ബ്രിട്ടീഷ് കൊളംബിയ: ബ്രിട്ടീഷ് കൊളംബിയയിൽ വിറ്റഴിയാത്ത കോണ്ടോമിനിയം അപ്പാർട്ടുമെന്റുകൾ സർക്കാർ വിലയ്ക്ക് വാങ്ങി താങ്ങാനാവുന്ന വിലയ്ക്കുള്ള ഭവനങ്ങളാക്കി മാറ്റാനുള്ള പുതിയ പദ്ധതിയെച്ചൊല്ലി വിവാദം കനക്കുന്നു. ഈ നീക്കം സാധാരണക്കാരുടെ ഭവനപ്രശ്നം പരിഹരിക്കുന്നതിനേക്കാൾ ഉപരിയായി, പ്രതിസന്ധിയിലായ റിയൽ എസ്റ്റേറ്റ് മേഖലയെയും സാമ്പത്തിക മേഖലയെയും സഹായിക്കാനാണെന്ന ആരോപണവുമായി നഗര ആസൂത്രണ വിദഗ്ധർ രംഗത്തെത്തി.
പ്രധാനമന്ത്രി മാർക്ക് കാർണിയും ബി.സി. പ്രീമിയർ ഡേവിഡ് എബിയും ചേർന്ന് പ്രഖ്യാപിച്ച പദ്ധതി പ്രകാരം, അടുത്ത പത്ത് വർഷത്തിനുള്ളിൽ 5 ബില്യൺ ഡോളർ ചെലവഴിച്ച് 2,200 കോണ്ടോകൾ ഏറ്റെടുക്കാനാണ് ലക്ഷ്യമിടുന്നത്. വിപണിയിൽ വിറ്റഴിയാത്ത അപ്പാർട്ടുമെന്റുകൾ ഏറ്റെടുക്കുന്നതിലൂടെ നിർമ്മാതാക്കളെ സഹായിക്കാനാണ് സർക്കാർ ശ്രമിക്കുന്നതെന്ന് സൈമൺ ഫ്രേസർ സർവകലാശാലയിലെ സിറ്റി പ്രോഗ്രാം ഡയറക്ടർ ആൻഡി യാൻ ചൂണ്ടിക്കാട്ടി. അമേരിക്കയിൽ 2007-ൽ ഉണ്ടായ സബ്പ്രൈം മോർട്ട്ഗേജ് പ്രതിസന്ധിക്ക് സമാനമായ സാഹചര്യം ഒഴിവാക്കാനാണോ സർക്കാർ വാൻകൂവറിലെ ഭവനവിലയ്ക്ക് പുതിയൊരു അടിത്തറ ഒരുക്കാൻ ശ്രമിക്കുന്നതെന്നും അദ്ദേഹം സംശയം പ്രകടിപ്പിച്ചു.
നിർമ്മാതാക്കൾക്ക് വലിയ നഷ്ടം വരാതെ വിപണിയിൽ ഇടപെടാനാണ് സർക്കാർ ശ്രമിക്കുന്നതെങ്കിലും, ഇത് വിപണിയുടെ സ്വാഭാവികമായ വിലക്കുറവിനെ തടയുമെന്ന് വിമർശകർ പറയുന്നു. വിപണിയിൽ ആവശ്യത്തിന് കോണ്ടോകൾ ലഭ്യമായ സാഹചര്യത്തിൽ, സ്വാഭാവികമായിത്തന്നെ വില കുറയേണ്ടതായിരുന്നു. എന്നാൽ സർക്കാർ ഇടപെട്ട് ഇവ വാങ്ങിക്കൂട്ടുന്നത് നിർമ്മാതാക്കൾക്ക് ലാഭകരമാകുമെന്നും, ഇത് ഭവനപ്രതിസന്ധിക്ക് ശാശ്വത പരിഹാരമാകില്ലെന്നും ബി.സി. കൺസർവേറ്റീവ് പാർട്ടി ഭവന വക്താവ് ലിൻഡ ഹെപ്നർ കുറ്റപ്പെടുത്തി.
പദ്ധതിയുടെ വിശദാംശങ്ങൾ വെളിപ്പെടുത്താത്തതിൽ തദ്ദേശ ഭരണകൂടങ്ങളും അതൃപ്തിയിലാണ്. യൂണിയൻ ഓഫ് ബി.സി. മുനിസിപ്പാലിറ്റീസ് അംഗം ജെന സ്റ്റോണർ പറയുന്നത്, നിലവിലെ ഈ പദ്ധതിയെക്കുറിച്ച് തങ്ങൾക്ക് വലിയ വ്യക്തതയില്ലെന്നാണ്. നേരത്തെ സാധാരണക്കാർക്കായി നടപ്പാക്കി വന്നിരുന്ന അഫോർഡബിൾ ഹൗസിംഗ് ഫണ്ടുകൾ വെട്ടിക്കുറച്ച സർക്കാർ, ഇപ്പോൾ എന്തുകൊണ്ട് ഈ പുതിയ പദ്ധതിക്കായി തുക ചെലവഴിക്കുന്നു എന്ന ചോദ്യവും ഉയരുന്നുണ്ട്.
B.C. condo conversion plan might be more about financial sector than housing
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
