ലക്നൗ: രാജ്യത്തെ ഞെട്ടിച്ച അയോധ്യ സംഭാവന തട്ടിപ്പ് കേസിൽ അന്വേഷണം ശക്തമാക്കി പ്രത്യേക അന്വേഷണ സംഘം (SIT). കേസിന്റെ ഭാഗമായി രാമക്ഷേത്ര നിർമാണത്തിനായി കോടിക്കണക്കിന് രൂപയും സ്വർണ്ണ-വെള്ളി ആഭരണങ്ങളും സംഭാവന നൽകിയ പ്രമുഖരിൽ നിന്നും നേരിട്ട് മൊഴിയെടുക്കാൻ എസ്.ഐ.ടി തീരുമാനിച്ചു. ക്ഷേത്രത്തിലേക്ക് സംഭാവനയായി നൽകിയതിൽ കാണാതായ 60 കിലോ വെള്ളിക്കട്ടിയെക്കുറിച്ചുള്ള വിവരങ്ങൾ ശേഖരിക്കുന്നതിനായി, ഇത് നൽകിയ ഇന്ത്യൻ ബുള്യൻ ആൻഡ് ജൂവലേഴ്സ് അസോസിയേഷൻ പ്രസിഡന്റ് അനുരാഗ് രസ്തോഗിയുടെ മൊഴിയാണ് ആദ്യം രേഖപ്പെടുത്തുക.
കൂടാതെ, 3 കിലോ വെള്ളി ഹാരവും പാദുകങ്ങളും വഴിപാടായി സമർപ്പിച്ചിട്ടും രസീത് ലഭിക്കാതിരുന്ന മുംബൈയിലെ പ്രമുഖ വ്യവസായി അനിൽ വിശ്വകർമ്മയുടെ മൊഴിയും ഉടൻ രേഖപ്പെടുത്തും. തട്ടിപ്പിന്റെ വ്യാപ്തി പുറത്തുകൊണ്ടുവരാൻ സംഭാവന നൽകിയ മറ്റുള്ളവരിലേക്കും അന്വേഷണം വ്യാപിപ്പിക്കും.
അതേസമയം, തട്ടിപ്പ് വിവാദത്തിൽ രാമക്ഷേത്ര തീർത്ഥ ക്ഷേത്ര ട്രസ്റ്റ് ജനറൽ സെക്രട്ടറി ചമ്പത് റായിയെ പൂർണ്ണമായി തള്ളി വിശ്വ ഹിന്ദു പരിഷത്ത് (VHP) രംഗത്തെത്തി. ട്രസ്റ്റിലെ ഭാരവാഹികളിൽ ആര് കുറ്റം ചെയ്താലും ആ വ്യക്തി തന്നെയാണ് അതിന് ഉത്തരവാദിയെന്നും അവർ ശിക്ഷിക്കപ്പെടണമെന്നും വി.എച്ച്.പി ജോയിന്റ് ജനറൽ സെക്രട്ടറി സുരേന്ദ്ര ജയിൻ വ്യക്തമാക്കി.
ഈ സാമ്പത്തിക തട്ടിപ്പിൽ ക്ഷേത്ര ട്രസ്റ്റിനോ മറ്റ് അനുബന്ധ പ്രസ്ഥാനങ്ങൾക്കോ പങ്കില്ലെന്നും, കുറ്റാരോപിതർ എത്രയും വേഗം എസ്.ഐ.ടിക്ക് മുൻപാകെ ഹാജരായി വസ്തുതകൾ വ്യക്തമാക്കണമെന്നും വി.എച്ച്.പി ആവശ്യപ്പെട്ടു. ഭാരവാഹികൾക്കെതിരെ സംഘടന തന്നെ പരസ്യ നിലപാടുമായി രംഗത്തുവന്നത് കേസിൽ വലിയ രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്.
Ayodhya donation scam: SIT to record statements of prominent donors
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
