശോധിക്കേണ്ടതാണ്.
Canada extends direct-to-permanent-residence pathway for French-speaking students
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
