നയാഗ്ര: നയാഗ്ര മേഖലയിലെ പബ്ലിക് ഹെൽത്ത്, ബ്രോക്ക് സർവകലാശാലയിലെ വിദ്യാർത്ഥികളിലും ജീവനക്കാരിലും കാണപ്പെട്ട ദഹനസംബന്ധമായ രോഗബാധയെക്കുറിച്ച് വിശദമായ അന്വേഷണം ആരംഭിച്ചു. കഴിഞ്ഞ വ്യാഴാഴ്ചയാണ് ഇതുസംബന്ധിച്ച് ആദ്യ വിവരങ്ങൾ ലഭിച്ചതെന്നും, നിലവിൽ നോറോവൈറസ് മൂലമുള്ള രോഗബാധയ്ക്കാണ് കൂടുതൽ സാധ്യതയെന്നും അധികൃതർ വ്യക്തമാക്കുന്നു. രോഗബാധയുടെ ഉറവിടം കണ്ടെത്തുന്നതിനായി രോഗലക്ഷണങ്ങൾ, ബാധിച്ച സമയം, ലബോറട്ടറി റിപ്പോർട്ടുകൾ എന്നിവ ശേഖരിച്ചുവരികയാണ്.
രോഗവ്യാപനം തടയുന്നതിനായി ആരോഗ്യവകുപ്പുമായി ചേർന്ന് സർവകലാശാല പ്രതിരോധ നടപടികൾ ശക്തമാക്കിയിട്ടുണ്ട്. ക്യാമ്പസിലെ ആളുകൾ കൂടുതലായി ഉപയോഗിക്കുന്ന സ്ഥലങ്ങളിൽ ശുചിത്വ നടപടികൾ വേഗത്തിലാക്കി. ഇടയ്ക്കിടെ കൈകൾ കഴുകുന്നതാണ് രോഗ പ്രതിരോധത്തിനുള്ള ഏറ്റവും മികച്ച മാർഗമെന്ന് അസോസിയേറ്റ് മെഡിക്കൽ ഓഫീസർ ഓഫ് ഹെൽത്ത് ഡോ. ആഞ്ചല മാ പറഞ്ഞു.
Also Read: അമിതമായി ചൂടാകുന്നു: INMO സ്മാർട്ട് ഗ്ലാസുകൾ തിരിച്ചുവിളിച്ച് ഹെൽത്ത് കാനഡ
വയറിളക്കം, ഛർദ്ദി, പനി, വിറയൽ തുടങ്ങിയ ലക്ഷണങ്ങൾ ഉള്ളവർ വീട്ടിൽ തന്നെ തുടരണമെന്ന് ആരോഗ്യവകുപ്പ് നിർദേശിച്ചു. രോഗലക്ഷണങ്ങൾ മാറിയ ശേഷവും കുറഞ്ഞത് 48 മണിക്കൂർ നേരത്തേക്ക് മറ്റുള്ളവരുമായി അടുത്ത ഇടപഴകൽ ഒഴിവാക്കണം. ലക്ഷണങ്ങൾ കൂടുതൽ കഠിനമായാൽ നയാഗ്ര പബ്ലിക് ഹെൽത്തുമായി ബന്ധപ്പെടണമെന്നും അധികൃതർ പത്രക്കുറിപ്പിലൂടെ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
