ഒന്റാറിയോയിൽ പുതിയ വീട് വാങ്ങുന്നവർക്ക് വൻ ഇളവ്; നികുതിയിളവ് പ്രഖ്യാപിച്ച് പ്രീമിയർ ഡഗ് ഫോർഡ്

ഒന്റാറിയോ: ഒന്റാറിയോയിൽ നിർമ്മിക്കുന്ന എല്ലാ പുതിയ വീടുകൾക്കും എച്ച്എസ് ടി (HST) ഇളവ് നൽകാൻ ഫെഡറൽ, പ്രൊവിൻഷ്യൽ സർക്കാരുകൾ തീരുമാനിച്ചു. മിസിസാഗയിൽ ബുധനാഴ്ച നടന്ന വാർത്താസമ്മേളനത്തിൽ പ്രീമിയർ ഡഗ് ഫോർഡ് ആണ് ഈ സുപ്രധാന പ്രഖ്യാപനം നടത്തിയത്. നേരത്തെ ആദ്യമായി വീട് വാങ്ങുന്നവർക്ക് മാത്രമായി പരിമിതപ്പെടുത്തിയിരുന്ന ഈ ആനുകൂല്യം ഇനി മുതൽ എല്ലാ വിഭാഗം വാങ്ങുന്നവർക്കും ലഭ്യമാകും. ഫെഡറൽ നിയമനിർമ്മാണം പൂർത്തിയാകുന്നതോടെ ഈ വർഷം ഏപ്രിൽ മുതൽ 2027 മാർച്ച് അവസാനം വരെ താൽക്കാലികമായാണ് ഈ ഇളവ് അനുവദിക്കുന്നത്.

പുതിയ പദ്ധതി പ്രകാരം 1 മില്യൺ ഡോളർ വരെ വിലയുള്ള വീടുകൾക്ക് 1,30,000 ഡോളർ വരെ നികുതിയിളവ് ലഭിക്കും. പരമാവധി 1.5 മില്യൺ ഡോളർ വരെയുള്ള വീടുകളെ പദ്ധതിയുടെ പരിധിയിൽ ഉൾപ്പെടുത്തിയിട്ടുണ്ട്. നികുതിയുടെ എട്ട് ശതമാനം വരുന്ന പ്രൊവിൻഷ്യൽ വിഹിതം ഒന്റാറിയോ സർക്കാരും അഞ്ച് ശതമാനം വരുന്ന ഫെഡറൽ വിഹിതം കേന്ദ്ര സർക്കാരും വഹിക്കും. പ്രധാനമന്ത്രി കാർണിയുമായി ചേർന്നുള്ള ഈ നീക്കം ഭവന നിർമ്മാണ മേഖലയിൽ വലിയ മാറ്റമുണ്ടാക്കുമെന്ന് ഡഗ് ഫോർഡ് വ്യക്തമാക്കി. ഏകദേശം 1.4 ബില്യൺ ഡോളറാണ് ഈ പദ്ധതിക്കായി ഒന്റാറിയോ സർക്കാർ ചെലവ് പ്രതീക്ഷിക്കുന്നത്.

ഈ തീരുമാനത്തെ ഗ്രേറ്റർ ഒട്ടാവ ഹോം ബിൽഡേഴ്സ് അസോസിയേഷൻ സ്വാഗതം ചെയ്തു. ഭവനലഭ്യത ഉറപ്പാക്കുന്നതിൽ സർക്കാർ കൈക്കൊണ്ട ഏറ്റവും പ്രധാനപ്പെട്ട നടപടിയാണിതെന്ന് അസോസിയേഷൻ എക്സിക്യൂട്ടീവ് ഡയറക്ടർ ജേസൺ ബർഗ്രാഫ് പറഞ്ഞു. കഴിഞ്ഞ വർഷം ഒട്ടാവയിൽ ഏകദേശം 3,000 പുതിയ വീടുകളുടെ വിൽപ്പനയാണ് നടന്നത്. പുതിയ നികുതിയിളവ് വരുന്നതോടെ ഈ വർഷം വിൽപ്പന ഇരട്ടിയാകുമെന്നാണ് വിലയിരുത്തൽ. വിപണിയിൽ നിന്ന് വിട്ടുനിന്നിരുന്നവർക്ക് തിരികെ വരാൻ ഈ തീരുമാനം പ്രേരണയാകുമെന്നും അദ്ദേഹം കൂട്ടിച്ചേർത്തു.

നികുതിയിളവ് വഴി 2.2 ബില്യൺ ഡോളറിന്റെ സാമ്പത്തിക ആശ്വാസം ജനങ്ങൾക്ക് ലഭിക്കുമെന്നും 8,000 പുതിയ വീടുകളുടെ നിർമ്മാണം ഉടൻ ആരംഭിക്കുമെന്നുമാണ് സർക്കാരിന്റെ വിലയിരുത്തൽ. ഇത് വഴി 21,000 തൊഴിലവസരങ്ങൾ സൃഷ്ടിക്കപ്പെടുമെന്നും പ്രവിശ്യയുടെ മൊത്ത ആഭ്യന്തര ഉത്പാദനത്തിൽ (GDP) 2.7 ബില്യൺ ഡോളറിന്റെ വർദ്ധനവുണ്ടാകുമെന്നും പ്രീമിയർ വ്യക്തമാക്കി.

പുതിയ വീടുകൾക്ക് മാത്രമാണ് ഈ ഇളവ് ബാധകമെങ്കിലും, ഇത് മൊത്തം ഭവന വിപണിയിലും ഗുണപരമായ ചലനങ്ങൾ ഉണ്ടാക്കുമെന്ന് വിദഗ്ധർ ചൂണ്ടിക്കാട്ടുന്നു. അതേസമയം, ആദ്യമായി വീട് വാങ്ങുന്നവർക്ക് പുതിയ വീടുകൾക്ക് പുറമെ മറ്റ് വീടുകൾക്കും കൂടുതൽ ഇളവുകൾ നൽകണമെന്ന് ആവശ്യപ്പെട്ട് ഒരു വിഭാഗം രംഗത്തെത്തിയിട്ടുണ്ട്.

Big relief for new home buyers in Ontario; Premier Doug Ford announces tax breaks

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt