കേരള സർക്കാർ ജീവനക്കാർക്ക് ‘ബമ്പർ ഓഫർ’: ഇനി ശനിയാഴ്ചയും വീട്ടിലിരിക്കാം, പച്ചക്കൊടി കാട്ടി സംഘടനകൾ

സംസ്ഥാന സർക്കാർ ഓഫീസുകളിൽ ആഴ്ചയിൽ അഞ്ച് പ്രവൃത്തി ദിനങ്ങൾ എന്ന നിർദ്ദേശത്തിന് സർവീസ് സംഘടനകൾ അംഗീകാരം നൽകി. ചീഫ് സെക്രട്ടറി ഡോ. എ. ജയതിലക് വിളിച്ചുചേർത്ത ഓൺലൈൻ യോഗത്തിലാണ് ഭരണ-പ്രതിപക്ഷ സംഘടനകൾ നിലപാട് വ്യക്തമാക്കിയത്. ഇതോടെ കേന്ദ്ര സർക്കാർ ഓഫീസുകളുടെ മാതൃകയിൽ എല്ലാ ശനിയാഴ്ചകളും അവധിയാക്കാനുള്ള നടപടികൾക്ക് വേഗതയേറി. ശനിയാഴ്ച അവധി നൽകുന്ന സാഹചര്യത്തിൽ മറ്റ് പ്രവൃത്തി ദിവസങ്ങളിലെ ജോലി സമയം വർദ്ധിപ്പിക്കുന്നത് അംഗീകരിക്കാമെന്ന് സംഘടനകൾ അറിയിച്ചു.

നിലവിൽ രാവിലെ 10 മുതൽ വൈകിട്ട് 5 വരെയാണ് ഭൂരിഭാഗം ഓഫീസുകളുടെയും സമയം. ഇത് രാവിലെ 9:30 മുതൽ വൈകിട്ട് 5:30 വരെയോ അല്ലെങ്കിൽ എട്ട് മണിക്കൂർ തികയ്ക്കുന്ന രീതിയിലോ പുനഃക്രമീകരിക്കാനാണ് ആലോചന. എന്നാൽ, ജോലി സമയം കൂട്ടിയാലും കാഷ്വൽ ലീവുകളും മറ്റ് പൊതു അവധികളും വെട്ടിച്ചുരുക്കുന്നതിനോട് സംഘടനാ പ്രതിനിധികൾ കടുത്ത എതിർപ്പ് രേഖപ്പെടുത്തി.

ആരോഗ്യ വകുപ്പ് പോലുള്ള അടിയന്തര സേവന മേഖലകളിലെ ജീവനക്കാരുടെ കാര്യത്തിൽ പ്രത്യേക തീരുമാനം വേണമെന്ന ആവശ്യവും യോഗത്തിൽ ഉയർന്നു. ഷിഫ്റ്റ് സമ്പ്രദായം നിലവിലുള്ള വകുപ്പുകളിൽ അഞ്ച് പ്രവൃത്തി ദിനം എന്ന രീതി എങ്ങനെ നടപ്പിലാക്കാമെന്നത് സംബന്ധിച്ച് വിശദമായ പഠനം ആവശ്യമാണെന്ന് ചീഫ് സെക്രട്ടറി വ്യക്തമാക്കി. ഓരോ മേഖലയുടെയും പ്രത്യേക ജോലി സാഹചര്യം കണക്കിലെടുത്ത് മാത്രമേ അന്തിമ വിജ്ഞാപനം പുറപ്പെടുവിക്കൂ.

ശമ്പള പരിഷ്കരണ കമ്മീഷനും ഭരണ പരിഷ്കരണ കമ്മീഷനും ആഴ്ചയിൽ അഞ്ച് പ്രവൃത്തി ദിനം എന്ന നിർദ്ദേശം നേരത്തെ തന്നെ സർക്കാരിന് മുന്നിൽ സമർപ്പിച്ചിരുന്നു. നിലവിൽ ഭൂരിഭാഗം സേവനങ്ങളും ഓൺലൈനായി ലഭ്യമായതിനാൽ പ്രവൃത്തി ദിനങ്ങൾ കുറയ്ക്കുന്നത് ജനങ്ങളെ ബാധിക്കില്ലെന്നാണ് സർക്കാരിന്റെ വിലയിരുത്തൽ. കൂടാതെ ഓഫീസുകളുടെ പ്രവർത്തനച്ചെലവ് കുറയ്ക്കുന്നതിനും വൈദ്യുതി ലാഭിക്കുന്നതിനും ഈ മാറ്റം സഹായിക്കും.

നിലവിൽ നടന്നത് പ്രാഥമികമായ അഭിപ്രായ ശേഖരണമാണെന്നും സംഘടനകൾ ഉന്നയിച്ച കാര്യങ്ങൾ സർക്കാർ ഗൗരവമായി പരിഗണിക്കുമെന്നും ചീഫ് സെക്രട്ടറി അറിയിച്ചു. ലീവ് വെട്ടിക്കുറയ്ക്കുന്നത് പോലുള്ള തർക്കവിഷയങ്ങളിൽ ആവശ്യമെങ്കിൽ തുടർ ചർച്ചകൾ നടത്തും. നിയമസഭാ തിരഞ്ഞെടുപ്പിന്റെ പെരുമാറ്റച്ചട്ടം നിലവിൽ വരുന്നതിന് മുൻപായി ഈ കാര്യത്തിൽ അന്തിമ തീരുമാനം ഉണ്ടായേക്കുമെന്നാണ് സൂചന.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

‘Bumper offer’ for government employees: Now you can stay home on Saturdays too, organizations give green light