കേരളത്തിൽ ജനനം, ഹാർവാർഡിലെ മിടുക്കി; ലോസ് ആഞ്ചലെസ് മേയർ കസേര ലക്ഷ്യമിട്ട് നിത്യ രാമൻ!

ലോസ് ആഞ്ചലെസ്: ലോസ് ആഞ്ചലെസിൽ ഈ വർഷം നവംബറിൽ നടക്കുന്ന മേയർ തെരഞ്ഞെടുപ്പിൽ ഇന്ത്യൻ വംശജയും മത്സരരംഗത്ത്. കേരളത്തിൽ ജനിച്ച 44കാരിയായ നിത്യ രാമൻ ആണ് ഡെമോക്രാറ്റിക് പാർട്ടിക്കായി ജനവിധി തേടുന്നത്. പ്രൈമറി തെരഞ്ഞെടുപ്പിൽ റിപ്പബ്ലിക്കൻ പാർട്ടി സ്ഥാനാർത്ഥി സ്പെൻസർ പ്രാറ്റിനെ പിന്തള്ളി നിത്യ രണ്ടാം സ്ഥാനം ഉറപ്പിച്ചു. ഇതോടെ വരാനിരിക്കുന്ന പ്രധാന തെരഞ്ഞെടുപ്പിൽ നിലവിലെ മേയറായ കാരൺ ബാസും നിത്യ രാമനും തമ്മിലായിരിക്കും നേരിട്ടുള്ള പോരാട്ടം നടക്കുക. അമേരിക്കയിലെ ഏറ്റവും വലിയ രണ്ടാമത്തെ നഗരമായ ലോസ് ആഞ്ചലെസിന്റെ തലപ്പത്തേക്ക് ഇന്ത്യൻ വേരുകളുള്ള മറ്റൊരാൾ കൂടി എത്തുമോ എന്ന ആകാംക്ഷയിലാണ് ആഗോള സമൂഹം.

പ്രൈമറി തെരഞ്ഞെടുപ്പിന്റെ ആദ്യഘട്ട വോട്ടെണ്ണലിൽ നിത്യ രാമൻ നേരിയ തോതിൽ പിന്നിൽ പോയിരുന്നെങ്കിലും, പിന്നീട് ശക്തമായ മുന്നേറ്റത്തോടെ സ്പെൻസർ പ്രാറ്റിനെ മറികടക്കുകയായിരുന്നു. നിലവിലെ വോട്ട് കണക്കുകൾ പ്രകാരം കാരൻ ബാസിന് 34.3 ശതമാനവും നിത്യ രാമന് 28.6 ശതമാനവും സ്പെൻസർ പ്രാറ്റിന് 25.8 ശതമാനവും വോട്ടുകളാണ് ലഭിച്ചത്. മത്സരരംഗത്തുള്ള ഒരു സ്ഥാനാർഥിക്കും 50 ശതമാനത്തിലധികം വോട്ട് നേടാൻ കഴിയാതെ വന്നതോടെയാണ് നവംബറിൽ നിർണായകമായ റൺ-ഓഫ് (Run-off) തെരഞ്ഞെടുപ്പിലേക്ക് നഗരം നീങ്ങുന്നത്.

പ്രൈമറിയിൽ മികച്ച വിജയം നേടാൻ കഴിഞ്ഞതിന് പിന്നാലെ, പ്രചാരണത്തിന് നേതൃത്വം നൽകിയ അണികൾക്കും വോട്ട് നൽകിയ ജനങ്ങൾക്കും നിത്യ രാമൻ നന്ദി അറിയിച്ചു. താങ്ങാനാവുന്ന നിരക്കിലുള്ള ഭവന സൗകര്യങ്ങൾ വർധിപ്പിക്കുക, വാടകക്കാർക്ക് കൃത്യമായ സംരക്ഷണം ഉറപ്പാക്കുക, നഗരത്തിലെ വലിയ പ്രതിസന്ധിയായ ഭവനരഹിതരുടെ പ്രശ്നങ്ങൾക്ക് ശാശ്വത പരിഹാരം കാണുക തുടങ്ങിയ ജനകീയ വാഗ്ദാനങ്ങൾ മുന്നോട്ടുവെച്ചാണ് നിത്യ തന്റെ തെരഞ്ഞെടുപ്പ് പ്രചാരണവുമായി മുന്നോട്ട് പോകുന്നത്. പ്രമുഖ അമേരിക്കൻ നഗരാസൂത്രണ വിദഗ്ധ കൂടിയായ നിത്യയുടെ പദ്ധതികൾക്ക് വലിയ ജനപിന്തുണയാണ് നഗരത്തിൽ ലഭിക്കുന്നത്.

കേരളത്തിൽ തമിഴ് അയ്യർ കുടുംബത്തിൽ ജനിച്ച നിത്യ രാമൻ തന്റെ ആറാം വയസ്സിലാണ് മാതാപിതാക്കൾക്കൊപ്പം അമേരിക്കയിലേക്ക് കുടിയേറിയത്. പിന്നീട് 22-ാം വയസ്സിൽ അമേരിക്കൻ പൗരത്വം നേടി. ലോകപ്രശസ്തമായ ഹാർവാർഡ് സർവകലാശാലയിൽ നിന്നും മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽ (MIT) നിന്നും നഗരാസൂത്രണത്തിൽ ബിരുദം നേടിയ നിത്യ, മുൻപ് ഡൽഹിയിലും ചെന്നൈയിലും വിവിധ സാമൂഹ്യ നഗരവികസന പ്രോജക്ടുകളിൽ പ്രവർത്തിച്ചിട്ടുണ്ട്. നിലവിൽ ലോസ് ആഞ്ചലെസ് സിറ്റി കൗൺസിലിൽ ഡിസ്ട്രിക്റ്റ് 4-നെ പ്രതിനിധീകരിക്കുന്ന കൗൺസിൽ അംഗമാണ്. ഭർത്താവ് വല്ലി ചന്ദ്രശേഖരനും ഇരട്ടക്കുട്ടികൾക്കുമൊപ്പം കാലിഫോർണിയയിലെ സിൽവർ ലേക്കിലാണ് ഇവർ താമസിക്കുന്നത്.

Born in Kerala, brilliant at Harvard; Nithya Raman aims for the Los Angeles mayor’s chair!

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla