ദുബായ്: എമിറേറ്റ്സ് റോഡിൽ തൊഴിലാളികൾ സഞ്ചരിച്ചിരുന്ന ബസ് ട്രക്കുമായി കൂട്ടിയിടിച്ച് അഞ്ച് ഇന്ത്യക്കാർ ഉൾപ്പെടെ ഏഴുപേർ മരിച്ചു. അപകടത്തിൽ പരിക്കേറ്റ ഒൻപത് പേരെ ദുബായിലെ വിവിധ ആശുപത്രികളിൽ പ്രവേശിപ്പിച്ചു. തിങ്കളാഴ്ച പുലർച്ചെ എമിറേറ്റ്സ് റോഡിലെ അൽ റുഖയ്യ ഭാഗത്തായിരുന്നു ദാരുണമായ ഈ അപകടം നടന്നത്.
മുന്നിൽ പോവുകയായിരുന്ന ട്രക്കിന് പെട്ടെന്നുണ്ടായ സാങ്കേതിക തകരാറിനെ തുടർന്ന് ഡ്രൈവർ ബ്രേക്ക് ചെയ്തതാണ് അപകടത്തിന് കാരണമായത്. ഈ സമയം പുറകിൽ വരികയായിരുന്ന തൊഴിലാളികളുടെ ബസ് നിയന്ത്രണം വിട്ട് ട്രക്കിന്റെ പിൻഭാഗത്തേക്ക് ഇടിച്ചു കയറുകയായിരുന്നു. ഇടിയുടെ ആഘാതത്തിൽ ബസ്സിന്റെ മുൻഭാഗം പൂർണ്ണമായും തകർന്നു. അപകടസ്ഥലത്തു വെച്ചുതന്നെ ഏഴുപേരും മരണപ്പെട്ടതായാണ് റിപ്പോർട്ടുകൾ സൂചിപ്പിക്കുന്നത്.
പരിക്കേറ്റവരിൽ ചിലരുടെ നില ഇപ്പോഴും ഗുരുതരമായി തുടരുകയാണ്. മരണപ്പെട്ട ഇന്ത്യക്കാരെ തിരിച്ചറിയാനുള്ള നടപടികൾ പുരോഗമിക്കുകയാണെന്ന് അധികൃതർ അറിയിച്ചു. വിവരങ്ങൾ ശേഖരിക്കുന്നതിനും പരിക്കേറ്റവർക്ക് ആവശ്യമായ സഹായങ്ങൾ ലഭ്യമാക്കുന്നതിനുമായി ദുബായിലെ ഇന്ത്യൻ കോൺസുലേറ്റ് പ്രതിനിധികളും മലയാളി കൂട്ടായ്മകൾ ഉൾപ്പെടെയുള്ള സാമൂഹിക പ്രവർത്തകരും രംഗത്തെത്തിയിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Bus and truck collide in Dubai: Seven people including 5 Indians killed; nine injured
