ടൊറന്റോ: രാജ്യത്തെ നാല് പ്രമുഖ അന്താരാഷ്ട്ര വിമാനത്താവളങ്ങളുടെ നടത്തിപ്പിൽ സ്വകാര്യ പങ്കാളിത്തം ഉറപ്പാക്കാൻ കനേഡിയൻ സർക്കാർ തീരുമാനിച്ചു. ചൊവ്വാഴ്ച ടൊറന്റോയിൽ നടന്ന വ്യവസായ ഉച്ചകോടിയിലാണ് പ്രധാനമന്ത്രി മാർക്ക് കാർണി ഈ സുപ്രധാന പ്രഖ്യാപനം നടത്തിയത്. വിമാനത്താവളങ്ങളുടെ വികസനത്തിനും കൂടുതൽ സാമ്പത്തിക ലാഭത്തിനുമായി പുതിയ നിക്ഷേപങ്ങളും അന്താരാഷ്ട്ര വൈദഗ്ധ്യവും എത്തിക്കുകയാണ് ഈ നീക്കത്തിന്റെ ലക്ഷ്യം. ടൊറന്റോ പിയേഴ്സൺ, മോൺട്രിയൽ-ട്രൂഡോ, കാൽഗറി, വാൻകൂവർ എന്നീ വിമാനത്താവളങ്ങളിലാണ് സ്വകാര്യ പങ്കാളിത്തം നടപ്പിലാക്കുന്നത്.
വിമാനത്താവള ഭൂമിയുടെയും ആസ്തികളുടെയും പൂർണ്ണ ഉടമസ്ഥാവകാശം സർക്കാരിൽ തന്നെ നിലനിർത്തിക്കൊണ്ടാണ് നടത്തിപ്പവകാശം (Concession) സ്വകാര്യ കമ്പനികൾക്ക് ദീർഘകാല ലീസ് വ്യവസ്ഥയിൽ നൽകുന്നത്. വിമാനത്താവളങ്ങളെ പൂർണ്ണമായി വിൽപ്പന നടത്തുകയല്ല ചെയ്യുന്നതെന്നും, മറ്റു രാജ്യങ്ങളുടെ മാതൃക പഠിച്ച ശേഷമാണ് ഇത്തരമൊരു തീരുമാനമെന്നും പ്രധാനമന്ത്രി വ്യക്തമാക്കി. നിലവിൽ ലാഭനോട്ടമില്ലാതെ പ്രവർത്തിക്കുന്ന പ്രാദേശിക അതോറിറ്റികളാണ് കാനഡയിൽ വിമാനത്താവളങ്ങൾ നടത്തിവന്നിരുന്നത്.
സർക്കാരിന്റെ ഈ പുതിയ പ്രഖ്യാപനത്തെ കാനഡയിലെ ഏറ്റവും വലിയ വിമാനത്താവളമായ ടൊറന്റോ പിയേഴ്സണിന്റെ നടത്തിപ്പുകാരായ ‘ജി.ടി.എ.എ’ (GTAA) സ്വാഗതം ചെയ്തു. രാജ്യത്തിന്റെ സമ്പദ്വ്യവസ്ഥയെ സഹായിക്കുന്നതിനൊപ്പം യാത്രക്കാർക്ക് മികച്ച സേവനം നൽകാൻ സർക്കാരുമായി സഹകരിച്ച് പ്രവർത്തിക്കുമെന്ന് അവർ അറിയിച്ചു. എന്നാൽ, വിമാനത്താവളങ്ങൾ സ്വകാര്യ നിക്ഷേപകർക്ക് തുറന്നുകൊടുക്കുന്നത് സാധാരണക്കാരായ യാത്രക്കാർക്ക് അധിക സാമ്പത്തിക ഭാരം വരുത്തിവെക്കുമെന്നും ഇത് തെറ്റായ തീരുമാനമാണെന്നും തൊഴിലാളി സംഘടനയായ കനേഡിയൻ ലേബർ കോൺഗ്രസ് മുന്നറിയിപ്പ് നൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
