കൊച്ചി: വിമാനയാത്രയ്ക്കിടെ എമർജൻസി വാതിൽ ബലമായി തുറക്കാൻ ശ്രമിച്ച പാലക്കാട് സ്വദേശിയായ ജംഷീറിനെ നെടുമ്പാശേരി പൊലീസ് അറസ്റ്റ് ചെയ്തു. ക്വാലാലംപൂരിൽ നിന്ന് കൊച്ചിയിലേക്ക് വരികയായിരുന്ന ബാറ്റിക് എയറിന്റെ വിമാനത്തിൽ വെച്ചാണ് യാത്രക്കാരുടെയും വിമാന ജീവനക്കാരുടെയും ജീവന് ഭീഷണിയാകുന്ന രീതിയിൽ ഇയാൾ പെരുമാറിയത്. സുരക്ഷാ മാനദണ്ഡങ്ങൾ ലംഘിച്ചതിനെ തുടർന്ന് കൊച്ചി വിമാനത്താവളത്തിൽ വിമാനമിറങ്ങിയ ഉടൻ തന്നെ ഇയാളെ പൊലീസ് കസ്റ്റഡിയിലെടുക്കുകയായിരുന്നു.
വിമാന യാത്രയ്ക്കിടെ രാത്രി 9.30നും 11നും ഇടയിലുള്ള സമയത്താണ് സംഭവം നടന്നത്. ജംഷീർ എമർജൻസി ഡോറിന്റെ ലിവർ ബലമായി വലിച്ചുതുറക്കാൻ ശ്രമിക്കുന്നത് ശ്രദ്ധയിൽപ്പെട്ട ഉടൻ തന്നെ മറ്റ് യാത്രക്കാരും ക്യാബിൻ ക്രൂവും ചേർന്ന് ഇയാളെ തടയുകയും സീറ്റിലേക്ക് മാറ്റിയിരുത്തുകയും ചെയ്തു. വിമാനത്തിനുള്ളിൽ വെച്ച് മറ്റ് യാത്രക്കാർ ഫോണിൽ പകർത്തിയ ഇതിന്റെ ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്.
നെടുമ്പാശേരിയിൽ വിമാനമിറങ്ങിയ ശേഷം വിമാനക്കമ്പനി അധികൃതർ ഇയാളെ പൊലീസിന് കൈമാറുകയായിരുന്നു. ഇയാൾ എമർജൻസി വാതിൽ തുറക്കാൻ ശ്രമിച്ചതിന്റെ കാരണം എന്താണെന്ന് വ്യക്തമായിട്ടില്ല. സംഭവത്തിൽ നെടുമ്പാശേരി പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. കേന്ദ്ര, സംസ്ഥാന ഇന്റലിജൻസ് വിഭാഗങ്ങളിലെ മുതിർന്ന ഉദ്യോഗസ്ഥരുടെ നേതൃത്വത്തിൽ ഇയാളെ കൂടുതൽ ചോദ്യം ചെയ്തു വരികയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Attempt to open door during flight; Palakkad native in police custody.
