ഓട്ടവ: കാർണി സർക്കാർ അവതരിപ്പിച്ച പുതിയ ഫെഡറൽ ബജറ്റിലെ നികുതി ഇളവ് നിർദ്ദേശത്തിൽ മാറ്റങ്ങൾ വരുത്തണമെന്ന് കൺസർവേറ്റീവ് നേതാവ് പിയറി പൊയിലീവ്രെ ആവശ്യപ്പെട്ടു. ബജറ്റിൽ പ്രഖ്യാപിച്ച 15 മില്യൺ ഡോളറിന്റെ മൂലധന നികുതി ഇളവ് ചുരുക്കം ചില ബിസിനസുകാർക്ക് മാത്രമെ ലഭിക്കൂ എന്ന് അദ്ദേഹം കുറ്റപ്പെടുത്തി. വ്യവസ്ഥകൾ ലളിതമാക്കിയാൽ മാത്രമേ നിക്ഷേപകർക്ക് ഇതിന്റെ യഥാർത്ഥ പ്രയോജനം ലഭിക്കൂ എന്ന് അദ്ദേഹം മാധ്യമ അഭിമുഖത്തിൽ വ്യക്തമാക്കി. കനേഡിയൻ കമ്പനികളുടെ വളർച്ച ലക്ഷ്യമിട്ടാണ് ഫെഡറൽ സർക്കാർ ബജറ്റിൽ ഈ ആനുകൂല്യങ്ങൾ പ്രഖ്യാപിച്ചത്.
വ്യാഴാഴ്ച അവതരിപ്പിച്ച ബജറ്റിൽ കൃഷി, വനം, റിയൽ എസ്റ്റേറ്റ്, ഭക്ഷണം തുടങ്ങി പ്രധാന മേഖലകളിലെ പല ബിസിനസുകൾക്കും ഈ നികുതി ഇളവ് ബാധകമല്ല. അതിനാൽ, സാധാരണക്കാരായ ഭൂരിഭാഗം സംരംഭകർക്കും ഇതിന്റെ ആനുകൂല്യം കിട്ടില്ലെന്ന് പ്രതിപക്ഷ നേതാവ് പൊയിലീവ്രെ കുറ്റപ്പെടുത്തി. ഈ നിയമങ്ങൾ സാധാരണക്കാർക്ക് പെട്ടെന്ന് മനസ്സിലാക്കാൻ പ്രയാസമാണെന്നും അദ്ദേഹം വിമർശിച്ചു. അടുത്ത നാല് വർഷത്തിനുള്ളിൽ 715 മില്യൺ ആനുകൂല്യം നൽകാനാണ് സർക്കാർ ലക്ഷ്യമിടുന്നത്.
രാജ്യത്തേക്ക് കൂടുതൽ വിദേശ നിക്ഷേപങ്ങൾ ആകർഷിക്കാനും പുതിയ സംരംഭങ്ങളെ പ്രോത്സാഹിപ്പിക്കാനുമാണ് ലിബറൽ സർക്കാർ ഈ പദ്ധതി കൊണ്ടുവന്നത്. പുതിയ ബിസിനസ്സ് ആരംഭിക്കുന്നവർക്കും കമ്പനിയിലെ ജീവനക്കാർക്കും ഇത് വലിയ സഹായമാകുമെന്ന് സർക്കാർ വ്യക്തമാക്കി. കൗൺസിൽ ഓഫ് കനേഡിയൻ ഇന്നൊവേറ്റേഴ്‌സ് ഉൾപ്പെടെയുള്ള സംഘടനകൾ ഈ തീരുമാനത്തെ പിന്തുണച്ചിട്ടുണ്ട്. തൊഴിലവസരങ്ങൾ സൃഷ്ടിക്കാൻ ഈ നീക്കം സഹായിക്കുമെന്ന് അവർ അഭിപ്രായപ്പെട്ടു.
അതേസമയം, കാനഡയിൽ വീണ്ടും നിക്ഷേപം നടത്തുന്നവർക്ക് നികുതി പൂർണ്ണമായി ഒഴിവാക്കുന്ന ശൈലിയാണ് വേണ്ടതെന്ന് പ്രതിപക്ഷം ചൂണ്ടിക്കാണിക്കുന്നു. പണം രാജ്യത്ത് നിന്ന് വിദേശത്തേക്ക് പോകുന്നത് തടയാൻ എളുപ്പമുള്ള നിയമങ്ങളാണ് വേണ്ടത്. പുതിയ നിയമങ്ങൾ സങ്കീർണ്ണമാക്കുന്നത് ബിസിനസ്സ് ചെയ്യുന്നവരെ ബുദ്ധിമുട്ടിക്കുമെന്ന് കൺസർവേറ്റീവ് പാർട്ടി മുന്നറിയിപ്പ് നൽകി. ഇതിന് പകരം കുറച്ചുകൂടി വ്യക്തതയുള്ള പുതിയ നിർദ്ദേശങ്ങൾ പ്രതിപക്ഷം മുന്നോട്ട് വെച്ചു.
മറുവശത്ത്, ബജറ്റിലെ വ്യവസ്ഥകൾ സാധാരണക്കാർക്ക് പ്രയോജനപ്പെടുന്നില്ലെന്ന് എൻ‌ഡി‌പി വിമർശിച്ചു. സമ്പന്നരായ നിക്ഷേപകർക്ക് മാത്രം ലാഭമുണ്ടാക്കുന്ന രീതിയിലാണ് ബജറ്റ് തയാറാക്കിയിരിക്കുന്നതെന്ന് എൻ‌ഡി‌പി നേതാവ് അവി ലൂയിസ് ആരോപിച്ചു. വലിയ കമ്പനികൾക്ക് മുൻഗണന നൽകുമ്പോൾ സാധാരണക്കാരുടെ ജീവിതച്ചെലവ് കുറയ്ക്കാനുള്ള നടപടികൾ കുറവാണെന്ന് പ്രതിപക്ഷ പാർട്ടികൾ കുറ്റപ്പെടുത്തി.
Also Read: ഇന്ത്യൻ സമൂസയുടെ രുചിയിൽ മയങ്ങി കനേഡിയൻ ദമ്പതികൾ; സോഷ്യൽ മീഡിയയിൽ വൈറലായി വീഡിയോ
എന്നാൽ ഈ ആരോപണങ്ങൾ തള്ളിക്കളഞ്ഞ ധനമന്ത്രി ഫ്രാങ്കോയിസ്-ഫിലിപ്പ് ഷാംപെയ്ൻ, ജനങ്ങളുടെ ക്ഷേമവും സാമ്പത്തിക വളർച്ചയും ഒരുപോലെ ഉറപ്പാക്കുന്നതാണ് പുതിയ ബജറ്റ് എന്ന് വ്യക്തമാക്കി. നിത്യോപയോഗ സാധനങ്ങളുടെ വിലക്കയറ്റം തടയാനും ആരോഗ്യ മേഖല മെച്ചപ്പെടുത്താനും ആവശ്യത്തിന് പണം വകയിരുത്തിയിട്ടുണ്ടെന്ന് അദ്ദേഹം പറഞ്ഞു. സാമ്പത്തിക വളർച്ചയിലൂടെ കിട്ടുന്ന അധിക വരുമാനം ജനങ്ങളുടെ നന്മയ്ക്കായി ഉപയോഗിക്കും. വരും ദിവസങ്ങളിൽ ഈ മാറ്റങ്ങൾ പ്രകടമാകുമെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
