ഓട്ടവ: പിസ്ത കഴിച്ചതിനെ തുടർന്ന് കാനഡയിൽ പടർന്നുപിടിച്ച സാൽമൊണെല്ല ബാക്ടീരിയ രോഗബാധ പൂർണ്ണമായും അവസാനിച്ചതായി പബ്ലിക് ഹെൽത്ത് ഏജൻസി ഓഫ് കാനഡ (PHAC). ഒരു വർഷത്തിലേറെയായി തുടർന്ന അന്വേഷണങ്ങൾക്കൊടുവിലാണ് രോഗവ്യാപനം നിലച്ചതായി ആരോഗ്യ വകുപ്പ് സ്ഥിരീകരിച്ചത്. എന്നാൽ രോഗബാധയ്ക്ക് കാരണമായത് ഇറാനിൽ നിന്ന് ഇറക്കുമതി ചെയ്ത പിസ്തയാണെന്ന് കണ്ടെത്തിയതിനെ തുടർന്ന്, ഇറാനിയൻ പിസ്തകൾക്കും അവ ഉപയോഗിച്ചുണ്ടാക്കുന്ന ഉൽപ്പന്നങ്ങൾക്കും ഏർപ്പെടുത്തിയ നിരോധനം തുടരുമെന്ന് കനേഡിയൻ ഫുഡ് ഇൻസ്പെക്ഷൻ ഏജൻസി വ്യക്തമാക്കി.
2025 മാർച്ചിലാണ് കാനഡയിൽ ആദ്യമായി ഈ രോഗബാധ റിപ്പോർട്ട് ചെയ്യുന്നത്. തുടർന്ന് കാനഡയിലെ ആറ് പ്രവിശ്യകളിലായി ഇരുന്നൂറോളം ആളുകൾക്ക് രോഗം ബാധിച്ചു. ക്യുബെക്ക്, ഒന്റാറിയോ എന്നീ പ്രദേശങ്ങളിലാണ് ഏറ്റവും കൂടുതൽ രോഗികളുണ്ടായത്. പരിശോധനയിൽ പിസ്തയിലും ഇവ ഉപയോഗിച്ച് നിർമ്മിച്ച പ്രശസ്തമായ ദുബായ് സ്റ്റൈൽ ചോക്ലേറ്റുകളിലും സാൽമൊണെല്ല ബാക്ടീരിയയുടെ സാന്നിധ്യം കണ്ടെത്തിയിരുന്നു. രോഗബാധയെ തുടർന്ന് 26 പേരെ ആശുപത്രിയിൽ പ്രവേശിപ്പിച്ചെങ്കിലും ആരും മരണപ്പെട്ടിട്ടില്ല. 2026 മെയ് മാസത്തിലാണ് അവസാനമായി രോഗബാധ സ്ഥിരീകരിച്ചത്.
നിലവിൽ പുതിയ കേസുകളൊന്നും റിപ്പോർട്ട് ചെയ്യാത്തതിനാൽ അന്വേഷണം അവസാനിപ്പിക്കുകയാണെന്ന് അധികൃതർ അറിയിച്ചെങ്കിലും ജനങ്ങൾ ജാഗ്രത പാലിക്കണമെന്ന് മുന്നറിയിപ്പ് നൽകിയിട്ടുണ്ട്. ഇറാനിൽ നിന്നുള്ള പിസ്ത മലിനമാകാൻ സാധ്യതയുള്ളതിനാൽ അവ ഒഴിവാക്കി മറ്റ് ഉൽപ്പന്നങ്ങൾ തിരഞ്ഞെടുക്കാൻ പൊതുജനങ്ങളോട് ആവശ്യപ്പെട്ടിട്ടുണ്ട്. സാധാരണയായി പനി, വയറിളക്കം, ഛർദ്ദി, വയറുവേദന എന്നിവയാണ് സാൽമൊണെല്ലയുടെ പ്രധാന ലക്ഷണങ്ങൾ. ഗർഭിണികൾ, അഞ്ചു വയസ്സിൽ താഴെയുള്ള കുട്ടികൾ, മുതിർന്ന പൗരന്മാർ, പ്രതിരോധശേഷി കുറഞ്ഞവർ എന്നിവരെയാണ് രോഗം ഗുരുതരമായി ബാധിക്കാൻ സാധ്യതയുള്ളത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada declares end to Salmonella outbreak; ban on Iranian pistachios to continue.
