കാനഡയിലെ വിമാനത്താവള സ്വകാര്യവൽക്കരണം: നിരക്കുകൾ ഉയർന്നേക്കുമെന്ന സൂചന നൽകി ഗതാഗത മന്ത്രി

ഓട്ടവ: കാനഡയിലെ ഏറ്റവും വലിയ നാല് വിമാനത്താവളങ്ങളുടെ പ്രവർത്തനം സ്വകാര്യവൽക്കരിക്കാനുള്ള ഫെഡറൽ സർക്കാർ നീക്കത്തിന് പിന്നാലെ, യാത്രക്കാരുടെ യാത്രാച്ചെലവ് വർധിക്കില്ലെന്ന് ഉറപ്പുനൽകാനാകില്ലെന്ന് ഗതാഗത മന്ത്രി സ്റ്റീവൻ മക്കിന്നൻ വ്യക്തമാക്കി. ടൊറന്റോ-പിയേഴ്സൺ, മോൺട്രിയൽ-ട്രൂഡോ, കാൽഗറി, വൻകൂവർ എന്നീ വിമാനത്താവളങ്ങൾ നടത്താൻ സ്വകാര്യ നിക്ഷേപം തേടുകയാണെന്ന് പ്രധാനമന്ത്രി മാർക്ക് കാർണി പ്രഖ്യാപിച്ചതിനെ തുടർന്നാണ് ഈ വിഷയത്തിൽ ചർച്ചകൾ ശക്തമായത്. സിടിവി ക്വസ്റ്റ്യൻ പീരിയഡ് പരിപാടിയിൽ സംസാരിച്ച ഗതാഗത മന്ത്രിയോട് നിരക്ക് വർധന ഒഴിവാക്കാനാകുമോ എന്ന് ആവർത്തിച്ചു ചോദിച്ചെങ്കിലും, ‘അനാവശ്യമായ’ നിരക്ക് വർധനകൾ ഉണ്ടാകില്ലെന്ന് മാത്രമാണ് അദ്ദേഹം വ്യക്തമാക്കിയത്.

വിമാനത്താവളങ്ങളുടെ ഉടമസ്ഥതയിലുള്ള ഭൂമിയുടെയും ആസ്തികളുടെയും അവകാശം ഫെഡറൽ സർക്കാരിൽ തന്നെ നിലനിൽക്കുമെന്നും, പ്രവർത്തനങ്ങൾ സ്വകാര്യവൽക്കരിക്കുന്നതിലൂടെ വിമാനത്താവളങ്ങളുടെ പൂർണ്ണ മൂല്യം പ്രയോജനപ്പെടുത്താൻ സാധിക്കുമെന്നുമാണ് പ്രധാനമന്ത്രി വ്യക്തമാക്കിയത്. ഈ പരിഷ്കാരം വഴി യാത്രക്കാർക്ക് മെച്ചപ്പെട്ട സേവനാനുഭവം ലഭ്യമാക്കുമെന്നും സർക്കാർ അവകാശപ്പെടുന്നു. വിമാനത്താവളങ്ങളുടെ പ്രവർത്തന രീതികൾ നിയന്ത്രിക്കപ്പെടുമെന്നും അതിനാൽ വിമാനനിരക്കുകളും ഫീസുകളും ഭാഗികമായി സർക്കാരിന്റെ നിയന്ത്രണത്തിലായിരിക്കുമെന്നും മന്ത്രി മക്കിന്നൻ ചൂണ്ടിക്കാട്ടി.

കാനഡയിൽ വിമാനനിരക്കുകൾ നിലവിൽ തന്നെ വളരെ ഉയർന്നതാണെന്ന് സമ്മതിച്ച ഗതാഗത മന്ത്രി, പ്രാദേശിക യാത്രാസൗകര്യങ്ങൾ മെച്ചപ്പെടുത്തുന്നതിനുള്ള പദ്ധതികൾ ആവിഷ്കരിക്കുമെന്നും അറിയിച്ചു. വിമാന സർവീസുകൾ കുറവുള്ളതോ അടിസ്ഥാന സൗകര്യങ്ങളില്ലാത്തതോ ആയ ചെറു നഗരങ്ങളിലേക്ക് വിമാന സർവീസുകൾ കൂടുതൽ ബന്ധിപ്പിക്കുന്നതിനായി ഈ പദ്ധതി വഴി വീണ്ടും നിക്ഷേപം നടത്തുമെന്നാണ് അധികൃതരുടെ വിശദീകരണം. കൂടാതെ, സ്വകാര്യ പങ്കാളിത്തത്തിലേക്ക് മാറിയാലും യാത്രക്കാർക്ക് പെട്ടെന്നൊരു മാറ്റം അനുഭവപ്പെടാത്ത രീതിയിൽ നിയന്ത്രണങ്ങൾ കൊണ്ടുവരുമെന്നും അദ്ദേഹം പറഞ്ഞു.

അതേസമയം, ഇതിനകം ഉയർന്ന നിരക്കുകൾ നൽകുന്ന സാധാരണ യാത്രക്കാർക്ക് അധിക ഭാരം ഉണ്ടാകില്ലെന്ന് ഉറപ്പാക്കാൻ ശക്തമായ കരാറുകൾ നടപ്പിലാക്കുമെന്നാണ് സർക്കാർ ആവർത്തിക്കുന്നത്. എന്നാൽ, സ്വകാര്യവൽക്കരണ പദ്ധതിയുടെ പൂർണ്ണമായ സമയക്രമത്തെക്കുറിച്ചോ ഇതിനായി നിയമനിർമ്മാണം ആവശ്യമാണോ എന്നതിനെക്കുറിച്ചോ കൂടുതൽ വിശദാംശങ്ങൾ വരും ആഴ്ചകളിലും മാസങ്ങളിലുമായി പുറത്തുവിടുമെന്ന് മന്ത്രി വ്യക്തമാക്കി. തിങ്കളാഴ്ച ആരംഭിക്കുന്ന ഹൗസ് ഓഫ് കോമൺസിന്റെ ശരത്കാല സമ്മേളനത്തിൽ ലിബറൽ സർക്കാരിന്റെ പ്രധാന അജണ്ടകളിലൊന്നായി ഈ വിഷയം ചർച്ചയാകും.

Canada Airport Privatization: Transport Minister Warns of Higher Fees

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq