ഒന്റാരിയോ; കാനഡയിലേക്ക് പുതുതായി കുടിയേറുന്ന ഇന്ത്യക്കാർ അവിടുത്തെ റോഡ് ഗതാഗത നിയമങ്ങളും ഡ്രൈവിംഗ് രീതികളും കൃത്യമായി മനസ്സിലാക്കണമെന്ന് വിദഗ്ധർ മുന്നറിയിപ്പ് നൽകുന്നു. ഇന്ത്യയിൽ നിന്നും വ്യത്യസ്തമായി വലതുവശത്തുകൂടിയുള്ള ഡ്രൈവിംഗ് രീതിയായതിനാലും കാനഡയിലെ മഞ്ഞുകാലത്തെ അപകടസാധ്യതകൾ ഒഴിവാക്കുന്നതിനുമാണ് ഈ ജാഗ്രത നിർദ്ദേശം. 16 വയസ്സ് തികഞ്ഞവർക്ക് മൂന്ന് ഘട്ടങ്ങളിലായി (G1, G2, Full G) ലഭിക്കുന്ന ലൈസൻസ് പ്രക്രിയയിലൂടെയും, സ്വന്തം രാജ്യത്തുനിന്നുള്ള ഇന്റർനാഷണൽ ഡ്രൈവിംഗ് പെർമിറ്റ് (IDP) ഉപയോഗിച്ച് മൂന്ന് മാസം വരെയുമുള്ള ഡ്രൈവിംഗിലൂടെയും പുതിയ യാത്രക്കാർക്ക് കാനഡയിലെ റോഡുകളുമായി പൊരുത്തപ്പെടാം.
ഡ്രൈവിംഗിനിടെയുള്ള മൊബൈൽ ഫോൺ ഉപയോഗത്തിന് കാനഡയിൽ പൂർണ്ണ നിരോധനമുണ്ട്. ഡ്രൈവർ ഉൾപ്പെടെ എല്ലാ യാത്രക്കാർക്കും സീറ്റ് ബെൽറ്റും കുട്ടികൾക്ക് പ്രത്യേക ചൈൽഡ് സീറ്റും നിർബന്ധമാണ്. വാഹനത്തിൽ അനുവദനീയമായ സീറ്റ് ബെൽറ്റുകളുടെ എണ്ണത്തിൽ കൂടുതൽ ആളുകൾ യാത്ര ചെയ്താൽ കനത്ത പിഴ ഈടാക്കും. വേഗത പരിധി ലംഘിക്കുകയോ മറ്റ് ട്രാഫിക് നിയമങ്ങൾ തെറ്റിക്കുകയോ ചെയ്താൽ ‘ഡിമെറിറ്റ് പോയിന്റുകൾ’ ലഭിക്കുകയും, പോയിന്റുകൾ കൂടിയാൽ ലൈസൻസ് റദ്ദാക്കപ്പെടുകയും ചെയ്യും.
ALSO READ ; നാടുകടത്തലിന്റെ വക്കിലും കാനഡയോട് നന്ദി!; റോമാന്റെ 29 വർഷത്തെ ജീവിതം നിയമക്കുരുക്കിൽ
വർഷത്തിൽ പകുതി സമയവും മഞ്ഞുവീഴ്ചയുള്ളതിനാൽ ‘ബ്ലാക്ക് ഐസ്’ മൂലമുള്ള അപകടങ്ങൾ ഒഴിവാക്കാൻ വേഗത കുറയ്ക്കുകയും ‘വിന്റർ ടയറുകൾ’ ഉപയോഗിക്കുകയും വേണം. കൂടാതെ, കാൽനടയാത്രക്കാർക്ക് മുൻഗണന നൽകുന്നതിനൊപ്പം വാഹനം ഓടിക്കുമ്പോൾ ഇൻഷുറൻസ് രേഖകളും ലൈസൻസും കരുതുന്നത് നിർബന്ധവുമാണ്.
ആദ്യഘട്ടത്തിൽ വലതുവശത്തുകൂടിയുള്ള ഡ്രൈവിംഗ് സങ്കീർണ്ണമായി തോന്നാമെങ്കിലും, കൃത്യമായ പരിശീലനത്തിലൂടെയും ജാഗ്രതയിലൂടെയും ആർക്കും ഇത് എളുപ്പത്തിൽ വഴങ്ങും. താമസിക്കുന്ന പ്രവിശ്യയിലെ ഔദ്യോഗിക ഡ്രൈവിംഗ് ഗൈഡുകൾ വായിച്ച് നിയമങ്ങൾ പൂർണ്ണമായി മനസ്സിലാക്കുന്നത് നിങ്ങൾക്ക് സുരക്ഷിതമായ യാത്ര ഉറപ്പാക്കാൻ സഹായിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
