ഒന്റാറിയോ : ഗ്രേറ്റർ സഡ്ബറിയിൽ ഈ മാസം ആദ്യം പ്രഖ്യാപിച്ച കുടിവെള്ളം തിളപ്പിച്ചുപയോഗിക്കാനുള്ള ജാഗ്രതാ നിർദ്ദേശം (ബോയിൽ വാട്ടർ അഡ്വൈസറി) തെറ്റായ മുന്നറിയിപ്പായിരിക്കാമെന്ന് നഗരസഭാ കൗൺസിലിന് സമർപ്പിക്കാനിരിക്കുന്ന ഉദ്യോഗസ്ഥ റിപ്പോർട്ട് വ്യക്തമാക്കുന്നു. മെയ് 6 മുതൽ മെയ് 8 വരെ നീണ്ടുനിന്ന ജാഗ്രതാ നിർദ്ദേശത്തിന് കാരണം കുടിവെള്ളത്തിലെ താത്കാലിക മലിനീകരണമോ പരിശോധനാ ഫലത്തിലെ പിഴവോ ആകാമെന്നാണ് മെയ് 26-ലെ റിപ്പോർട്ടിന്റെ നിഗമനം.
മെയ് 6-ന് ഉച്ചയ്ക്ക് 1:30-ന് ഫാൽക്കൺബ്രിഡ്ജ് കിണർ സപ്ലൈയിലെ ആറാം നമ്പർ കിണറ്റിലെ വെള്ളത്തിൽ കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്നാണ് നടപടികൾ ആരംഭിച്ചത്. തുടർന്ന് ഡേവിഡ് സ്ട്രീറ്റ് ജലശുദ്ധീകരണ ശാലയിലെ സാമ്പിളുകളിലും ബാക്ടീരിയ സാന്നിധ്യം സ്ഥിരീകരിച്ചതോടെ പബ്ലിക് ഹെൽത്ത് സഡ്ബറി ആൻഡ് ഡിസ്ട്രിക്റ്റ്സ് അന്ന് വൈകുന്നേരം 6:19-ഓടെ ജാഗ്രതാ നിർദ്ദേശം പുറപ്പെടുവിക്കുകയായിരുന്നു.
തുടർന്ന് നഗരസഭ ക്ലോറിൻ്റെ അളവ് വർദ്ധിപ്പിക്കുകയും സാമ്പിൾ ശേഖരിച്ച സ്ഥലങ്ങളിലെ ഹൈഡ്രന്റുകൾ ശുദ്ധീകരിക്കുകയും ചെയ്തു. മെയ് 6, 7, 8 തീയതികളിൽ വിവിധയിടങ്ങളിൽ നിന്ന് വീണ്ടും ശേഖരിച്ച ജലസാമ്പിളുകളുടെ പരിശോധനാ ഫലങ്ങൾ നെഗറ്റീവ് ആയതിനെ തുടർന്ന് മെയ് 8-ന് വൈകുന്നേരം 6:36-ന് ജാഗ്രതാ നിർദ്ദേശം ഔദ്യോഗികമായി പിൻവലിച്ചു. സാമ്പിൾ ശേഖരണത്തിലോ വിശകലനത്തിലോ ഉണ്ടായ അപാകതയാകാം കാരണമെങ്കിലും ഇതിന്റെ കൃത്യമായ ഉറവിടം കണ്ടെത്താനായിട്ടില്ലെന്ന് റിപ്പോർട്ടിൽ പറയുന്നു. നഗരത്തിലെ കുടിവെള്ള വിതരണ സംവിധാനം സുരക്ഷിതമായിരുന്നതായും കൃത്യമായി തന്നെയാണ് പ്രവർത്തിച്ചതെന്നും ലഭ്യമായ തെളിവുകൾ വ്യക്തമാക്കുന്നതായി റിപ്പോർട്ട് കൂട്ടിച്ചേർക്കുന്നു.
Boil Water Advisory in Sudbury: Report says caution was a false warning
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
