ഒട്ടാവ: കാനഡയിലെ സ്ഥിരതാമസത്തിന് ശ്രമിക്കുന്ന ഇന്ത്യക്കാർക്ക് കനത്ത തിരിച്ചടി. കുടിയേറ്റക്കാരുടെ എണ്ണം പരിമിതപ്പെടുത്താനുള്ള കനേഡിയൻ സർക്കാരിന്റെ പുതിയ നയങ്ങൾ ഏറ്റവും കൂടുതൽ ബാധിച്ചിരിക്കുന്നത് ഇന്ത്യൻ അപേക്ഷകരെയാണെന്ന് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡയുടെ (IRCC) പുതിയ കണക്കുകൾ വ്യക്തമാക്കുന്നു. ഈ വർഷത്തെ ആദ്യ അഞ്ച് മാസത്തിനിടെ കാനഡ അനുവദിച്ച പിആർ അഡ്മിഷനുകളിലുണ്ടായ ആകെ കുറവിന്റെ അറുപത് ശതമാനത്തോളവും ഇന്ത്യക്കാരിൽ നിന്നുള്ള ഇടിവാണ്.
ഈ വർഷം ജനുവരി മുതൽ മേയ് വരെയുള്ള കാലയളവിൽ ഇന്ത്യക്കാർക്കുള്ള പിആർ അനുമതികൾ 49,115-ൽ നിന്ന് 36,910 ആയി കുത്തനെ കുറഞ്ഞു. അതായത് ഏകദേശം 25 ശതമാനത്തിന്റെ ഇടിവാണ് ഇവിടെ രേഖപ്പെടുത്തിയത്. ഇതേ കാലയളവിൽ കാനഡ അനുവദിച്ച ആകെ പിആർ അനുമതികൾ 1,68,800-ൽ നിന്ന് 1,47,260 ആയി കുറഞ്ഞു (12.5% കുറവ്). ഇങ്ങനെ ആകെ കുറവു വന്ന 21,540 ആളുകളിൽ 57 ശതമാനത്തിൽ അധികവും ഇന്ത്യക്കാരാണ്. 2020-ൽ 42,875 ആയിരുന്ന ഇന്ത്യൻ പിആർ അനുമതികൾ 2023-ൽ 1,39,790 എന്ന റെക്കോർഡ് സംഖ്യയിൽ എത്തിയിരുന്നു. എന്നാൽ തുടർന്ന് കാനഡ നയം കർശനമാക്കിയതോടെ 2024-ൽ ഇത് 1,27,375 ആയും 2025-ൽ 98,770 ആയും പടിപടിയായി കുറഞ്ഞു.
കാനഡയിലേക്കുള്ള കുടിയേറ്റക്കാരിൽ സിംഹഭാഗവും പരമ്പരാഗതമായി ഇന്ത്യക്കാരായതിനാലാണ് ഈ വെട്ടിക്കുറയ്ക്കൽ ഇന്ത്യക്കാരെ ഇത്രയധികം ബാധിച്ചതെന്ന് വിദഗ്ധർ ചൂണ്ടിക്കാണിക്കുന്നു. ഒരു രാജ്യം കുടിയേറ്റക്കാരുടെ എണ്ണം പെട്ടെന്ന് വെട്ടിച്ചുരുക്കുമ്പോൾ, നിലവിൽ ഏറ്റവും ഉയർന്ന പങ്കാളിത്തമുള്ള രാജ്യത്തെയാകും അത് കൂടുതൽ പ്രതികൂലമായി ബാധിക്കുകയെന്ന് അസോസിയേഷൻ ഫോർ കനേഡിയൻ സ്റ്റഡീസ് പ്രസിഡന്റ് ജാക്ക് ജെഡ്വാബ് വ്യക്തമാക്കി. കുടിയേറ്റം അതിവേഗം വ്യാപിപ്പിച്ചിരുന്ന നയത്തിൽ നിന്ന് ആസൂത്രിതമായി അത് കുറയ്ക്കുന്ന രീതിയിലേക്ക് കാനഡ നയം മാറ്റിയിരിക്കുകയാണ്.
അനിയന്ത്രിതമായ ജനസംഖ്യാ വർദ്ധനവ് തടയാനും രാജ്യത്തെ അടിസ്ഥാന സൗകര്യങ്ങളും ഭവന മേഖലയും സംരക്ഷിക്കാനുമാണ് കാനഡയുടെ നീക്കം. 2027-ന് ശേഷം രാജ്യത്തെ പുതിയ സ്ഥിരതാമസക്കാരുടെ എണ്ണം കാനഡയിലെ ആകെയുള്ള ജനസംഖ്യയുടെ 1 ശതമാനത്തിൽ താഴെയായി നിലനിർത്താനാണ് ഐആർസിസി ലക്ഷ്യമിടുന്നത്. ഇതിനായി നിലവിൽ കാനഡയിൽ താൽക്കാലികമായി താമസിച്ച് ജോലി ചെയ്യുകയും പഠിക്കുകയും ചെയ്യുന്നവർക്ക് പിആർ നൽകുന്നതിനാണ് സർക്കാർ ഇപ്പോൾ മുൻഗണന നൽകുന്നത്.
Canada cuts back on Permanent Residency (PR) to curb immigration; IRCC data shows Indians are the most affected.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
